بۇگىن ۇكىمەت 2016 جىلعا ارنالعان الەۋمەتتىك-ەكونوميكالىق دامۋ بولجامدارىن قايتا قارادى، - دەپ حابارلايدى «قامشى» پورتالى.

وندا الەمدىك نارىقتاعى جاعداي، مۇناي باعاسىنىڭ كوتەرىلمەۋى سىندى بىرنەشە سەبەپتەرگە بايلانىستى ۇكىمەتتىڭ ءبىراز جوسپارلارىنا وزگەرىستەر ەنگىزۋ جايى قاراستىرىلىپ، اعىمداعى جىلعا ارنالعان جاڭا بولجام بەكىتىلدى.

ۇلتتىق ەكونوميكا ءمينيسترى ەربولات دوسايەۆ بيىلعى جىلى جوسپارلانىپ وتىرعان ىشكى جالپى ءونىم كولەمىنىڭ 0،5 پايىزعا كەميتىنىن ايتتى.

«ءبىز 2016 جىلعا ارنالعان الەۋمەتتىك-ەكونوميكالىق دامۋدىڭ جاڭا  بولجامدارىن بەكىتتىك. سوعان ساي، مۇنايدىڭ باعاسى باررەلىنە 40 دوللار كەزىندە ءىجو ءوسىمى 2،1 پايىز دەپ جوسپارلانسا، مۇناي باعاسىنىڭ 30 دوللارلىق سەنارييىنە قاراپ وتىرىپ، ول 0،5 پايىز بولادى دەپ ويلايمىز. سوعان قاراماستان ءبىزدىڭ جاعدايىمىز جامان بولمايدى»، - دەدى ۇكىمەت جيىنىنان سوڭ جۋرناليستەرگە سۇحبات بەرگەن ە. دوسايەۆ.

مينيستر سونداي-اق، ۇلتتىق بانك بولجامدارى بويىنگا ينفلياسيا دەڭگەيى دە بۇرىنعىشا ساقتالاتىنىن ايتادى.

«بۇل شامامەن 6-8 پايىز اينالاسىندا بولادى. ونەركاسىپ سالاسىندا، ارينە، تاۋ-كەن ونەركاسىبىندە ءوندىرىس كولەمىنىڭ شامامەن 5 پايىزعا تومەندەۋى بولادى. وڭدەۋشى ونەركاسىپتە دە شامامەن 1،4 پايىز، اۋىل شارۋاشىلىعىندا 3،5 پايىز ءوندىرىس كولەمىنىڭ قىسقارۋى بايقالاتىن بولادى. وسى ايتىلعاندار جاڭا جوسپارلارعا وزەك بولدى. ەندى 2016 جىلعا ارنالعان رەسپۋبليكالىق بيۋدجەتكە ەنگىزىلەدى»، - دەيدى ۇلتتىق ەكونوميكا ءمينيسترى.

ۇكىمەت اعىمداعى جىلدىڭ بيۋدجەتىنە دوللار باعامىنىڭ دا بولجامىن وزگەرتىپ وتىر. سوعان ساي، بىلتىر قاراشا ايىندا بيۋدجەتكە 300 تەڭگە بولادى دەلىنگەن دوللار باعامى 360 تەڭگەگە وزگەرتىلدى. سونداي-اق، باررەلىنە 40 دوللار بولادى دەپ جوسپارلانعان مۇناي باعاسى دا 30 دوللارعا تومەندەتىلدى.