وسكەمەندە ءولى كۇيىندە تابىلعان 14 جاستاعى مەدەت ماراتوۆتىڭ تۋىستارى ونىڭ ولىمىنە قاتىستى بولجام جاسادى. ولاردىڭ ايتۋىنشا، مەكتەپ وقۋشىسىن قىز ءۇشىن ولتىرگەن، - دەپ حابارلايدى Qamshy.kz YK-news.kz-كە سىلتەمە جاساپ.

جوعالىپ كەتەردىڭ الدىندا مەدەت سىنىپتاسىن ساباقتان كەيىن ۇيىنە شىعارىپ سالادى. تۋىستارىنىڭ ايتۋىنشا، بۇل كوشەدەگى بەينەباقىلاۋ كامەراسىنا جازىلىپ قالعان. وسىدان كەيىن بالانى ەشكىم كورمەدى.

"بۇل انىق كىسى ءولىمى. سەبەبى، مەدەتتىڭ دەنەسىنە التى رەت پىشاق سۇعىلعان، ال باسىنا سوققى جاسالعان. ءبىز مۇنى كىمنىڭ، نە ءۇشىن جاساعانىن ازىرشە بىلمەيمىز. مەدەت وتە سابىرلى، ۇستامدى بالا بولدى. فۋتبولعا قىزىعاتىن، مەكتەپتەن كەيىن بىردەن ۇيگە كەلەتىن ەدى. ال بۇل جولى قايتا ورالمادى...، - دەدى مەدەتتىڭ تۋىسى - ەلنۋرا جۇماعۇلوۆا. - ونى وسىلاي جازالايتىنداي كىشكەنتاي بالانىڭ نە ىستەپ قويعانىن بىلمەيمىز! وقيعا بولاردىڭ الدىندا مەدەتتىڭ قىزىل ءتۇستى كولىكتىڭ جۇرگىزۋشىسىمەن سويلەسىپ تۇرعانىن سىنىپتاستارى كورگەن. ساباقتان كەيىن ول سىنىپتاس قىزدى ۇيىنە اپارىپ تاستاپتى. سول قىز بىردەڭە ءبىلۋى مۇمكىن. قىزدىڭ كامەلەتتىك جاسقا تولماۋىنان ودان بىردەڭە سۇراپ ءبىلۋ قيىن. دەگەنمەن پوليسەيلەر ونىڭ تۋىستارىمەن، وزىمەن سويلەسىپ جاتىر. مۇمكىن ونىڭ بۇرىنعى جىگىتى مەدەتتەن قىزعانعان بولار...".

ەسكە سالايىق، 20 ءساۋىر كۇنى پراپورششيكوۆو اۋىلىنداعى سەگىزىنشى سىنىپ وقۋشىسى مەدەت ماراتوۆ ۇيىنە ورالماعان بولاتىن. كەلەسى كۇنى ونىڭ دەنەسى تابىلدى. جانتۇرشىگەرلىك ءولىمنىڭ ءمان-جايىن انىقتاۋ ماقساتىندا جەدەل تەرگەۋ توبى قۇرىلدى. وقۋشىنىڭ ولىمىنە قاتىستى قوزعالعان ءىستى شقو ءىىد باقىلاۋعا الدى.