بۇگىن، ق ر قارۋلى كۇشتەرىنىڭ جوعارعى باس قولباسشىسى ن.نازاربايەۆتىڭ نۇسقاۋلارىنا سايكەس قازاقستاننىڭ قارۋلى كۇشتەرىندە «ايبالتا – 2016» ءىرى اۋقىمدى جەدەل-تاكتيكالىق كوماندالىق-شتابتىق وقۋ-جاتتىعۋى باستالدى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ. 

وقۋ-جاتتىعۋ داعدارىستىق احۋالداردى وقشاۋلاۋ كەزىندە اسكەرلەردىڭ ءىس-قيمىلدارى ماسەلەلەرىن پىسىقتاۋعا باعىتتالعان.

وقۋ-جاتتىعۋ العاش رەت جاۋىنگەرلىككە جاقىنداتىلعان جاعدايلاردا قىسقى ۋاقىتتا وتكىزىلۋدە. بۇل وقۋ-جاتتىعۋدىڭ ەرەكشەلىكتەرى ۇلكەن قاشىقتىقتارعا قايتا توپتاسۋى جانە جەدەل اۋەايلاقتارعا مايداندىق اۆياسيانىڭ كوشىرىلۋىنەن كەيىنگى اسكەرلەردىڭ ءىس-قيمىلدارى، كۇردەلى قىسقى جاعدايداعى ءىس-قيمىلدار بولدى.

«وقۋ-جاتتىعۋعا «استانا» وڭىرلىك قولباسشىلىعى، اەروۇتقىر اسكەرلەرى، «شىعىس» وڭىرلىك قولباسشىلىعى قاتىسۋدا. سونداي-اق، ءبىز شەكارا اسكەرلەرىن، ۇلتتىق ۇلان مەن اۋە قورعانىسى كۇشتەرىن تارتتىق. ءبىز وقۋ-جاتتىعۋدى تومەن تەمپەراتۋرادا، قىستا جانە اسكەرلەر ءۇشىن تاڭسىق جەردە وتكىزدىك. سوندىقتان اسكەرلەردى ءبىز كومانديرلەردىڭ بۇل جەردى بىلمەيتىندەي ەتىپ تاڭدادىق. ءبىرقاتار جەكەلەگەن باتالوندار وڭتۇستىكتەن مەركى، ارىستان، ءبىرقاتار باتالون، ديۆيزيون باتىستان كەلدى. ولار ءقازىر كەلىپ جاتىر، تيەلىپ بىتەدى جانە بەلگىلەنگەن اۋداندارعا شىعادى.  نەگىزى ماقسات – كۇردەلى جاعدايلاردا جۇمىس جاساۋ ءۇشىن شتابتاردى، اسكەرلەردى دايارلاۋ، سونداي-اق جاۋىنگەرلىككە جاقىنداتىلعان، قىسقى تەمپەراتۋرادا اسكەري وپەراسيالاردى جوسپارلاۋعا ۇيرەتۋ»، - دەيدى ق ر قك قۇرلىق اسكەرلەرىنىڭ باس قولباسشىسى گەنەرال-لەيتەنانت مۇرات مايكەيەۆ.

وقۋ-جاتتىعۋ 2016 جىلعى اقپاننىڭ 22ء-ى مەن 26-ى ارالىعىندا ۇدايى ورنالاسۋ پۋنكتتەرىندە، قوزعالۋ باعدارلارلارى مەن «شىعىس»، «سارىوزەك» جانە «سپاسسك» پوليگوندارىندا وتەدى.

بارلىعى وقۋ-جاتتىعۋعا 5 مىڭعا جۋىق ادام، 1 500-دەن اسا بىرلىك قارۋ-جاراق پەن اسكەري تەحنيكا جانە شامامەن 30 بىرلىك اۆياسيالىق تەحنيكا تارتىلادى.

«بۇگىن ءبولىمدى جاۋىنگەرلىك ازىرلىكتىڭ جوعارى دارەجەسىنە كەلتىرۋ جونىندەگى ءىس-شارالار وتكىزىلدى. ءبىز كورسەتىلگەن اۋدانعا مارش جاساۋعا وقۋ-جاۋىنگەرلىك تاپسىرما الدىق. وندا جاۋىنگەرلىككە جاقىنداتىلعان جاعدايلاردا ءبولىم شتابىمەن جاۋىنگەرلىك ءىس-قيمىلداردى جوسپارلاۋ جۇرگىزىلەدى، ال بولىمشەلەردىڭ جەكە قۇرامى وقۋ-جاتتىعۋ بويىنشا شارتتى قارسىلاستى ءىس جۇزىندە جويۋ جونىندەگى تاپسىرمالاردى ورىندايدى. 177 ادام جانە 52 بىرلىك تەحنيكا تارتىلادى. وقۋ-جاتتىعۋداعى ارتيللەرياشىلاردىڭ مىندەتى شارتتى قارسىلاستى اتىسپەن قولداۋ، جالپىاسكەري بولىمشەلەر مەن بولىمدەردى قولداۋ»، - دەپ 28738 اسكەري ءبولىمىنىڭ كومانديرى پودپولكوۆنيك جانات راسقۇلوۆ اتاپ ءوتتى.

وسى اپتادا وقۋ-جاتتىعۋدىڭ نەگىزگى كەزەڭدەرى وتەتىنىن ايتا كەتەيىك. وندا اسكەري قىزمەتشىلەر اسكەرلەردىڭ دالالىق ماشىعىن، كۇردەلى قىسقى جاعدايدا ءىس-قيمىل جاساۋ كەزىندە جەكە قۇرامنىڭ مورالدىق-پسيحولوگيالىق تۇراقتىلىعى مەن فيزيكالىق تۇرعىداعى توزىمدىلىگىن ارتتىرادى.