قازاق ايتىسىنىڭ قارا نارى، اقىن، قوعام قايراتكەرى ءجۇرسىن ەرمان بۇگىن 65 جاسقا تولىپ وتىر، - دەپ حابارلايدى «قامشى» پورتالى.

ەلىمىزدە اقىندار ايتىسىن ناسيحاتتاۋعا، تالانتتى ايتىس اقىندارىن قولداۋعا ۇلەس قوسىپ جۇرگەن ءجۇرسىن ەرمان بۇگىن 65 جاسقا تولىپ وتىر. ءجۇرسىن ەرماننىڭ ۇيىمداستىرۋىمەن وتكەن جىلى جەلتوقسان ايىندا الماتى قالاسىندا تاۋەلسىزدىك كۇنىنە ارنالعان «تاۋەلسىزدىك تولعاۋى» رەسپۋبليكالىق اقىندار ايتىسى ءوتىپ، باس جۇلدە «التىن دومبىرانى» كەرەكۋلىك اقىن اسپانبەك شۇعاتايەۆ يەلەنگەن بولاتىن.

ايتىس ونەرى – قازاقتىڭ جالپى حالىقتىق دەڭگەيدەگى، كارى-جاس دەمەي، كۇن-تۇن دەمەي كورەتىن ونەر ءتۇرى. ونىڭ قاسيەت-قادىرى بىزگە دۋالى اۋىز قاريالاردان دارىدى. ال، بۇگىنگىنىڭ قارياسى كىم؟ ايتىستىڭ بۇگىنگى جاناشىرى كىم؟ ول ارينە، ءجۇرسىن ەرمان. ءجۇرسىن اعامىز جايلى ءبىر اۋىز سوزبەن ايتا سالۋ قيىننىڭ-قيىنى. ول كىسى تۋرالى نەگە ءسوز قوزعادى دەپ وتىرسىزدار عوي؟! بۇگىن سول اسىل اعامىزدىڭ تۋعان كۇنى. ءجۇرسىن اعا، تۋعان كۇنىڭىز قۇتتى بولسىن! ونەرگە، ايتىسقا، پوەزياعا قالدىرعان قولتاڭباڭىزدى قازاق ەشقاشان ۇمىتپايدى. امان بولىڭىز! دەنىڭىز ساۋ بولسىن! ءار باستاعان ءىسىڭىزدىڭ قاسىنان بىزدەر تابىلىپ جۇرە بەرەيىك!

ۇلت ءۇشىن، ايتىس ءۇشىن تىنشىماعان،

ولەڭ بوپ ورىلسەكەن ءبۇل سىباعام.

ايتىس ءۇشىن بوپ ءجۇرسىڭ الا شاپقىن،

تىرىڭدە قادىرىڭدى ءبىلسىن ادام!

ءوزىڭدى شاتىعىڭ مەن قۇتتىقتايمىن،

امان بول، اينالايىن، ءجۇرسىن اعام!

اقىن 1951 جىلى بۇرىنعى جەزقازعان وبلىسى جەزدى اۋدانىنىڭ بايقوڭىر اۋىلىندا دۇنيەگە كەلگەن بولاتىن. 1976 جىلى قازاق مەملەكەتتىك ۋنيۆەرسيتەتىن ءتامامداعان ول ءار جىلدارى ايماقتىق، رەسپۋبليكالىق اقپارات قۇرالدارىندا قىزمەت ەتتى. 100-دەن استام ماقالا مەن «جانارتاۋ» (1983)، «ارايلى كۇن، ارمىسىڭ» (1985)، «ۇلىتاۋعا باردىڭ با؟» (1989)، «قۇدىرەتكە جۇگىنۋ» (2004)، «ەكى تىزگىن، ءبىر شىلبىر» (2006)، «قۇستىڭ كولەڭكەسى» سىندى ەڭبەكتەردىڭ اۆتورى.  

ەرلان تولەۋباي