جامبىلدىق  بەرىك ءابىلحان ۇلى وبلىستاعى ەرەكشە ادام. ونىڭ ەرەكشەلىگى قۇلاعىمەن كىر تاسىن كوتەرىپ، كولىك سۇيرەيدى. تالاس اۋدانى، قاراتاۋ قالاسىنىڭ تۇرعىنى قالالىق سپورت مەكتەبىندە شاحمات جانە دويبى ويىندارى بوي­ىن­شا باپكەر، - دەپ جازادى STAN.KZ.

بەرىك ءابىلحان ۇلىنىڭ وزگەلەردەن ەرەكشەلىگى 26 كەلىگە دەيىنگى كىر تاستارىن قۇلاعىمەن كوتەرىپ، قۇلاعىمەن كولىك تە سۇيرەي بەرەدى.  ءا دەگەندە تىسىمەن 10 كەلىلىك كىر تاسىن كوتەرىپ كورگەن ازامات، ۋاقىت وتە كەلە اۋەلى 16، سودان كەيىن 2  كەلىلىك كىر تاستارىن قۇلاعىنا ءجىپ ارقىلى ءىلىپ كوتەرىپ جاتتىعادى.

بۇل ءادىسى ىسكە اسقان سوڭ كوڭىلى كولىك تارتىپ كورۋگە اۋا باستايدى. العاشىندا بۇل ءىستىڭ قانشالىقتى ناتيجەلى بولاتىنىنا سەنىمسىز بولعاندىقتان، ىشكى ويىن ءتىس جارىپ ەشكىمگە ايتپاپتى. قالتاسىنا جىپتەرىن سالىپ تىسقا شىعىپ كولىك ىزدەيدى. ءسويتىپ تاسادا تۇرعان «جيگۋلي» اۆتوكولىگىنە كوزى تۇسەدى. قۇلاعىنا ءجىپ ءىلىپ، تارتىپ كورگەندە كولىك العا ءجۇرىپ كەتپەگەنىمەن، ورنىنان قوزعالعانداي بولادى.

«كەيىن تاۋەكەلگە بەل بۋىپ  اكىمشىلىك عيماراتىنىڭ  الدىندا جينالعان جۇرتشىلىقتىڭ كوزىنشە ءبىر كولىكتى 3 مەترگە دەيىن قۇلاعىممەن سۇيرەپ كوردىم. كوپشىلىكپەن قوسا ءوزىم دە تاڭ قالدىم. ءقازىر جاتتىعۋلاردىڭ ارقاسىندا 3-5 مەترگە دەيىن تارتابەرەمىن. جاتتىعۋلاردىڭ،دايىندىقتىڭ ارقاسىندا وسىنداي ءىستى جاساي الدىم»،-دەيدى  بەرىك ءابىلحان ۇلى.

بەرىك ءابىلحان ۇلى ءوزىنىڭ ەشكىم قولعا الىپ، دايىندالىپ كورمەگەن  ىسپەن اينالىسۋىنا نەنىڭ تۇرتكى بولعانى جايلى بايانداپ بەردى.
«مەنىڭ وسىنداي ەرەكشەلىككە قىزىعۋىم 17 جاسىمدا باستالدى. وبلىس ورتالىعىندا ءبىر ورىس جىگىتتىڭ  بەلتەمىردە شىر اينالىپ كورسەتكەن ونەرىنە تاڭ قالدىم. جانىمدا تۇرعاناعام سول كەزدە مەنىڭ سپورتقا ەندى قىزىعىپ جۇرگەنىمدى بىلەتىن. «ازداپ دايىندالساڭ مۇنداي ءىس سەنىڭ دە قولىڭنان كەلەدى» دەپ جىگەرلەندىرىپ قويدى. راسىمەن  نە ءبارى 5 ايدىڭ ىشىندە جاڭاعى ورىس جىگىت ىستەگەن ارەكەتتەر مەن قيمىلداردى قايتالايتىن بولدىم»،-دەيدى بەرىك پىشانوۆ.
بەرىك ءابىلحانۇلىن اۋىلداستارى  «قۇرىش قۇلاقتى بەرىك» دەپ اتايدى ەكەن. ازاماتتىڭ قۇلاعىن جاتتىقتىرىپ، وسىنداي كۇشكە يە بولۋىنا اكەسى سەبەپشى بولىپتى.
«اكەم دانەكەرلەۋشى بولىپ جۇمىس ىستەيتىن. سودان، جاسىمىزعا قاراي ءتۇرلى سالماقتا كوتەرىپ شىنىعاتىن كىر تاستارىن جاساپ بەرەتىن. سونى كوتەرىپ،شىنىعىپ وستىك. ونى قۇلاقپەن كوتەرۋگە كەلسەك، مەن ويىما تۇسكەن ءىستى جاساپ كوردىم. الدىمەن جەڭىل ساماقتاعى شەلەكتەردى قۇلاعىممەن كوتەردىم. قاراسام بولاتىن سياقتى. سودان جاتتىعىپ، كوتەرەتىن زاتىما كۇن ساناپ ازداپ سالماق قوسىپ وتىردىم.  مىنە سوڭى جەڭىل كولىكتى كوتەرۋگە جەتتىم. مەن بۇل ارقىلى تاربيەمدەگى بالالارعا، نەنى كوزدەسەڭ دە ناقتى ماقساتقا تالماي جاتتىقساڭ جەتۋگە بولادى دەگىم كەلەدى. سوعان ۇيرەتكىم كەلەدى»،-دەيدى ەرەكشە ونەر يەسى.

بۇگىندە ءۇش قىز، ەكى ۇل تاربيەلەپ وتىرعان بەرىك پىشانوۆتىڭ ءبىر بالاسى ءوزىنىڭ ونەرىن جالعاستىرىپ ءجۇر. ول دە قۇلاعىمەن كىر تاسىن كوتەرەدى ەكەن.

شىنىعىپ، شىمىر بولۋدى كوزدەگەن ازامات  قىستىڭ كوزى قىراۋدا وزەننىڭ مۇزداي سۋىنا شومىلۋدى دا ادەتكە اينالدىرىپتى. بۇل ازاماتتىڭ تاعى ءبىر ەرەكشەلىگى ول ەشقاشان ۇيالى تەلەفون قولدانبايدى ەكەن.