Almatydaǵy komúnıtı ortalyqtarda «Jastar ysyrapshyldyqqa qarsy. Únem – Sana – Mádenıet» jobasy aıasynda jastarmen kezdesýler men pikir almasý jıyndary bastaldy. Bul týraly qalalyq Jastar saıasaty basqarmasynyń ókilderi habarlady.

Bastama jastar arasynda sanaly tutyný mádenıetin, resýrstarǵa janashyrlyqpen qaraýdy jáne qarjylyq jaýapkershilikti qalyptastyrýǵa baǵyttalǵan.

Joba aıasynda artyq shyǵyn, ataq-dańq úshin nesıe alý, áleýmettik jelilerdiń áseri, sondaı-aq sý, elektr qýaty, azyq-túlik pen ózge de resýrstardy tıimdi paıdalaný jaıy keńinen talqylanýda.

«Kezdesýler barysynda qatysýshylar kúndelikti ómirde kezdesetin máselelerdi ınteraktıvti formatta talqylap keledi. Atap aıtqanda, sý men elektr qýatyn únemdeý, qarjyǵa sanaly kózqaras qalyptastyrý, ataq-dańq úshin nesıe alýdan bas tartý jáne áleýmettik jelidegi «jurtqa kórsetý úshin ómir súrý» túsiniginen arylý máselesine erekshe nazar aýdarylyp otyr. Búgingi trenıń «Únem», «Sana» jáne «Mádenıet» atty úsh negizgi baǵytty qamtyǵan taqyryptyq kartochkalar negizinde ótti. Qatysýshylar ómirlik jaǵdaıattardy saralap, olardy sheshýdiń naqty ári tıimdi joldaryn usyndy», — dedi Almaty qalasy Jastar saıasatyn damytý memlekettik qory dırektorynyń mindetin atqarýshy, «QAMQOR CHARITY» qoǵamdyq qorynyń tóraıymy Baǵdat Anarbaeva.

Basqarma ókilderiniń aıtýynsha, búgingi tańda jastar sanasynda únemshildiktiń jaýapkershilik pen parasattylyqtyń, kemel kózqarastyń kórinisi ekenin ornyqtyrý asa mańyzdy.

Jastardyń pikirinshe, mundaı kezdesýler kúndelikti ómirdegi ádetterge jańasha kózqaraspen qaraýǵa, shyǵyn men tutyný mádenıetin qaıta saralaýǵa múmkindik beredi.

«Kóbinese aqshamyz ben resýrsymyzdyń qalaı jumsalyp jatqanyn ańǵara bermeımiz. Osyndaı kezdesýlerden keıin qarapaıym kúndelikti áreketterden bastap ózgertýge bolatynyn túsinesiń», — dedi qatysýshylardyń biri.

Komúnıtı ortalyqtardyń belsendi jastary chellendj estafetasyn joǵary oqý oryndary men kolejderge joldady. Igi bastama aldaǵy ýaqytta Almatydaǵy oqý oryndary men jastar ortalyqtarynda jalǵasady.