قازاقستاندا قۇراستىرىلاتىن «نيۆا» اۆتوكولىكتەرىنە بىرىككەن اراب امىرلىكتەرىنەن سۇرانىس ارتقان، - دەپ حابارلايدى «قامشى» پورتالى ۇلتتىق «اتامەكەن» كاسىپكەرلەر پالاتاسىنا سىلتەمە جاساپ.
قازاقستاندىق كولىكتى بىرىككەن اراب امىرلىكتەرىنە شىعارۋ تۋرالى ۇسىنىستى پالاتاعا «بيپەك اۆتو قازاقستان» ج ش س اقتاۋ فيليالى جاساعان. بۇعان دەيىن تاۋاردىڭ شىعارىلعان جەرى تۋرالى سەرتيفيكاسيادان تۋىنداعان پروبلەمالاردىڭ سالدارىنان بىرىككەن اراب امىرلىكتەرىنە وسكەمەندىك اۆتوكولىكتەردى ەكسپورتتاۋ مۇمكىن بولماعان. ماڭعىستاۋ وبلىسى كاسىپكەرلەر پالاتاسىنىڭ اتالعان تۇيتكىلدى شەشىپ، وتاندىق كولىكتىڭ ەكسپورت ماسەلەسىن شەشكەن كورىنەدى.
«ءبىزدىڭ شەتەلدىك سەرىكتەسىمىز كەلەسى اۆتوكولىك توپتاماسىن ساتىپ الۋعا قىزىعۋشىلىق تانىتتى. بۇل جەتكىزىلىم تۋرالى ءسوز قوزعاعاندا ءبىرقاتار ۇيىمداستىرۋشىلىق ماسەلەلەردىڭ باسىن اشۋدا قول ۇشىن سوزعان ماڭعىستاۋ وبلىسى كاسىپكەرلەر پالاتاسىنىڭ اتقارعان ماڭىزدى ءرولىن ايتا كەتۋ كەرەك. بۇل ءبىز ءۇشىن، ءسوزسىز، بىرەگەي تاجىريبە بولماق. بىرىككەن اراب امىرلىكتەرىنىڭ نارىعىنا شىعۋ ءبىزدىڭ جوسپارىمىزدا بار بولاتىن، ەندى مىنە، ول جاققا اۆتوكولىكتەردى جەتكىزۋ ءبىرىنشى رەت ءساتتى جۇزەگە استى»، – دەدى «بيپەك اۆتو قازاقستان» ج ش س اقتاۋ فيليالىنىڭ ديرەكتورى اسقار بۇلانبايەۆ.
العاش رەت «بيپەك اۆتو» اقتاۋداعى فيليالى ءوز اۆتوكولىكتەرى توپتاماسىن تۇركىمەنستاننىڭ وڭتۇستىگىندەگى مارى قالاسىنا جونەلتكەن بولاتىن. «نيۆا» اۆتوكولىكتەرىن ساتىپ الۋشىلار تابىلىپ جاتقانىن ايتا كەتۋ كەرەك. ودان كەيىن اقتاۋعا اراب امىرلىكتەرىنەن دە ساتىپ الۋشىلار كەلە باستاعان. «بيپەك اۆتو – ازيا اۆتو» كومپانيالارى توبىنىڭ الدىندا قازاقستان مەن رەسەي اۋماعىنداعى فيليالدىق جەلىنى دامىتۋ تاجىريبەسىنە سۇيەنە وتىرىپ موڭعوليا، قىرعىزستان، وزبەكستان، تۇركىمەنستان جانە تاجىكستاندا بۇدان كەم تۇسپەيتىن جوعارى دەڭگەيدەگى ريتەيل ۇيىمداستىرۋ مىندەتى تۇر.
پىكىر قالدىرۋ