مەملەكەتتىك قىزمەتكەرلەردىڭ اداممەن ءتىل تابىسۋى جانە ازاماتتارعا كورسەتكەن قىزمەت ساپاسى ءجىتى قاداعالاناتىن بولادى، - دەپ حابارلايدى «قامشى» پورتالى قازاقپاراتقا سىلتەمە جاساپ.

بۇل تۋرالى بۇگىن ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ق ر مەملەكەتتىك قىزمەت ىستەرى مينيسترلىگى مەملەكەتتىك قىزمەت دەپارتامەنتىنىڭ ديرەكتورى ءالي كومەكبايەۆ مالىمدەگەن.

ونىڭ سوزىنە قاراعاندا، قازاقستاندا 90 مىڭنان استام مەملەكەتتىك قىزمەتكەر بار. ەندى ولاردىڭ ءارقايسىسى جىل بويى جانە جىل سوڭىندا باعالاۋدان ءوتىپ وتىرادى. مەملەكەتتىك قىزمەتكەرلەردى ءبىر ورگان نەمەسە ءبىر تۇلعا ەمەس، باسشىلىعى، ارىپتەستەرى جانە قول استىنداعى قىزمەتكەرلەرى دە باعالاپ وتىرادى. وندا مەملەكەتتىك قىزمەتكەردىڭ ازاماتتارمەن جۇمىس ىستەۋى عانا ەمەس، ەتيكالىق ءجۇرىس-تۇرىسى دا ەسكەرىلەدى.

سونىمەن قاتار مەملەكەتتىك ورگاننىڭ ستراتەگيالىق ماقساتتارىن ورىنداۋعا باعىتتالعان ءاربىر مەملەكەتتىك قىزمەتكەردىڭ جەكە جۇمىس جوسپارىنىڭ ورىندالۋى دا قارالادى.

«ءاربىر قىزمەتكەردىڭ ءاربىر قيمىلى ءجىتى باقىلانادى دەسە دە بولادى. باقىلاۋ ناتيجەسى قىزمەتكەردى ىنتالاندىرۋعا، وعان بونۋس تولەۋگە، ونىڭ دامۋى مەن وقىتىلۋىنا جانە باسقا دا باسقارۋ شەشىمدەرىنە اسەر ەتەدى»، - دەدى ول.

ەسكە سالا كەتەيىك، 2016 جىلدىڭ 1 قاڭتارىنان باستاپ، «ق ر مەملەكەتتىك قىزمەت تۋرالى» جاڭا زاڭ كۇشىنە ەندى.