الماتى حالقى جەر ساتۋعا قارسىلىق ءبىلدىرىپ كوشەگە شىقتى، - دەپ حابارلايدى Qamshy.kz 31-ارناعا سىلتەمە جاساپ.

جاي ۋاقىتتا باسى بىرىكپەيتىن قوعامدىق ۇيىمدار قارسىلىق اكسياسىنا بىرگە كەلدى. بەيبىت شەرۋگە كەلگەن حالىقتىڭ تالابى ورتاق – «جەر ساتىلماسىن!». بيلىك وكىلدەرى جەردىڭ ساتىلمايتىنىن، تەك جالعا بەرىلەتىنىن ايتىپ قانشا الداۋسىراتقانىمەن، حالىق 1 شىلدەدەن باستاپ تالاپايعا تۇسەتىن جەردىڭ بولاشاعىنا الاڭدايدى.

جىل سايىن 22 ساۋىردە لەنيندى ۇلىقتايتىن كوممۋنيستەر دە، اتتانداپ ۇران تاستايتىن امانتاي قاجىنىڭ قوزعالىسى دا، الاششىل توپ وكىلدەرى دە ۇكىمەت باستاماسىنا قارسىلىق ءبىلدىرىپ، جەر ساتۋعا قاتىستى پىكىرلەرىن ايتۋعا بىرگە جينالدى. ساياسي باعىتتارى قايشى توپتار ءبىر ميتينگتىڭ وزىندە ءبولىنىپ تۇرعانىمەن، "جەر ساتىلماسىن!" دەگەن ۇستانىمدارى ورتاق.

ارسەنتي ناپوليمو، ميتينگكە قاتىسۋشى:

- جەردى ساۋدالاۋعا پاتشا وكىمەتى كەزىندە دە، كەڭەس وداعىندا دا قاتاڭ تىيىم سالىنعان. جەر قاشان دا حالىقتىكى بولعان. ەگەر ءقازىر بيلىك جەر ساتۋدى باستاسا، وندا ەلدە كاپيتاليستىك جۇيەنى دامىتپاقشى.

ءسالىمباي ورازالييەۆ، "جەر انا" قوعامدىق بىرلەستىگىنىڭ ءتوراعاسى:

- جەردى توۆارعا اينالدىرۋعا بولمايدى. بۇرىنعى سوۆەت كەزىندەگىدەي جەر مەملەكەتتىڭ مەنشىگىندە بولۋ كەرەك. كىمگە كەرەك جەر، مىسالى، اۋىلشارۋاشىلىق ماقساتتا، بارسىن دا ارەنداعا السىن.

"جەر انا" بىرلەستىگىنىڭ ءتوراعاسى ناقتى جوسپارى بولماسا دا، جەر ساتىلماسىن دەگەن ۇندەۋدى بەيبىت تۇردە بيلىككە جەتكىزۋگە تىرىسامىز دەيدى. بىرلەستىك مۇشەلەرى ءبىر ايدان كەيىن جاپپاي قارسىلىق بىلدىرەمىز دەپ جوسپارلاۋدا. ال امانتاي قاجى بۇنىڭ ءبارىن ساتسىزدىك پەن ساياسي جۇيەدەگى ولقىلىقتاردان كورەدى.

امانتاي قاجى اسىلبەكوۆ، "اتتان، قازاقستان" قوزعالىسىنىڭ جەتەكشىسى:

- جەر ساتىلعان ول جامان نارسە. ول - قازاقتىڭ جەرى اللا بەرگەن. ساتۋعا بولمايدى. ەش مەملەكەتتە ونداي جوق. بۇل قازاقتا عانا بولىپ تۇر. مىناۋ مافيا، كوررۋپسيا قازاقتىڭ كەڭ بايلىعىن ساتىپ-ساتىپ، مايلانىپ-مايلانىپ ۇرى بولىپ الدى عوي. 

نارازىلىقتارىن اشىنا ايتقان حالىق پىكىرلەرىنە بيلىك قۇلاق اسپاسا قارسىلىق شارالارىن جالعاستىرا بەرەمەكشى. جەر ساتۋعا قارسىلىق ءبىلدىرۋ كەلەشەك ۇرپاق قامى دەيدى ولار.