Almatyda Qazaqstan halqynyń birligi kúnine oraı erekshe formattaǵy neondyq «Birlik júgirisi» uıymdastyryldy. İs-sharaǵa túrli ult ókilderinen 100-den astam adam qatysyp, ol dostyqtyń, tatýlyqtyń jáne mádenı alýandyqtyń jarqyn kórinisine aınaldy.
Almaty qalasy Sport basqarmasynyń ókilderiniń málimetinshe, bıylǵy is-sharada zamanaýı formatqa basymdyq berilip, turǵyndardy buqaralyq sportqa keńinen tartý kózdelgen.
Júgirý keshki ýaqytta ótti: saǵat 21:00-de bastalyp, qatysýshylar neon jaryqtary, áýen jáne merekelik atmosfera aıasynda qashyqtyqty eńserdi. Qatysýshylar jaryq beretin aksesýarlar men túrli elementter taǵyp shyǵyp, zamanaýı qalalyq stıl qalyptastyrdy.
Mýzykalyq baǵdarlama da ártúrliligimen erekshelendi. Dıdjeı-sette álem mádenıetteriniń áýenderi úılesim taýyp, birlik rýhyn aıshyqtaı tústi. Qashyqtyq boıynda jankúıerlerdiń qoldaýy men júrgizýshiniń jigerlendirýi qatysýshylarǵa kúsh berip otyrdy.
Máre sáti erekshe este qaldy: barlyq qatysýshyǵa «1-oryn» medali tabystalyp, bul jarysta jeńilgen jan joq ekeni kórsetildi. Al shańyraq pishininde bezendirilgen tuǵyrnama ortaq úı – Qazaqstannyń sımvoly retinde usynylyp, ár adamnyń birtutas qoǵamnyń bólshegi ekenin beıneledi.
İs-shara baǵdarlamasy elektrodombyra únimen jáne jasandy ıntellekt elementteri qoldanylǵan mýltımedıalyq kórsetilimmen tolyqty. Bul dástúr men zamanaýı tehnologıalardyń úılesimdi toǵysqanyn kórsetti.
«Birlik júgirisi» tek sporttyq is-shara emes, adamdardy biriktiretin, ózara qurmet pen qoǵamdyq kelisimdi nyǵaıtatyn mańyzdy alań ekenin dáleldedi.
