Aqparat jáne qoǵamdyq damý mınıstri Aıda Balaeva "Qazaqfılm" jeriniń satylǵanyna qatysty aqparatty joqqa shyǵaryp, el arasynda júrgen qaýestke núkte qoıdy.
Mınıstr kınostýdıaǵa baılanysty aqparat qoǵamda qyzý talqyǵa túskenin ashyq aıtty. Sondaı-aq qazaqstandyqtardyń "Qazaqfılmniń” taǵdyryna alańdaýshylyq bildirgenine qýanǵanyn da jasyrmady.
“Eń aldymen aıtarym, kıno salasyna qatysy bar tulǵalardyń kınostýdıa tóńiregindegi prosesterge qatysty óz pikirin bildirýge quqyǵy bar. Alaıda aqparat taratqanda tek faktilerge súıenýge keńes beremin. "Zań men tártip" qaǵıdaty barshaǵa ortaq, al ony elemeý tıisti zań aıasynda jaýapkershilikke ákelip soǵady. Birinshiden, "Qazaqfılm" jeriniń satylýy jónindegi aqparatqa qatysty. Bul másele tóńiregindegi negizsiz qaýeset birjola toqtatylýy tıis. "Qazaqfılmge" tıesili jerler kınostýdıa ıeliginde qala beredi. Jer satylǵan joq jáne tek kınematografıa múddesi úshin paıdalanylyp jatyr”, – dep jazdy Aıda Balaeva.
Ol kınostýdıany jóndeýge qomaqty qarjy salýǵa daıyn ınvestorlar jaıly aqparattyń rastalmaǵanyn atap ótti. Aıtýynsha, Mádenıet jáne aqparat mınıstrligi naqty ınvestorlarmen jumys isteýge daıyn bolǵanymen, ázirge eshqandaı naqty usynys, birde-bir kepildik haty joq. Barlyǵy tek áńgime deńgeıinde.
Mınıstr kınostýdıanyń Astanaǵa kóshý máselesine qatysty pikir bildirdi.
“Bul da eshqandaı negizi joq qaýeset. Qazirgi ýaqytta elordaǵa "Qazaqanımasıa" shyǵarmashylyq birlestigin kóshirý múmkindigi qarastyrylyp jatyr. Munda mańyzdy jaıt – "Qazaqanımasıa" óndiristik baza emes, anımasıalyq kontent jasaýǵa tapsyrystardy bóletin qurylym. Sondyqtan onyń Astanaǵa kóshýi salanyń jumysyna esh kedergi keltirmeıdi. Ókinishke qaraı, keıingi bes jylda elimizde sapaly anımasıalyq fılmder túsirilgen joq. Osyǵan baılanysty anımasıalyq ındýstrıany Kreatıvti ındýstrıalar qorynyń aıasynda damytý oryndy bolmaq. Qor qurylymynda anımasıany damytýǵa baǵyttalǵan kreatıvti hab jasaqtalyp jatyr”, – dedi Aqparat jáne qoǵamdyq damý mınıstri.
Aıda Balaevanyń aıtýynsha, Prezıdent qol qoıǵan jańa zańǵa sáıkes elimizde fılmderdi qarjylandyrýdyń jalpy kóleminiń keminde 30%-y jyl saıyn tikeleı "Qazaqfılmge" baǵyttalady.
