ونەر ادامدارىنىڭ باسىنان تالاي قىزىق تا ىڭعايسىز جاعدايلار ءوتىپ تۇرادى. ارتىستەردىڭ باسىنان وتكەن جايتتار تۋرالى بىرنەشە وقيعالاردىڭ توپتاماسىن، “ريەۆيۋ” ۇسىندى.

بۇگىندە پروديۋسەر اتانعان بولمانوۆ ابك توبىندا جۇرگەن كەزىن ناعىز جۇلدىزدى شاعىم دەپ ەسكە الادى. جاس كۇنىندە سوڭىنان جۇگىرگەن تىڭدارماندارىنىڭ كوپ بولعانىن دا جاسىرمايدى.

“ابك كەزىندە 30-40 مىڭ تىڭدارمان كۇزەتشىلەردەن ءوتىپ، بىزگە قاراي جۇگىرەتىن. سول ساتتە كوزىمىزگە تەڭىز سياقتى ەلەستەيتىن. نەشە ءتۇرلى قورقىنىشتى جاعداي بولعان”، – دەيدى ءقىدىرالى بولمانوۆ.

مۇنداي جاعداي جۇبايى قاراقات ءابىلدينانىڭ دا باسىنان وتكەن ەكەن. ونىڭ تابىنۋشىسى ەستەلىككە دەپ ءبىر ۋىس شاشىن جۇلىپ العان.

“مەنىڭ شاشىم ۇنەمى ۇزىن بولىپ جۇرەدى عوي. ستاديوندا كوپشىلىك اراسىنان ءوتىپ بارا جاتتىم. وسى كەزدە بەلگىسىز تابىنۋشىم ءبىر ۋىس شاشىمدى جۇلىپ العان. قىز نەمەسە ايەل ەكەنى ەسىمدە جوق. ءبىراق ەستەلىككە دەپ جۇلىپ العان كەزدە، شالقايىپ جۇرە الماي قالدىم”، – دەيدى قاراقات ءابىلدينا.

ال ءانشى قايرات نۇرتاسقا كۇنىنە 200-300 بويجەتكەن قوڭىراۋ شالسا، تولقىن زابيروۆاعا جاس جىگىت تۇرمىسقا شىعۋعا ۇسىنىس بىلدىرگەن. ول تىڭدارمانىنان كەلگەن حاتتى وقىپ، كوڭىلىنىڭ كوتەرىلىپ قالعانىن ايتادى.

“مەن سىزگە ۇيلەنگىم كەلەدى دەپ ايتاتىندار بار. سول كەزدە ەرىكسىز كۇلەمىن. سوندا مەنىڭ جولداسىم مەن ءۇش بالام قايدا قالماق؟! وسىدان بىر-ەكى كۇن بۇرىن عانا مەنىڭ ەلەكتروندى پوشتاما جاڭاعىداي حات كەلدى. مەنى ون سەگىز جاستا دەپ ويلاعان شىعار بالكىم. كۇيەۋىمىز ەكەۋىمىز كوزىمىزدەن جاس شىققانشا كۇلدىك”، – دەپ ءانشى قۋانىشىمەن ءبولىستى.

تولقىن زابيروۆا مۇنداي مازمۇنداعى حاتتارعا قۋانعانىمەن، قايرات نۇرتاس كەرىسىنشە ابدەن مەزى بولعانىن ايتادى. وسىنىڭ سالدارىنان تەلەفون ءنومىرىن ءجيى اۋىستىرادى ەكەن.

“كۇندە نەشە ءتۇرلى ادام حابارلاسادى. جوق دەگەندە 200-300 ادام زۆوندايتىن شىعار. ءبارىنىڭ دە تانىسقىسى كەلەدى. سول ءۇشىن مەن تەلەفون ءنومىرىمدى اي سايىن اۋىستىرىپ وتىرۋعا ءماجبۇرمىن”، – دەيدى قايرات نۇرتاس.

جۇلدىز قاۋىمى تىڭدارماندارىنىڭ بۇل قىلىقتارىن بۇگىندە كۇلىپ ەسكە الادى. ءبىراق الداعى ۋاقىتتا مۇنداي قىلىقتار قايتالانباسا ەكەن دەيدى.