Shyndyqty shyryldap turyp aıtar bolsaq, elimizdegi tele arnalardy "ánshiler elesi" kezip júr. Olaı deıtinimiz, sahna juldyzy bolǵanymen, efır juldyzyna aınala almaıtyn ánshiler á degennen "júzden júırik, myńnan tulpar" bola almady. Qatty aıtsam, keshirersizder, munyń ózi-" ıt joqta shoshqa úrediniń" keri bolyp tur. Sózdiń ózin "sorpalatyp jiberetin " ánshiler men ártister qaı baǵdarlamanyń reıtingisin jalaýlatyp kóterip áketti? Bir mezgil kók jáshikke telmirip, tebirenip tyńdaıtyn ne qaldy búginde? Besikten beli shyqpaı jatyp, "juldyz" bola qalǵysy keletin jastar jaýlap aldy bul ekrandy. Iá, oǵan daý bar ma, jastar baǵdarlamalary, tok shoýlar kerek te shyǵar, biraq "boıaýshy, boıaýshy degenge saqalyn da boıap jberipti" degendeı, telaarna keńistigin tek jastarǵa arnaı salý ádiletsizdik qoı! Ekiniń bir "ánshi". Sol shirkinder ekrannan ózderin kórip otyryp, daýystarynyń joqtyǵyna, án mátinderiniń sapasyz ekenin bilip, maǵynasyna kelsek, jastar tilimen aıtqanda, "qýyp" ketkenderine uıalmaıdy ma eken? "Shirkin-aı..." deısiń osyndaıda, baıaǵy Saǵat Áshimbaev, Beıbit Qusanbaevtar júrgizgen baǵdarlamalar qaıda? Mán-maǵynasy joq, áıteýir reıtıń jınaý maqsatynda kórsetilip jatqan múgedek jobalar.Esesine áleýmettik jelilerde, ásirese "feısbýkte" ótkir oılar, zymyrannan da ushqyr jazbalar kóp.Nege deımiz taǵy da, nege bizdiń telearnalarda Jırınovskıılerdiń aýzyna qum quıatyndaı baǵdarlamalar joq...Aıtpaqshy, telearnalardan "KVN" ázilkeshteri túspeıtin boldy. Olarda da bet joq eken. Uıalmaıdy. Kúldire almaıtyndaryna. Salmaqty satırany túsinbeıtinderine. Aýzyna kelgenderin laq etkize salady. Olarynan jıirkenbeıdi de. sahnada turyp alyp aıqaılaıdy kelip. Kórermender shetterinen kereńder sıaqty. Alǵashqy kezde osy "KVN" degenińiz qyzyqtaý bolǵany ras. Qazir "buzyqtaý" bolyp barady. Kórgensiz bolyp. Sonda deımin-aý, telearna basshylary qandaı "tárbıesi" úshin qyzyǵa qaldy eken? "Jylaıyn desem, kózimnen jas shyqpaıdy, ótirik jylaıyn desem, jurt senbeıdi" demekshi, qazirgi tele arnalardan baıypty, salmaqty, oı salyp, kóńil kókjıegińdi keńeıtetin baǵdarlamalardy ıtpen izdep taba almaısyń. Itińniń ózi izdeýden bas tartardaı... Aıtyńdarshy aǵaıyn, endi ne isteımiz, a?