وتكەن ايدا عانا جەرگىلىكتى قىزدار كومانداسى اۆستريادا وتكەن الەم چەمپيوناتىنان قولا جۇلدەمەن ورالدى. ءسويتىپ، الەمدىك ۇزدىكتەردىڭ ورتاسىنان ويىپ تۇرىپ ورىن العان سپورتشىلارىمىز ءوز شەبەرلىكتەرىنىڭ ەشكىمنەن كەم تۇسپەيتىندىگىن كورسەتتى، - دەپ حابارلايدى «قامشى» پورتالى 24 kz-كە سىلتەمە جاساپ.

قىزدار تەك ءان ايتىپ، بي بيلەپ، ءارى كەتسە كوركەم گيمناستيكامەن اينالىسۋ كەرەك دەگەن قاعيدا جوق. اۆسترياداعى الەم چەمپيوناتىنان ءۇشىنشى ورىن الىپ ورالعان وسكەمەندىك حوككەيشى بويجەتكەندەر وسىنى دالەلدەدى.

"ءبىزدىڭ ماقساتىمىز جەڭىس بولاتىن. دەگەنمەن ءۇشىنشى ورىنعا ىلىگەمىز دەپ ويلاماعان ەدىك"،- دەدى «ۋستينكا» كومانداسىنىڭ كاپيتانى الەكساندرا كوكورينا.

"بۇل تاريحي وقيعا دەپ ايتۋعا بولادى. تۇڭعىش رەت قازاقتىڭ حوككەيشى قىزدارى وسىنداي قولا مەدال الىپ وتىر. قىزدارىمىز ءبىزدىڭ حوككەيدى تاعى ءبىر جوعارعى دەڭگەيدە كوتەردى دەپ ايتا الامىن"، دەدى وبلىستىق سپورت جانە دەنە شىنىقتىرۋ باسقارماسىنىڭ جەتەكشىسى ەلدوس چيكەنوۆ.

حوككەيدەن قىزدار كومانداسىنىڭ ىرگەتاسى وسكەمەندە قالانعان دەسە دە بولادى. وڭىردە قىزداردى بۇل سپورت تۇرىنە كىشكەنە كەزدەن باستاپ باۋلۋ ادەتكە اينالعان. ماسەلەن پولينا گالكينانى اكەسى 6 جاسىنان باستاپ حوككەي سپورتىنا بەرىپتى. ال ديانا موسكۆينا بولسا 5 جاسىنان بۇل سپورت تۇرىمەن اۋەستەنە باستاعان.

"قاقپاشى بارلىق كوماندانى قۇتقارا الادى. ويىنشىلاردىڭ ءمۇلت كەتەتىن كەزدەرى از ەمەس. اسىرەسە قورعاۋشىلاردىڭ ءالى جەتپەي جاتقان كەزدە ءبىزدىڭ جاۋاپكەرشىلىگىمىز ارتا تۇسەدى"، دەيدى قاقپاشى ديانا موسكۆينا.

حوككەي سپورتى قاتال دا قيىن. ويىنشىلار ەپتى دە كورەگەن بولۋى قاجەت. ءتىپتى سالماعى 10 كەلىدەن اسىپ كەتەتىن حوككەيشىلەر كيىمىن كوتەرىپ ءجۇرۋدىڭ ءوزى قىزداردان ۇلكەن تاباندىلىقتى تالاپ ەتەدى. الايدا جەڭىس تۇعىرىنا كوتەرىلگەندە وسى قيىندىقتىڭ ءبارى اپ-ساتتە ۇمىتىلادى. جاتتىقتىرۋشىلاردىڭ ايتۋىنشا، اۆسترياداعى جەڭىس حوككەيشى بويجەتكەندەردىڭ قايراتىن شىڭداپ،ماقساتتارىن ايقىندادى. سونداي-اق بۇلدىرشىندەردىڭ وسى سپورت تۇرىنە دەگەن قىزىعۋشىلىعىن ارتتىرا ءتۇستى.