2004 جىلى قازاقستانعا قحر-دان  كوشىپ كەلگەن ەتنيكالىق قازاق ماقسۇتقان دالەي ۇلى 2008 جىلى  الماتى قالاسىنىڭ شەتىنەن جەر ساتىپ الىپ، سوندا اۋىل قۇرعان. وعان اۋىل قۇرۋىنا كوشىپ كەلگەن ورالمانداردىڭ ءار جاققا شاشىراپ ورنالاسىپ كەتۋى سەبەپشى بولعان.  

• ءبىزدىڭ وتانعا ورالعان قانداستارىمىز ءار جاققا شاشىراپ كەتتى. نەگە دەسەڭىز، ءبىرىڭعاي قونىستانۋ مۇمكىندىگى بولعان جوق. ءبىر جەردەن ساتىپ الاتىن بارىنە ءۇي شىقپايدى. شىقسا دا بىرەۋىنىڭ جاعدايى كەلگەنمەن، ەكىنشىسىنىڭ جاعدايى كوتەرمەيدى. سول ءۇشىن مەن توڭىرەگىمدە قاتارلاستارمەن بىرىگىپ، الماتى وبلىسى قاراساي اۋدانى  جاڭاشالمالعان اۋىلدىق وكرۋگىنىڭ اۋماعىنان 9،5 گەكتار  جەر ساتىپ الىپ، حالىقتى ۇيىمداستىرۋ ارقىلى  2007 جىلى «باركول» اتىمەن ساياجاي قۇرىلىس كوپاراتيۆىن قۇردىم،- دەيدى 58 جاستاعى ماقسۇتقان دالەي ۇلى

كورپاراتيۆ بولۋ سەبەبى جەر بۇرىن شارۋا قوجالاعىنىڭ جەرى بولعان. سوندىقتان ماقسۇتقان  دالەي ۇلى ونى ساتىپ السا دا باسقا ماقساتقا قولدانۋعا مۇمكىندىگى بولماعان. بۇل جەردى تۇرعىن ۇيگە قولدانۋ، قوسالقى جانە اۋىل شارۋاشىلىعىمەن اينالىسۋ سياقتى ۋنيۆەرسال ماقساتقا قاراي اۋدارىپ جۇزەگە اسىرعان.

ماقسۇتقان دالەي ۇلى وسى اۋىلدى قۇراردا كەدەرگىلەر مەن قيىنشىلىقتار بولعانىن اشىق ايتتى. ول  ماقساتقا جەتۋ جولىندا تاباندىلىق كورسەتكەن. قانشا قيىندىق كورسە دە، العان بەتىنەن قايتپاي اۋىلدى قۇرعانىن ايتادى. 

• شىنىن ايتقاندا، كەدەرگىلەر كوپ بولدى، قولداۋشىلار جوق بولدى ...   ءبىراق قايتقان جوقپىز. ءبىر قادام بولسىن الدىعا جۇردىك. الدانعان كەزدەرىمىز دە بولدى،-دەيدى ول.

اۋىلدىڭ باركول دەپ اتالۋىنىڭ سەبەبىن سۇراعانىمىزدا،

• باركول دەپ اتالۋ سەبەبى قىتايداعى قازاقتاردىڭ اتاجۇرت جەرى. اسان قايعى ەرتەرەكتە سول جەرگە بارعاندا «مىنا جەردە قۇت بار ەكەن،  بايلىعى دا كول ەكەن، ءبارى كول ەكەن» دەپ اتاعان. سول «بارىكول» دەگەن ءسوز كەيىننەن «باركول» اتالىنىپ كەتتى،-  دەيدى كەيىپكەرىمىز.

بۇگىندە باركول اۋىلىندا  50 شاقتى سەميا بار. بۇل جەرگە 200 وتباسىنىڭ قونىستانا الاتىنداي مۇمكىندىگى بار.

• حالىق ريزا. 170  مەتر  تەرەڭدىكتەن سۋ شىعاردىم. سۋ اۋىلداعى كوپتەگەن ۇيلەرگە كىرگىزىلگەن.  200KB  ترانسفورماتور قويعىزىپ، جارىق ماسەلەسىن شەشتىم. ءقازىر گاز دە كەلدى. ەندى قالتاسى كوتەرگەندەر ۇيلەرىنە گاز قوسادى. گازدىڭ ترۋباسى كەلىپ تۇر، - دەيدى اۋىل قۇرۋشى  

اۋىل تۇرعىنى ماحامبەتتىڭ ايتۋىنشا  «بۇل ماقسۇتقاننىڭ ازاماتتىق ەرلىگى  عوي. ونى قولداپ قۋاتتايمىز. بىزدە وسى اۋىلدىڭ ءبىر مۇشەسىمىز عوي. سول ەندى وسى اۋىلدى كوركەيتۋگە ات سالىسامىز» دەيدى.

كورشىسى كۇلىمحان تۇرىسبەك قىزى 2007جىلى كوشىپ كەلگەنىن، اۋىلدىڭ جىلدان- جىلعا جاقسارىپ كەلە جاتقانىن جانە وسى اۋىلدىڭ قۇرۋشىسى ماقسۇتقان دالەي ۇلىنىڭ ەڭبەگىنىڭ زور ەكەندىگىن ايتادى.

ايەلى نازيقا قابىل «ءبىز ەڭ العاش وسى جەردى العاندا بۇل جەردە نە سۋ، نە سۆەت بولمادى. ءتىپتى بىردە – ءبىر ءۇي بولمادى. سودان بۇ كىسى سۋ شىعاردى. ودان كەيىن سۆەت ورناتتى. قانداستارىنىڭ باسىن ءبىر جەرگە جيناقتادى. ولارعا قولىنان كەلگەنشە كومەك بەرگەن ادام. ءالى دە كومەكتەسىپ كەلەدى» دەدى.

ايتا كەتەيىك، 2015 ج 27 قىركۇيەكتە «باركول» اۋىلىنىڭ قونىس تويى تويلانعان.

قانيا تابىس