وسى اپتادا ەلىمىزدە بىرەن-ساران كادرلىق ءاۋىس-تۇيىس ورىن الدى. ماسەلەن، وسى ۋاقىتقا دەيىن «سامۇرىق-قازىنا» جىلجىمايتىن مۇلىك قورى» اق باسقارما ءتوراعاسى قىزمەتىن اتقارعان ب.پالىمبەتوۆ ەلباسى وكىمىمەن جاڭا قىزمەتكە تاعايىندالدى. «قامشى» پورتالى قازاقپارات اپتا ىشىندەگى وزگە دە تاعايىنداۋلارعا جاساعان شولۋدى نازارلارىڭىزعا ۇسىنادى.

مەملەكەت باسشىسى نۇرسۇلتان نازاربايەۆتىڭ وكىمىمەن بولات ءابىلقاسىم ۇلى پالىمبەتوۆ قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل قىزمەتىنە تاعايىندالدى. ب.پالىمبەتوۆ 1961 جىلى 28 شىلدەدە قىزىلوردا وبلىسىنىڭ شيەلى اۋدانىندا تۋعان. قازاق پوليتەحنيكا ينستيتۋتىن، ەۋرازيا نارىق ينستيتۋتىن بىتىرگەن. 1999-2001 جىلدارى - اتىراۋ وبلىسى اكىمىنىڭ ورىنباسارى. 2001-2002 جىلدارى - قازاقستان رەسپۋبليكاسى ەكونوميكا جانە ساۋدا ۆيسە-مينيسترى، «قازترانسويل» جاق باس ديرەكتورىنىڭ ورىنباسارى، باس ديرەكتورى، «مۇناي جانە گاز تاسىمالداۋ» ۇلتتىق كومپانياسى» جاق باس ديرەكتورىنىڭ ءبىرىنشى ورىنباسارى. 2002-2006 جىلدارى - ماڭعىستاۋ وبلىسىنىڭ اكىمى. 2006 جىلى - قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ ۆيسە-مينيسترى. 2007 جىلى - «مەركۋريي» اق ديرەكتورلار كەڭەسىنىڭ ءتوراعاسى. 2007-2010 جىلدارى - «كاسپيي» الەۋمەتتىك-كاسىپكەرلىك كورپوراسياسى» ۇلتتىق كومپانياسى» اق-ىنىڭ باسقارما ءتوراعاسى. 2010-2011 جىلدارى - «قازمۇنايگاز» ۇلتتىق كومپانياسى» اق باسقارما ءتوراعاسىنىڭ ورىنباسارى - باسقارۋشى ديرەكتورى. «سامۇرىق-قازىنا» جىلجىمايتىن مۇلىك قورى» اق باسقارما ءتوراعاسى بولعان، ەكونوميكا عىلىمىنىڭ كانديداتى. «قۇرمەت»، 3-دارەجەلى «ەرەن ەڭبەگى ءۇشىن» وردەندەرىمەن ماراپاتتالعان.

ق ر ۇلتتىق ەكونوميكا مينيسترلىگىندە «مەملەكەتتىك قىزمەت تۋرالى» زاڭىنا سايكەس ادەپ جونىندەگى ۋاكىل بولىپ زاڭ دەپارتامەنتىنىڭ ديرەكتورى داۋرەن مۇراتبەكوۆ تاعايىندالدى. داۋرەن مۇراتبەكوۆ  ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىن حالىقارالىق زاڭگەر ماماندىعى بويىنشا جانە ا.مىرزاحمەتوۆ اتىنداعى كوكشەتاۋ ۋنيۆەرسيتەتىن قارجى باكالاۆرى مامانداعى بويىنشا  بىتىرگەن. ەڭبەك جولىن ق ر ەكونوميكا جانە بيۋدجەتتىك جوسپارلاۋ مينيسترلىگىندە ساراپشى لاۋازىمىنان باستاپ، زاڭ دەپارتامەنتىنىڭ ديرەكتورى قىزمەتىنە دەيىن كوتەرىلىپ، بارلىق كاسىبي ءوسۋ باسپالداقتارىنان وتكەن. 2011 - 2014 جىلدارى «ۇلتتىق يننوۆاسيالىق قور» اق ورتالىعى ديرەكتورىنىڭ ورىنباسارى  جانە «ۇلتتىق تەحنولوگيالىق دامۋ جونىندەگى اگەنتتىگى» اق ورتالىعىنىڭ باسقارۋشى ديرەكتورى قىزمەتتەرىن اتقارعان.  2014 جىلدان بەرى  ق ر ۇەم زاڭ دەپارتامەنتىنىڭ ديرەكتورى.

قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ بۇيرىعىمەن اعىمداعى جىلى 12 اقپاندا ق ر ۇقك ماڭعىستاۋ وبلىستىق دەپارتامەنتىنىڭ باسشىسى بولىپ ۇقو گەنەرال-مايورى ەرلىك تايجانوۆ تاعايىندالدى. ول سولتۇستىك قازاقستان وبلىسى پرەسنوۆ اۋدانىنىڭ «ۋكرايندىق» كەڭشارىندا دۇنيەگە كەلگەن. قاراعاندى جوعارى ميليسيا مەكتەبىنىڭ تەرگەۋ فاكۋلتەتىن بىتىرگەن (1984)، تەرگەۋشى-كريميناليست. زاڭ عىلىمدارىنىڭ كانديداتى (2004). كانديداتتىق ديسسەرتاسياسىنىڭ تاقىرىبى: «ق ر كەدەن سالاسىنداعى ۇقب جەدەل ىزدەستىرۋ قىزمەتى». 1977 جىلدان - سقو «بلاگوۆەششەنسك» كەڭشارىندا مەحانيزاتور. 1984 جىلدان - كسرو مەملەكەتتىك قاۋىپسىزدىك ورگاندارىندا اسكەري قىزمەتتە، قىزىلوردا وبلىسى بويىنشا مقكب جەدەل جانە تەرگەۋ بولىمشەلەرىندە قىزمەتتە. 1993 جىلدان - سقو بويىنشا ق ر ۇقك ۇقكد كادرلار باسقارماسىندا باسشىلىق قىزمەتتە. 2001-2009 جىلدارى - استانا قالاسى بويىنشا ق ر ۇقكد باستىعى. قۇقىق قورعاۋ ورگاندارى ۇيلەستىرۋ كەڭەسىنىڭ، استانا قالاسىنىڭ الەۋمەتتىك-پروفيلاكتيكالىق ءتارتىپ بۇزۋشىلىقتاردىڭ الدىن الۋ جانە سىبايلاس جەمقورلىققا قارسى كۇرەس كەڭەسىنىڭ مۇشەسى. ق ر كاراتە-دو فەدەراسياسىنىڭ قۇرمەتتى پرەزيدەنتى (استانا، 2005). «كسرو قارۋلى كۇشتەرىنە 70 جىل» (1988)، «قازاقستان رەسپۋبليكاسىنىڭ تاۋەلسىزدىگىنە 10 جىل» (2001)، «ۇلتتىق قاۋىپسىزدىكتى قامتاماسىز ەتۋدەگى ۇلەسى ءۇشىن» (2002)، «ءمىنسىز قىزمەتى ءۇشىن» (2002)، «قازاقستان كونستيتۋسياسىنا 10 جىل» (2005) مەدالدارىمەن ماراپاتتالعان. ق ر ۇلتتىق قاۋىپسىزدىك كوميتەتىنىڭ قۇرمەتتى قىزمەتكەرى (2004).

قىزىلوردا وبلىستىق مەملەكەتتىك قىزمەت ىستەرى دەپارتامەنتىنىڭ باسشىسى لاۋازىمىنا جازيرا جىلقىشييەۆا تاعايىندالدى.  جازيرا جىلقىشييەۆا 1970 جىلى قىزىلوردا وبلىسى جالاعاش اۋدانىندا دۇنيەگە كەلگەن. 1992 جىلى قورقىت اتا اتىنداعى قىزىلوردا پەداگوگيكالىق ينستيتۋتىن - فيزيكا ءپانىنىڭ ءمۇعالىمى، 2005 جىلى «بولاشاق» ۋنيۆەرسيتەتىن - زاڭگەر ماماندىقتارى بويىنشا بىتىرگەن. ەڭبەك جولىن 1992 جىلى جالاعاش اۋدانىنداعى № 31 ورتا مەكتەپتىڭ فيزيكا ءپانىنىڭ ءمۇعالىمى رەتىندە باستاعان. 1992-2001 جىلدارى جالاعاش اۋدانىنداعى № 202 ورتا مەكتەپ ديرەكتورىنىڭ تاربيە ءىسى جونىندەگى ورىنباسارى، جالاعاش اۋدانىنداعى № 31 ورتا مەكتەپ ديرەكتورىنىڭ تاربيە ءىسى جونىندەگى ورىنباسارى، 2001-2005 جىلدارى قازاقستان رەسپۋبليكاسى مەملەكەتتىك قىزمەت ىستەرى جونىندەگى اگەنتتىگىنىڭ قىزىلوردا وبلىسى بويىنشا باسقارماسىندا باس مامان، قىزىلوردا وبلىسىنىڭ جولاۋشىلار كولىگى جانە اۆتوموبيل جولدارى باسقارماسىندا ءبولىم باستىعى، 2005-2007 جىلدارى قازاقستان رەسپۋبليكاسى مەملەكەتتىك قىزمەت ىستەرى جونىندەگى اگەنتتىگىنىڭ قىزىلوردا وبلىسى بويىنشا باسقارماسىندا ءبولىم باستىعى، قىزىلوردا وبلىستىق ىشكى ساياسات دەپارتامەنتى ديرەكتورىنىڭ ورىنباسارى، 2007-2011 جىلدارى قىزىلوردا وبلىسى اكىمى اپپاراتىنىڭ كادر جۇمىسى ءبولىمىنىڭ مەڭگەرۋشىسى قىزمەتتەرىن اتقارعان. 2011 جىلدان قىزىلوردا وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ، ىشكى ساياسات باسقارماسىنىڭ باسشىسى قىزمەتتەرىن اتقارىپ كەلدى.  «الەۋمەتتىك ەڭبەك سالاسىنىڭ ۇزدىگى» توسبەلگىسىمەن ناگرادتالعان.

باتىس قازاقستان وبلىسى اكىمىنىڭ كەڭەسشىسى قىزمەتىن اتقارعان ەربول عۇمار ۇلى سالىقوۆ باتىس قازاقستان اۋماقتىق كاسىپوداقتار ورتالىعىنىڭ ءتوراعاسى بولىپ سايلاندى. ە.ع.سالىقوۆتىڭ باسشىلىق جۇمىستا تاجىريبەسى مول. سونىڭ ىشىندە جاڭاقالا اۋدانى اكىمىنىڭ ورىنباسارى، شىڭعىرلاۋ اۋدانىنىڭ اكىمى، وبلىس اكىمىنىڭ اۋىل شارۋاشىلىعى ماسەلەلەرى جونىندەگى ورىنباسارى قىزمەتتەرىن اتقاردى. 2009 جىلى «قۇرمەت» وردەنىمەن ماراپاتتالعان.

بەلگىلى ايتىسكەر ءارى تانىمال اقىن، قازاقستان جازۋشىلار وداعىنىڭ مۇشەسى باۋىرجان حاليوللا قادىر مىرزا ءالي اتىنداعى مادەنيەت جانە ونەر ورتالىعىنىڭ ديرەكتورى بولىپ تاعايىندالدى. ال وسىعان دەيىن قادىر ورتالىعىن باسقارىپ كەلگەن انشى-كومپوزيتور دونەدىل قاجىموۆ زەينەتكە شىعۋىنا بايلانىستى قىزمەتىنەن بوسادى.

ايتا كەتەيىك، باۋىرجان ەرگەن ۇلى بۇعان دەيىن وبلىستىق جاستار شىعارماشىلىعى ورتالىعىنا باسشىلىق ەتتى. سىرىم اۋدانىندا دۇنيەگە كەلگەن ول - ءال-فارابي اتىنداعى قازۇۋ-دىڭ جۋرناليستيكا فاكۋلتەتىنىڭ تۇلەگى. حالىقارالىق، رەسپۋبليكالىق ايتىستاردا جەڭىمپاز-جۇلدەگەر اتانىپ ۇلگەرگەن باۋىرجان سونىمەن قاتار جازبا پوەزيامەن اينالىسادى.  ونىڭ «جۇمباق قىزدىڭ جانارى» («جازۋشى» باسپاسى، 2001 جىل)، «نازىك بۇلت كوشىپ بارادى» (ورال قالاسى، 2005 جىل)، «جۇلدىز جاۋعان جارىق ءتۇن» (2012 جىل، ورال) اتتى جىر جيناقتارى جارىق كورىپ، ادەبيەتشىلەر مەن وقىرمان قاۋىمنان لايىقتى باعاسىن الدى.