الماتى قالاسىندا 2016 جىلى كاسىپكەرلەردى ءوندىرىس الاڭدارىمەن قامتاماسىز ەتۋ ماقساتىندا جەر تەلىمدەرىن تۇگەندەۋ شاراسى جۇرگىزىلدى، دەپ حابارلايدى Qamshy.kz.  بۇل تۋرالى ۇلت جوسپارى - «100 ناقتى قادامدى» ورىنداۋ بويىنشا وسىعان دەيىن اتقارىلعان ىستەردى قورىتىندىلاۋ بويىنشا ۇيىمداستىرىلعان باسپا ءسوز ءماسليحاتى بارىسىندا قالا اكىمى باۋىرجان بايبەك ايتتى.

قورىتىندى بويىنشا قالادا 753 بوس جاتقان جەر تەلىمدەرى انىقتالىپ، ولاردىڭ 80 پايىزىنىڭ مەنشىك يەلەرىنە پايدالانۋىنا شەكتەۋ قويىلىپ وتىر. 

 «الماتى قالاسىندا بوس جاتقان جەر جوق» دەگەن ءسوزدى ءجيى ەستيمىز. جەر جوق ەمەس. بارشىلىق. الايدا ولاردى انىقتاپ، اينالىمعا ەنگىزۋ قاجەت. الماتىدا ءتىپتى ماقساتسىز قولدانىلىپ جاتقان اۋىل شارۋاشىلىق جەر تەلىمدەرى بار ەكەنى بەلگىلى بولدى. مۇنداي جەرلەر الداعى ۋاقىتتا ءماجبۇرلى تۇردە قالا مەنشىگىنە الىپ، ساۋداعا شىعارۋىمىز مۇمكىن. ءقازىر، قالادا جالپى اۋماعى 329 گەكتار بولاتىن 107 جەر تەلىمىنىڭ مەنشىك يەلەرىنە ەسكەرتۋ جىبەرىلىپ وتىر. سونداي-اق، بۇگىنگى تاڭدا قالادا جالپى اۋماعى 88 گەكتار بولاتىن، جۇمىسى توقتاپ تۇرعان 116 ءوندىرىس نىساندارى انىقتالعان. وسى نىسانداردا قوسىمشا ينفراقۇرىلىم جاساۋعا اقشا شىعىنداماي-اق، جاڭا ءوندىرىس كوزىن اشۋعا بولادى.»، - دەدى اكىم.