Jelide birneshe kún buryn Ay Yola mýzykalyq jobasynyń Homay kompozısıasy tarady. Án bashqurt tilinde aıtylǵan. Ol bir kúnde hıtke aınalyp, qazaqstandyqtar arasynda keńinen tanylyp jatyr.

Ay Yola tobynyń Homay áni 14 naýryzda shyqty. Ánniń sózin Dıana Kıldına jazǵan. Osy ýaqyt ishinde Ay Yola YouTube-arnasyndaǵy beınebaıan 930 myńnan astam qaralym jınaǵan. Sondaı-aq ánniń birinshi shýmaǵyn ǵana qamtıtyn myńdaǵan vıdeo ǵalamtorǵa tarap ketti.

“Ay Yola-nyń Homay áni eki kúnnen beri oıymnan keter emes. Ony qaıta-qaıta tyńdap júrmin. Ár joly mańyzdy nárseni sezinemin. Onyń ne ekenin naqty túsindire almaımyn. Biraq ol meniń genetıkalyq jadymdaǵy bir suraqqa jaýap bergendeı”, “Osy ándi tyńdasam qatty tolqımyn. Bashqurt nemese tatar emespin, qyrǵyzbyn, biraq bul án maǵan jaqynyraq sıaqty”, “Homay-dy qaıtalap tyńdap otyrmyn. Án arqyly tereń tarıhymyzdy eske túsiremin. Ata-babalarymyz basynan ótkergen kezeńderdi kóz aldyma elestetemin”, “Bashqurttardyń Ay Yola toby jazǵan Homay áni jelilerde keńinen tarap jatyr. Bul ataý bashqurttardyń "Oral-Batyr" eposynan shyqqan mıftik Homaı qusyna qatysty. Túrki halyqtarynyń mıfologıasynda Homaı qusy ("Hýmo") Umaı táńirimen baılanystyrylǵan sáttilik pen baqyt sımvoly. Endi bul trek túrki halyqtarynyń báriniń pleılıstinde bar", – dep jazdy jeli qoldanýshylary.