Olımpıada jáne Azıa oıyndarynyń qola júldegeri, búginde kásipqoı boksta elimizdiń namysyn abyroımen qorǵap júrgen Qanat Islam aqpan aıynyń qorytyndysy boıynsha WBA tujyrymynyń  reıtinginde on ekinshi orynda keledi.  Qanattyń jalpy kásipqoı boksqa aýysqanyna bir jyldyń tóńiregi boldy. Al, oǵan deıin biz onyń WSB serıasynda el namysyn qorǵaıtyn «Astana arlandary» komandasynda bir jyldaı sátti óner kórsetkenin bilemiz. Degenmen, 2012 jylǵy London Olımpıasyna Qazaqstan atynan bara almaǵan soń, Qanat birjolata kásipqoı boksqa ótti. Búginde otbasymen birge muhıttyń arǵy jaǵyndaǵy Qurama shtattardyń Maıamı qalasynda turyp jatqan Qanat kásipqoı boks sharshy alańyna 16 márte shyqty. Jáne sol 16 kezdesýiniń barlyǵynda  qarsylastaryn jeńip shyqqan. Al, 2012 jyldyń jeltoqsan aıynda Islam birinshi orta salmaqtaǵy WBA Fedecaribe chempıondyq ataǵyn jeńip aldy. Endi WBA tujyrymynyń  reıtıńinde toqtalaıyq. Orta salmaqtyń sýper chempıony  ataǵy áli de Floıd Maıýeızerdiń enshisinde. Al, bul tujyrym boıynsha álem chempıony degen ataq ázirshe bos tur. Tizilgen tizim boıynsha birinshi orynda kýbalyq bylǵary qolǵap sheberi Erıslandı Lara keledi. Ekinshi orynda Mıgel Kotto bolsa, úshinshi orynda Saýl Alvares tur. Bizdiń otandasymyz Qanata Islam bul tizimde on ekinshi orynda eken. WBA tujyrymynda chempıondyq attaqqa talasý úshin kem degende 20 kezdesý ótkizip, sol kezdesýlerdiń barlyǵynda mereıi ústem bolǵan boksshy ǵana chempıondyq ataqqa talasa alady. Demek, Qanat endi tórt kezdesýinde jeńiske jetse, bul tujyrymdaǵy qarymdy boksshylarmen judyryqtasýyna jol ashylady degen sóz. «Alash aınasy»

Nurǵısa ELEÝBEKOV (foto)

Avtor: Ýalıhan Qosanbaı