قازاقستان جۋرناليستەر وداعىنىڭ ءتوراعاسى، ۇلتتىق باسپا ءسوز كلۋبىنىڭ پرەزيدەنتى جانە «قازتاگ» حالىقارالىق اقپارات اگەنتتىگى» ج ش س باس ديرەكتورى سەيىتقازى ماتايەۆ مەملەكەتتىك اقپاراتتىق تاپسىرىسقا بولىنگەن قاراجاتتى جىمقىردى دەپ ايىپتالۋدا، - دەپ حابارلايدى «قامشى» پورتالى جەمقورلىققا قارسى ءىس-قيمىل جونىندەگى ۇلتتىق بيۋرونىڭ الماتى قالاسى بويىنشا دەپارتامەنتىنە سىلتەمە جاساپ.

«الماتى قالاسى بويىنشا جەمقورلىققا قارسى قىزمەت اقپاراتتاندىرۋ كوميتەتى مەن «قازاقتەلەكوم» اق-عا مەملەكەتتىك ساياساتتى ناسيحاتاتۋ جانە باسىلىمداردا ماتەريالداردى جاريالاۋ ءۇشىن 2011-2015 جىلدارى بولىنگەن 300 ملن.تەڭگەدەن استام قاراجاتتى ۇرلاۋ فاكتىلەرىن انىقتادى»، - دەلىنگەن جەمقورلىققا قارسى قىزمەت تاراتقان حابارلامادا.  

سونداي-اق، جەمقورلىققا قارسى قىزمەت وسى ماقساتتا اتالعان ۆەدومستۆولار ءبىر كوزدەن ساتىپ الۋ تاسىلىمەن «كازتاگ» سەرىكتەستىگى جانە «ۇلتتىق باسپا كلۋبى» قوعامدىق بىرلەستىگىمەن كەلىسىمدەر بەكىتكەنىن، سوعان ساي تاپسىرىس بەرۋشىلەردىڭ باستى شارتتارىنىڭ ءبىرى - مەملەكەتتىك ساياسات تۋرالى اقپاراتتى اشىق جانە قول جەتىمىدى تۇردە حالىققا جاريالاۋ بولعانى ايتىلعان.

الايدا، بۇل شارتتار ورىندالماعان. اقپارات اگەنتتىگى مەملەكەت قارجىسىن تولەگەن ماتەريالداردى زاڭسىز جابىق تۇردە جاريالانعان، ال ازاماتتارعا ونى وقۋ قۇقىعى تەك قوسىمشا تولەم ارقىلى بەرىلىپ كەلگەن.

سونىمەن قاتار، جەمقورلىققا قارسى قىزمەت وكىلدەرى سەيىتقازى ماتايەۆتى زاڭسىز كاسىپكەرلىكپەن اينالىستى، سالىق تولەۋدەن جالتاردى دەپ ايىپتاۋدا.

جەمقورلىققا قارسى ءىس-قيمىل جونىندەگى ۇلتتىق بيۋرونىڭ الماتى قالاسى بويىنشا دەپارتامەنتى تاراتقان حابارلامادا س. ماتايەۆقا ۇرلاۋ جانە سالىق تولەۋدەن جالتارۋ فاكتىلەرى بويىنشا ايىپ تاعىلىپ وتىرعانى، اتالعان قىلمىستارعا قاتىسى بارلىعى دالەلدەنسە قىلمىستىق كودەكستە 6 جىلدان 12 جىلعا دەيىن باس بوستاندىعىنان ايىرۋ جازاسى كوزدەلگەنى ايتىلادى.