«نۇر وتان» پارتياسى الماتى قالالىق فيليالى جانىنداعى سىبايلاس جەمقورلىققا قارسى كۇرەس جونىندەگى قوعامدىق كەڭەس الماتىدا جالدامالى تۇرعىن ءۇي قۇرىلىسى بارىسىندا ءبىرقاتار زاڭ بۇزۋشىلىق ارەكەتتەردىڭ ورىن العاندىعىن انىقتادى، - دەپ حابارلايدى «قامشى» پورتالى قازاقپاراتقا سىلتەمە جاساپ.

وندا كۇن تارتىبىنە ۇلتتىق قور تاراپىنان «جالدامالى تۇرعىن ءۇي» باعدارلاماسى بويىنشا بولىنگەن قارجىنىڭ جۇمسالۋىن تەكسەرۋ ماسەلەسى قويىلدى. 

كەڭەس مۇشەسى بوريس جاپاروۆ وتكەن جىلدىڭ سوڭىندا وتكىزىلگەن وتىرىستاردىڭ بىرىندە جۇمىس توبىنىڭ «جالدامالى تۇرعىن ءۇي» باعدارلاماسى بويىنشا بولىنگەن قاراجاتتىڭ جۇمسالۋ تيىمدىلىگىن تەكسەرۋ بويىنشا قورىتىندى ەسەبى تىڭدالعاندىعىن ەسكە سالدى.  سوندا ءبىرقاتار قۇرىلىس كومپانيالارى جۇمىس توبىنىڭ تۇجىرىمىمەن كەلىسپەگەن ەكەن. 

«شاعىمدانۋشىلاردىڭ تالابى بويىنشا كەلەسى كۇنى ءماسليحات دەپۋتاتتارى مەملەكەتتىك ورگانداردىڭ وكىلدەرىمەن بىرگە، جاڭادان سالىنىپ جاتقان «جاس قانات» ىقشام اۋدانىنىڭ اۋماعىنا باردى.

سوندا قۇجاتتارىنا قول قويىلىپ، پايدالانۋعا بەرۋگە دايىن ۇيلەردى قايتا تەكسەرۋ بارىسىندا قۇرىلىس-قۇراستىرۋ جانە ارلەۋ جۇمىستارى بارىسىندا ودان دا كوپ باسسىزدىق ارەكەتتەردىڭ بولعاندىعى اشكەرەلەندى. ودان باسقا، قۇرىلىستا زاڭسىز جۇمىسشىلاردىڭ ىستەپ جۇرگەندىگى جانە قاۋىپسىزدىك تەحنيكاسىنىڭ ساقتالا بەرمەيتىندىگى انىقتالدى»، - دەدى ب. جاپاروۆ. 

ول سونداي-اق، سالۋشى كومپانيالاردىڭ سالىنىپ جاتقان تۇرعىن ۇيلەردىڭ سمەتالىق قۇنىنىڭ تومەن ەكەندىگىن ايتىپ شاعىمدانعانىن دا ايتتى.

«ولاردى تەندەرگە قاتىسۋعا ەشكىم ماجبۇرلەگەن جوق. بۇل حالىقتىڭ اقشاسى عوي. سوندىقتان، قابىرعالارى قيسىق، سىلاعى جارىلىپ كەتكەن پاتەرلەردى قابىلداۋعا بولمايدى»، - دەدى ول.

الماتى قالالىق قۇرىلىس باسقارماسىنىڭ وكىلى ازامات راحيموۆ وتكەن جىلى الماتىدا «نۇرلى جول» باعدارلاماسى بويىنشا 15 تۇرعىن ءۇيدىڭ پايدالانۋعا بەرىلگەندىگىن جانە بيىل تاعى 13 تۇرعىن ءۇيدى پايدالانۋعا بەرۋ جوسپارلانعاندىعىن ايتتى. ال اتالعان كەمشىلىكتەردىڭ كوكتەمگە قاراي تۇزەتىلەتىندىگىنە ۋادە بەردى. 

«ماعان قۇرىلىس باسقارماسىنىڭ ۇستانىمى تۇسىنىكسىز. نەگە دەر كەزىندە شارا قولدانىلمادى؟ مۇنداي ۇيلەردى قالاي قابىلداۋعا بولادى؟ قوعامدىق كەڭەستىڭ مۇشەلەرى قۇرىلىس كومپانيالارىن تاڭداۋ شاراسىنا وتە جاۋاپكەرشىلىكپەن قاراۋلارى ءتيىس. بۇدان بىلاي دا كەڭەس مۇشەلەرى قۇرىلىس جۇمىستارى بارىسىن قاتاڭ باقىلاۋعا الىپ، وسى باعىتتا بيلىكپەن تىعىز جۇمىس اتقاراتىن بولادى»، - دەدى قوعامدىق كەڭەس ءتوراعاسى راحمان الشانوۆ.