جۇڭگو سەكىلدى جان سانى كوپ ەلدە قوعام تىنىشتىعىن ساقتاپ، ساقشى (پوليسيا) بولىپ قىزمەت ەتۋ ۇلكەن جاۋاپكەرشىلىكتى قاجەت ەتەدى. وسىنداي تالابى جوعارى، قاۋىپ-قاتەرى مول قىزمەتتى ارقالاپ جۇرگەندەردىڭ قاتارىندا قارا كوز قازاق قىزى تاسليما دا بار، - دەپ حابارلايدى «قامشى» پورتالى "سۇراق-جاۋاپ" سايتىنا سىلتەمە جاساپ.

تاسليما داۋلەت قىزى 2010 جىلى ارنايى ەمتيحاننان ءوتىپ، شىڭجاڭ قوعام قاۋىپسىزدىك مەكەمەسى ەرەكشە ساقشى باس بولىمشەسىنە قابىلدانادى.

وندا جاپا-ماشاقاتقا تولى 3 جىلدىق جۇمىستى ساتىمەن اياقتاپ، 2013 جىلى ءۇرىمجى قالالىق قوعام قاۋىپسىزدىك دەپارتامەنتى سايباق رايونىنا قاراستى حوتان كوشەسىندە الەۋمەتتىك حالىق ساقشىسى قىزمەتىنە اۋىسادى. قازىرگى كۇنى سوندا ەڭبەك ەتىپ ءجۇر.

جاقىندا «جۇڭگو قازاق راديو تورابى» تاسليمامەن ارنايى سۇحبات جاسادى. ويتكەنى، پوليسيا قىزدىڭ قۋانىشتى جاڭالىعى بار. بيىلعى جىل باستالا سالا، جۇڭگو ەلى 13 قىسقى سپورت جارىسىن وتكىزگەنى بەلگىلى. 4 جىلدا ءبىر بولاتىن وسى اۋقىمدى سپورت دوداسى تۇڭعىش رەت شىڭجاڭدا، ونىڭ ىشىندە ءۇرىمجى قالاسىندا بولدى.

مىنە، 15 كۇنگە سوزىلعان مەملەكەتتىك دەڭگەيدەگى ۇلكەن اۋقىمدى شارادا قاۋىپسىزدىكتى قامتاماسىز ەتۋ ءۇشىن، تىكەسىنەن تىك تۇرىپ قىزمەت ەتكەن پوليسيا وكىلدەرىنىڭ ەڭبەگى وراسان. ال ولاردىڭ قاتارىنان وزا شىعىپ، اتقارعان قىزمەتىمەن كوزگە ءتۇسۋ ودان دا ابىرويلى.

سول ابىرويلى مىندەتتى ويداعىداي ورىنداپ، شىنايى، ادال ەڭبەگى باسشىلىق تاراپىنان جوعارى باعالانعان ۇزدىك پوليسيا — تاسليما داۋلەت قىزى. ءۇرىمجى قالالىق قوعام قاۋىپسىزدىك دەپارتامەنتى ونى «قوعام اماندىعىن قورعاۋداعى ۇزدىك پوليسيا قىزمەتكەرى» اتاعىمەن ماراپاتتادى.

بۇل تاسليمانىڭ العاشقى تابىسى ەمەس. قۇقىق قورعاۋ مەكەمەسىندە جۇمىس اتقارىپ كەلە جاتقان التى جىلدان بەرى قاراپايىم حالىقتىڭ القاۋىنا بولەنىپ، ۇجىمنىڭ ماقتانىشى، ءوز ءىسىنىڭ كاسىبي مامانى بولعان قانداسىمىز تالاي رەت سىيلانىپ، قاتتى ەڭبەگىنىڭ ءتاتتى جەمىسىن تاتىپ كەلە جاتىر.