رەسەي قازاقستاننان جالعا الىپ وتىرعان 500 مىڭ گەكتاردان استام جەر ۋچاسكەلەرىن قايتارادى جانە تولەمدى 1 ملن. 373 مىڭ دوللارعا قىسقارتادى، - دەپ حابارلايدى «قامشى» پورتالى قازاقپاراتقا سىلتەمە جاساپ.

بۇل تۋرالى بۇگىن پارلامەنت سەناتىنىڭ جالپى وتىرىسىندا ق ر قورعانىس ءمينيسترىنىڭ ورىنباسارى، گەنەرال-لەيتەنانت وقاس ساپاروۆ مالىمدەگەن.

ەسكە سالايىق، پارلامەنت سەناتى «1995 جىلعى 20 قاڭتارداعى قازاقستان رەسپۋبليكاسى مەن رەسەي فەدەراسياسى اراسىنداعى رەسەي فەدەراسياسى قورعانىس مينيسترلىگىنiڭ (وبەكتiلەرى مەن ۇرىس الاڭدارى قازاقستان رەسپۋبليكاسىنىڭ اۋماعىندا ورنالاسقان) 929 مەملەكەتتىك ۇشۋ-سىناق ورتالىعىن پايدالانۋ ءتارتىبى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاسيالاۋ تۋرالى» ق ر زاڭى قابىلدانعان بولاتىن.

حاتتامالارعا 2015 جىلعى 16 ساۋىردە ماسكەۋدە قول قويىلعان. مينيستر ورىنباسارىنىڭ ايتۋىنشا، «حاتتاما بويىنشا اتىراۋ جانە باتىس قازاقستان وبلىستارىنىڭ اۋماعىنداعى جالپى الاڭى 500 مىڭ گەكتاردان استام پوليگون ۋچاسكەلەرى جالداۋدان شىعارىلادى. ايتا كەتۋ كەرەك، رەسەي تاراپىنا ناقتى قاجەتتى ولشەمدى انىقتاۋ مەن اسكەري پوليگوندار الاڭىن قايتا قاراۋ تۋرالى تاپسىرمانى ەلباسى جۇكتەگەن. سونىمەن قاتار، جالعا الىنىپ وتىرعان جەردى قايتارۋ تۋرالى باستامانى مۇددەلى مينيسترلىكتەر دە، ءتيىستى وبلىس اكىمدىكتەرى دە كوتەرگەن بولاتىن»، دەدى و. ساپاروۆ. ونىڭ ايتۋىنشا، جالعا بەرىلۋدەن شىعارىلاتىن ۋچاسكەلەردە پايدالى قازبالاردى ءوندىرۋ بويىنشا جوبالار ىسكە اسىرىلادى. ماسەلەن، اتىراۋ وبلىسىنداعى «تايسويعان» ۋچاسكەسىندە ۋاز جانە قوندىباي كەن ورىندارىندا كومىرسۋتەكتى وڭدەۋ، سونداي-اق باتىس قازاقستان وبلىسىنىڭ «جامانتاۋ» ۋچاسكەسىندە قيىرشىق تاستى ءوندىرۋ جوبالارى جۇزەگە اسىرىلادى.

ودان باسقا، اتىراۋ وبلىسىنىڭ اقجار كەنتىندە تۇرعىن قۇرىلىستاردى تىركەۋ جۇرگىزىلەدى. وسىلايشا، حاتتامانى راتيفيكاسيالاۋ قازاقستاننىڭ ەكونوميكالىق دامۋىنا وڭ ىقپال ەتەتىن بولادى.