Reseı Federaldyq veterınarlyq jáne fıtosanıtarlyq qadaǵalaý qyzmeti (Rosselhoznadzor) Qazaqstannan bıdaı men jasymyq ákelýge qoıylǵan shekteýdi alyp tastaý týraly sheshim qabyldady. Sheshim 22 sáýirden bastap kúshine endi.

“2025 jyldyń 22 sáýirinen bastap Qazaqstan Respýblıkasynan Reseı Federasıasynyń aýmaǵyna karantınge jatqyzylǵan ónimderdi ákelýge qoıylǵan ýaqytsha shekteýler alynyp tastalady", - delingen Reseı Federaldyq veterınarlyq jáne fıtosanıtarlyq qadaǵalaý qyzmeti saıtynda jarıalanǵan habarlamada”. 

Vedomstvo Qazaqstannan Reseı Federasıasyna bıdaı, jasymyq, zyǵyr tuqymy jáne basqa da aýyl sharýashylyǵy ónimderin ımporttaýǵa shekteýlerdi 2024 jyldyń qazan aıynda engizgen edi. Qadaǵalaý qyzmeti ókilderi muny Qazaqstan birneshe jyl boıy jaramsyz fıtosanıtarlyq sertıfıkattar qoldanyp kelgenimen jáne Reseıge kóbinde buzylǵan ónimderdi tasymaldaýymen túsindirdi . QR Aýyl sharýashylyǵy mınıstrligi bul aıyptaýlardy joqqa shyǵardy. Astyq odaǵy bolsa bul jaıtty elder arasyndaǵy "saýda soǵysy bolýy múmkin" dep atady.

Qańtar aıynyń ortasynda Reseı Federaldyq veterınarlyq qadaǵalaý qyzmeti Qazaqstan Reseıge astyq ımporttaýǵa qoıylǵan shekteýlerdi buzyp jatqanyn habarlady. Vedomstvo ókilderi Qazaqstan taraby Reseı Federasıasyna buzylǵan bıdaı, zyǵyr tuqymdary men jasymyq eksporttaǵanyn málimdep, Qazaqstannyń Aýyl sharýashylyǵy mınıstrliginen "keshendi sharalar qabyldaý" talap etildi.