قازاقستاندىق پروگرامميست جىگىت الىبەك داتبايەۆتى الەمدىك Booking.com. كومپانياسى ءوزىنىڭ باس كەڭسەسىنە جۇمىسقا شاقىرىپ وتىر، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

الىبەك قوناقۇيلەردى برونداۋ بويىنشا الەمدەگى ەڭ ءىرى سايت سانالاتىن Booking.com-عا جۇمىسقا ورنالاسۋ مۇمكىندىگىنە قالاي يە بولعانى تۋرالى ايتىپ بەردى. ايتۋىنشا، الىبەك جۇمىسقا تۇرار الدىندا ءۇش رەت سۇحباتتاسۋ كەزەڭىنەن وتكەن.

ال، جالپى بۇل كومپانياعا قازاق-تۇرىك ليسەيىنىڭ تۇلەگى 2015 جىلدىڭ قاراشاسىندا تەحنيكالىق قىزمەتكەرلەر ءۇشىن ۇيىمداستىرىلعان عالامدىق جارىسقا قاتىسقان كەزدە تاپ بولعان.

«Hackerrank.com دەگەن الاڭ بار. Booking.com سول جەردە بايقاۋ ۇيىمداستىردى. قاتىسۋشىلارعا قيىندىق دەڭگەيى ءار ءتۇرلى تاپسىرمالاردى شەشۋگە بەلگىلى ءبىر ۋاقىت بەرىلدى. وعان الەمنىڭ ءار ەلىنەن 500 شاقتى ۇمىتكەر قاتىستى. مەن دە سولارمەن بىرگە بەرىلگەن تاپسىرمالاردى ءساتتى ورىندادىم. ءۇش كۇننەن كەيىن ماعان Booking.com كومپانياسىنا جۇمىسقا ورنالاسۋ ءۇشىن Skype ارقىلى اڭگىمەلەسۋگە شاقىرعان حات كەلدى. ماعان ءتورت بولىكتەن تۇراتىن ءۇي تاپسىرماسىن جانە ونى شەشۋشە 75 مينۋت بەردى. ول تاپسىرمانى ويداعىداي ورىنداعان سوڭ، مەنى امستەردامداعى Booking.com-نىڭ كەڭسەسىندە وتەتىن بەس ساعاتتىق قورىتىندى اڭگىمەلەسۋگە شاقىردى»، - دەيدى الىبەك داتبايەۆ.

ءتورت كۇنگە بارعان الىبەكتىڭ جول ءجۇرۋ، جاتىن ورنى مەن تاماعىنىڭ شىعىنىن كومپانيا كوتەرگەن. قورىتىندى اڭگىمەلەسۋدەن دە ءساتتى وتكەن باعدارلاماشى جىگىتكە كومپانيا جۇمىس ۇسىنعان. العاشقى ايداعى پاتەراقىسىن دا Booking.com ەسەبىنەن تولەگەن. بۇعان دەيىن الىبەك ينتەرنەت جوبالارمەن كوپ اۋرە-سارساڭعا تۇسكەنىن ايتادى. ءقازىر كومپانيادان كەلىنشەگىنە دە جۇمىس قاراستىرىپ جاتقان كورىنەدى.

«مەنى امستەردام تاڭ قالدىردى. مۇندا ءبىرىنشى بولۋىم. كەڭسەلەرى كەرەمەت جانە مۇندا جۇمىس كەستەسىنە قادالىپ وتىرعان ەشكىم جوق. ساعان تاپسىرما قويادى، سول تاپسىرمانى بەرىلگەن ۋاقىتتا ورىنداۋىڭ كەرەك. بۇل كومپانيادا الەمنىڭ ءار تۇكپرىنەن 800 باعدارلاماشى جۇمىس ىستەيدى. بىرنەشە قازاقستاندىق تا بار ەكەن»، - دەيدى الىبەك داتبايەۆ.