استانادا جەزوكشەلەردى بوپسالاپ كەلگەن پوليسيا قىزمەتكەرلەرىنە سوت ۇكىمى شىقتى، - دەپ حابارلايدى «قامشى» پورتالى.

استانا قالاسى سارىارقا اۋداندىق №2 سوتىندا ءۇش بىردەي بۇرىنعى پوليسيا قىزمەتكەرلەرىنە قاتىستى سوت پروسەسى اياقتالدى. ولار قىلمىستىق كودەكستىڭ 366-بابى 3ء-بولىمى 1،2 تارماقتارى – «مەملەكەتتىك قىزمەت اتقارۋعا وكىلەتتىگى بار تۇلعانىڭ الدىن الا كەلىسىم بويىنشا بوپسالاۋ جولىمەن پارا بەرۋشىنىڭ پايداسىنا ارەكەت ەتۋ (ارەكەتسىزدىك) جانە قامقورلىق جاساعانى ءۇشىن پارا الۋ» بويىنشا كىنالى دەپ تانىلدى.

«سوتتا سوتتالۋشىلاردىڭ پوليسيا قىزمەتكەرلەرى بولا تۇرا جەوزكشەلەردەن بوپسالاۋ جولىمەن اقشا الىپ كەلگەنى انىقتالدى»، - دەلىنگەن سوت تاراتقان حابارلامادا.

ەكس-پوليسەيلەرگە سوت پارا سوماسىنىڭ 70 ەسەلەنگەن كورسەتكىشى بويىنشا ايىپ پۇل سالۋ جانە مۇلكىن تاركىلەۋ جازاسىن كەستى. سونداي-اق، ولار پوليسيا ستارشيناسى جانە پوليسيا لەيتەنانتى ارنايى شەندەرىنەن جانە مەملەكەتتىك قىزمەتكە ورنالاسۋ قۇقىنان ايرىلدى. ولار سوت بەلگىلەگەن ايىپپۇلدى ءبىر اي مەرزىم ىشىندە مەملەكەتكە تولەۋلەرى ءتيىس.