دەپۋتاتتاردىڭ قوناق ۇيىنە قازىنادان كەتكەن شىعىن 8 ميلليون ەمەس، 51 ميلليون تەڭگە. ءبىرقاتار بۇقارالىق اقپارات قۇرالدارى بۇگىن كونكۋرستىڭ حاتتاماسىن جاريالاپ، جاڭا سانداردى ايتتى. الايدا پارلامەنتتىڭ شارۋاشىلىق باسقارماسى بىرەر كۇن بۇرىن شىعىندى 8 ميلليوننان اسپادى دەپ سەندىرگەن. باسقارما سانداردان تاعى شاتاستى ما؟ دەپۋتاتتاردىڭ كۇنكورىسىنە مەملەكەت قانشا جۇمسادى؟ بۇل سۇراقتاردىڭ جاۋابىن 31-ارنا ىزدەپ كورىپتى.

ءوزىن "ءتاي-تاي باسقان دەپۋتاتپىن" دەيدى مارات بوپازوۆ. تالدىقورعاننان كەلگەنىنە ەكى ايدان اسپاعان حالىقتىڭ نەمەسە "نۇر وتاننىڭ" قالاۋلىسى ەلورداعا ەندى ۇيرەنىپ جاتىر ەكەن. جەتىسۋ سياقتى جىلۋلىعى جوق جەلوردادا جۇرگەنىمەن، ءبىر اپتا بۇرىن جايعاسىپ العان "نۇرسايانى" نۇرلى دا، سايالى دا دەيدى. ال "پەكين پالاستا" تۇرعان ون بەس كۇنى ءۇشىن مەملەكەتتىڭ قانشا تولەگەنىنەن بەيحابار. تەك جۇرتتىڭ داۋرىعىپ دەپۋتاتتاردىڭ ىشكەن-جەگەنى مەن تۇرمىسىن تالقىلاپ جاتقانىنا رەنجۋلى.

مارات بوپازوۆ، ق ر پارلامەنتى ءماجىلىسىنىڭ دەپۋتاتى:

- ەشقانداي الىپ كەتىپ بارا جاتقان ارتىقشىلىعىمىز جوق. كوميسسيا شەشىمى ءتۇستى، بۇرىننان تۇرعان مەبەلمەن بەردى. اكتىمەن قابىلداپ وتكىزدى، مەن قابىلداپ الدىم. قاسقىردىڭ اۋزى جەسە دە قان، جەمەسە دە قان دەيدى عوي.

ال استانا عالىمدارى دەپۋتتارعا رەنجىپ ءجۇر ەكەن. دەپۋتاتتاردىڭ قوناق ءۇيى ءۇشىن قازىنادان كەتكەن 50 ميلليون دەگەن سومانى ەستىگەندە "توبە شاشىم تىك تۇردى" دەيدى عالىم باقىت التىنباسوۆ. 10 جىل ساباق بەرىپ، استانادا پاتەر جالداپ كۇنەلتكەن وقىتۋشى  "عالىمدار جاتاقحاناسىنا" ارەڭ قولى جەتىپتى. "نۇرسايا" ىسپەتتى ەليت كلاسس بولماسا دا، جارايدى. تەك، جالاقىمدى تۇگەل پاتەر جالداۋعا جۇمساماسام بولدى  دەيدى. 

باقىت التىنباسوۆ، عالىم:

- دەپۋتاتتار جاعدايى ناشار حالىق ەمەس. ولاردىڭ بارلىعىنىڭ جاعدايى وتە جاقسى. وزدەرىنىڭ ۇيلەرى دە بار الىپ قويعان. سوندىقتان ولاردىڭ جىلاعاندىعى بولماس. عالىمدار كۇنىن ارەڭ كورىپ ءجۇر. قاي جاقتان 129 مىڭعا ءنومىر. ارەڭ ءجۇر عوي.

جۇرتتىڭ ءبارى وسىلاي نارازىلىق بىلدىرگەن سوڭ، "پەكين پالاستاعى"  31 دەپۋتاتتىڭ 15 كۇنىنە نەبارى 8 ميلليون كەتتى دەپ پارلامەنتتىڭ شارۋاشىلىق باسقارماسى ايتقان. ءبىراق بۇگىن ب ا ق وكىلدەرى سومانىڭ شىن مانىندە 51 ميلليون تەڭگە ەكەنىن تاعى جازدى. ءبىز وسى سۇراقتى باسقارمانىڭ وزىنە قويدىق.

مامان:

- 51 ملن-عا دوگوۆور جاساسقان. 8 ملن-عا پو فاكتۋ وپلاتاسى جۇرگىزىلگەن. قالعان اقشا ۇكىمەتكە قايتارىلادى.

باسقارما، بۇل سومانىڭ ءبىر جىل ءۇشىن ەسەپتەلگەنىن ايتتى. سەبەبى ساتىپ الۋ، 12 ايعا جۇرگىزىلەدى ەكەن. ءبىراق دەپۋتاتتار بار بولعانى جارتى اي تۇرىپ، 40 ميلليوننان ارتىعىن "ۇنەمدەپ" الدىق دەگەن شارۋاشىلىق، قالعان قارجى مىندەتتى تۇردە قازىناعا قايتارىلادى دەپ سەندىردى.