ءال–فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىندە «تۋرا بي» شەشەندىك ونەر كلۋبى مۇشەلەرىنىڭ ۇيىمداستىرۋىمەن قازاقستاننىڭ حالىق جازۋشىسى ءازىلحان نۇرشايىقوۆتىڭ قىزى جانار ءازىلحان قىزى نۇرشايىقوۆامەن كەزدەسۋ ءوتتى، - دەپ حابارلايدى «قامشى» پورتالى.

قالىڭ قازاقتىڭ ىشىندە ناعىز سۇيىسپەنشىلىك سەزىمىن تۇسىنەتىندەر، شىنىمەن عاشىق بولا بىلەتىندەردىڭ جاستىققا جاستاپ وقىعان، ماحابباتتىڭ قىزىققا تولى جىلدارىن بايان ەتەتىن ءازىلحان نۇرشايىقوۆ اعامىزدىڭ كىتابى ماحاببات گيمنىنە اينالعانىنا كۇمان كەلتىرە المايمىز. عاشىقتىقتى قاعاز بەتىندە سوزدەرمەن ورنەكتەپ عانا قويماي، ءوز ءومىرىن ماڭگىلىك ماحابباتتىڭ پاناسى ەتە بىلگەن ءاز-اعانىڭ جۇبايى حاليما وزباقانوۆا-نۇرشايىقوۆامەن 54 جىل قول ۇستاسا كەشكەن عۇمىرى بۇگىنگى جاستار ءۇشىن ۇلكەن ونەگەگە اينالعانىنا ءبارىمىز دە كۋامىز.

- ادامدار ءبىر-بىرىنىڭ ومىرلەرى تۋرالى كوبىرەك ءبىلۋى قاجەت. اڭگىمە مەنىڭ اياۋلى اكەم مەن انام تۋرالى بولىپ وتىرعاندا، ولار جايلى ءسوز قوزعاماۋعا مەنىڭ ەش قۇقىعىم جوق، - دەپ باستادى اڭگىمەسىن جانار ءازىلحان قىزى.

سۇحباتتىڭ باسى حاليما اپامىزدىڭ قيىندىققا تولى بالالىعى تۋرالى اڭگىمەدەن باستالدى. قازاق دالاسىنداعى ۇلى اشتىق جىلدارىنىڭ قارساڭىندا تۋعان ول، ەس بىلە باستاعان جاسىندا اتا-اناسىنان ايىرىلىپ، جالعىز سىڭلىسىمەن قالدى. ارتىنان ءوزى بالالار ۇيىنە، ءسىڭلىسى حانىمحان – سابيلەر ۇيىنە جىبەرىلگەندە، ودان دا كوز جازىپ قالدى. اراعا ون جىل سالا بۇكىل كەڭەس جەرىندە ورناعان سوعىس مايدانىنا حاليما دا سۇرانا باستادى.

ازىلحانمەن ول 1939 جىلى تانىسقان. باسىندا تەك قانا دوس بولىپ جۇرگەن-دى. مايداندا ءجۇرىپ ەكەۋى حات الماستى. ارالارىنداعى سەزىم دە كەزەكتى حاتتارمەن ۇلعايا بەردى. سوعىس اياقتالعاننان سوڭ، ەكى مايدانگەر ەلگە ورالدى. 1947 جىلى ءاز-اعا مەن حاليما اپانىڭ 54 جىلدىڭ بىرلەسە كەشكەن ءومىرىنىڭ باستاۋى سالىندى، ەكەۋى ۇيلەنىپ، ءۇي بولدى.

حاليما تۋرالى: «ول مەنىڭ ايەلىم عانا ەمەس، ءارى ەنەم، ءارى شەشەم، ...  ءارى رەداكتورىم، ءارى كوررەكتورىم، ءارى اقىلشىم، ءارى قوسالقى اۆتورىم، ءارى حاتشىم، ءارى كۋرەرىم بولدى»، - دەپ جازدى ءازىلحان اعا ءوز ەستەلىكتەرىندە.

حاليما اپا جوعارىدا اتالعاندارمەن قاتار، كۇندەلىكتە ومىردە شەبەر اسپاز، كەرەمەت تىگىنشى، اقىلگوي دانا جانە، ارينە، اياۋلى انا، ارداقتى اجە بولا ءبىلدى. بارلىق ادامي قاسيەتتەردى بويىنا جيناعان جان ءبىر ساتكە دە السىزدىك، قىزعانشاقتىق، ماقتانشاقتىققا بەرىلمەگەن، بىرەر مينۋتقا دا ۇيالشاقتىعىن، جومارتتىعى مەن بىلىمگە دەگەن قۇشتارلىعىن جوعالتقان ەمەس.

ماڭگىلىك ماحابباتتىڭ پاناسىنا اينالعان ەكى عاشىق ومىرگە ءتورت بالا اكەلدى، ولاردىڭ ءارقايسىسى بۇگىندە ۇلكەن دۇنيەنىڭ «كىرپىشى بولىپ قالانعان». ءوز كەزەگىندە ولار دا نۇرشايىقوۆتاردىڭ ۇرپاعىن جالعاستىرار ۇل-قىزداردىڭ اكە-اناسى، اتا-اجەسى بولىپ وتىر.

-مەن اتا-انامدى ماقتان تۇتامىن. اكەم ءبىر ەستەلىگىندە انام تۋرالى: «... مەن ءوزىمدى پەتراركا تالانتىمەن تەڭەستىرە المايمىن. ءجۇز ەسە، ءتىپتى مىڭ ەسە تومەن بولارمىن. ءبىراق، حاليمانىڭ لاۋرادان ءبىر ەلى دە تومەن ەمەس ەكەنىنە ءباس تىگە الامىن» - دەپ جازعان ەدى. ءدال وسى جولدار اكەمنىڭ اناما دەگەن ماحابباتىنىڭ دالەلى بولا الادى، - دەپ ءتامامدادى ءوز اڭگىمەسىن جانار ءازىلحان قىزى.

بۇل  كەزدەسۋ قاتىسىپ وتىرعان ستۋدەنتتەردىڭ ءارقايسىسىنا ۇلكەن اسەر سىيلادى. سوڭعى ۋاقىتتا ەلىمىزدە جاڭا شاڭىراق كوتەرگەن جاستاردىڭ اجىراسۋعا ءجيى باراتىندىعىن بايقاپ كەلەمىز. سونىڭ كورىنىسىندە ءازىلحان اعامىز بەن حاليما اپامىزدىڭ قول ۇستاسا كەشكەن، قيىندىعى كوپ بولسا دا، وزدەرىن بەرىك ۇستاپ، ماحابباتارىن سوندىرمەي وتكەن 54 جىلى، ناعىز ماحابباتتىڭ تەك كىتاپتاردا عانا ەمەس، ومىردە دە بولاتىندىعىنا كوز جەتكىزۋىمىزگە كومەكتەستى. قانداي قيىنشىلىق بولماسا دا، ماڭگىلىك ماحابباتقا ەش كەدەرگى جوق ەكەنىن تۇسىندىك.

جانار ءازىلحان قىزى ءبىزدىڭ قازاق ۇلتتىق ۋنيۆەرسيتەتىمىزدىڭ شەتەل ازاماتتارىنا ارنالعان دايىندىق فاكۋلتەتىندە ورىس ءتىلى كافەدراسىنىڭ پروفەسسورى بولىپ قىزمەت ەتەتىنىن بىلگەن ۋاقىتتا، تاعى ءبىر قۋانىشقا بولەندىك. ءازىلحان نۇرشايىقوۆتاي بيىك تۇلعا ۇرپاقتارىنىڭ ارامىزدا جۇرگەنى، ونىڭ ونەگەلى ءومىرى تۋرالى مولىراق ءبىلۋ مۇمكىندىگى جانىمىزدى جىلىتا ءتۇستى.

ەلباسى نۇرسۇلتان ءابىش ۇلى ءازىلحان اعامىزدىڭ اياۋلى جارى تۋرالى جازعان «ماڭگىلىك ماحاببات جىرى» اتتى ەستەلىكتەرىن وقىعاننان سوڭ، «ءسىزدىڭ شىعارمالارىڭىز، ويلارىڭىز – ەل قازىناسى. ءومىرىڭىز – ۇلگى!» دەپ وي قورىتقان ەكەن. شىنىمەن دە، ۇلى تۇلعالاردىڭ ءومىرى – ءبىز، جاستار، ءۇشىن ۇلاعات!وسىنداي جانعا جايلى ، تاربيەلىك ءمانى زور جىلى كەزدەسۋ جالعاسىن تابا بەرسە دەگەن نيەتتەمىز.