ەلىمىزدە قولعا الىنعان جەر رەفورماسىنا نارازىلىق تانىتقان بىرنەشە بەلسەندى كەشەدەن باستاپ قاماۋعا الىنۋدا. ولارعا قر-نىڭ «اكىمشىلىك قۇقىقبۇزۋشىلىقتار تۋرالى» كودەكسىنىڭ بەيبىت شەرۋلەر ۇيىمداستىرۋ مەن وتكىزۋگە قاتىستى باپتارىن بۇزدى دەگەن ايىپ تاعىلۋدا، - دەپ حابارلايدى Qamshy.kz ازاتتىققا سىلتەمە جاساپ.

كەشە استانا، الماتى قالالارىندا جانە وڭىرلەردە سەگىز ادام تۇتقىندالسا، بۇگىن ولاردىڭ سانى وننان اسقانى بەلگىلى بولىپ وتىر. پوليسيا تۇتقىنداعان ازاماتتاردىڭ دەنى 10-15 تاۋلىككە اكىمشىلىك قاماۋعا الىندى.

استانا قالاسىندا ازاماتتىق بەلسەندى، زاڭگەر، «الاش جولى» قوزعالىسى جەتەكشىلەرىنىڭ ءبىرى ماقسات ءىلياس ۇلى كەشە كەشكە سوت شەشىمىمەن 10 تاۋلىككە قامالدى. وعان «رۇقسات ەتىلمەگەن نارازىلىق اكسياسىنا شاقىردى» دەگەن ايىپ تاعىلعان.

ماقسات ءىلياس ۇلى - جەر رەفورماسى كوميسسياسى مۇشەسى. كوميسسيانىڭ العاشقى وتىرىسىنا قاتىسقان ول كەلەسى جيىندارىنا بارۋدان باس تارتقان.

اتىراۋدا ازاماتتىق بەلسەندى ماكس بوقايەۆ 15 تاۋلىككە قامالدى. ونى كەشە ورال پروكۋراتۋراسى شاقىرىپ، جاۋاپ العان ەدى. بوقايەۆ اباقتىعا رۇقسات ەتىلمەگەن نارازىلىق اكسياسىنا شاقىرعانى ءۇشىن جابىلعان.

اتىراۋ اكىمشىلىك سوتى تالعات ايان ەسىمدى ازاماتتىق بەلسەندىنى دە 15 تاۋلىككە قاماۋعا شەشىم شىعارعان.

بەلسەندىلەردى قاماۋ شەشىمى اكىمشىلىك قۇقىق كودەكسىنىڭ 488-بابى ("بەيبiت جينالىستاردى، ميتينگiلەردى، شەرۋلەردى، پيكەتتەر مەن دەمونستراسيالاردى ۇيىمداستىرۋ جانە وتكiزۋ ءتارتiبi تۋرالى زاڭناماسىن بۇزۋ") 3-تارماعىنا نەگىزدەلگەن.

ماكس بوقايەۆ پەن تالعات ايان – اتىراۋدا ءساۋىردىڭ 24ء-ى وتكەن جەردى ساتۋ مەن شەتەلدىكتەرگە جالعا بەرۋگە قارسى ميتينگ ۇيىمداستىرعان بەلسەندىلەر.

مامىردىڭ 17ء-سى كۇنى كەشكى ساعات التى-جەتىلەر شاماسىندا الماتىلىق قۇقىق قورعاۋشى باقىتجان تورەعوجينا ءوزىن جانە تاعى بىرنەشە ازاماتتى پوليسەيلەر ۇستاپ، المالى اۋدانارالىق اكىمشىلىك سوتىنا اپارا جاتقانىن حابارلادى.

باقىتجان تورەعوجينا «مەنى 488-باپ، ياعني «رۇقسات ەتىلمەگەن ميتينگ ۇيىمداستىرۋ» بابى بويىنشا ايىپتاپ وتىر. مەنىمەن بىرگە پوليسيا كولىگىندە وتىرعان گەرويحان قىستاۋبايەۆ «بۇزاقىلىق» بابى بويىنشا ايىپتالعان، ال، التىناي ءادىلوۆا، سۇيىندىك الدابەرگەنوۆ پەن قۇرال يسمانوۆقا 488-باپ بويىنشا ايىپ تاعىپ جاتىر» دەگەن.

كەيىننەن بەلسەندىلەر Facebook پاراقشاسىندا سۇيىندىك الدابەرگەنوۆ پەن باقىتجان تورەعوجينانىڭ اكىمشىلىك قۇقىق كودەكسىنىڭ 488-بابى بويىنشا 15 تاۋلىككە قامالعانىن جازدى. Cوتقا قاتىسقان ادۆوكات جانار بالعابايەۆا ولارمەن بىرگە مارات ۋاتحان ەسىمدى ازامات پەن جالپىۇلتتىق سوسيال-دەموكراتيالىق پارتياسىنىڭ (جسدپ) مۇشەسى قۋات كۇنبولاتوۆ دەگەن ادامنىڭ دا «رۇقسات ەتىلمەگەن ميتينگ ۇيىمداستىرۋ» ايىبى بويىنشا 15 تاۋلىككە قامالعانىن حابارلادى.

ءتۇرلى اقپاراتتارعا قاراعاندا، الماتىدا بەلسەندىلەر ەرمەك نارىمبايەۆ جانە ساحيب جاڭابايەۆ تا ۇستالعان. كەيىن ولاردىڭ بوساتىلعانى حابارلاندى.

ال تۇستەن كەيىن اۋدانارالىق اكىمشىلىك سوت ءمولدىر ادىلوۆانى اكىمشىلىك قۇقىق كودەكسىنىڭ 488-بابى (رۇقساتسىز ميتينگ ۇيىمداستىرۋ) بويىنشا ايىپتاپ، 15 تاۋلىككە اباقتىعا جاپتى.

ەرمەك نارىمبايەۆتىڭ ايتۋىنشا، گەرويحان قىستاۋبايەۆقا قاتىستى سوت تا بۇگىن ءوتۋى كەرەك.

كەشە الماتى وبلىسى تالعار اۋداندىق ىشكى ىستەر باسقارماسى (ءىىب) قىزمەتكەرلەرىنىڭ 22 جاستاعى ماناس ءابدىماناپ ەسىمدى ازاماتتى ۇستاپ اكەتكەن بولاتىن.

بۇگىن اتالعان اۋداننىڭ بىرلىك اۋىلى تۇرعىندارى ماناس ءابدىماناپ پەن قۋانىش ءسۇلتانالي ەكەۋىنىڭ 15 تاۋلىككە قامالعانى انىقتالدى. ونى وسى اۋداننىڭ ءىىب ۋچاسكەلىك ينسپەكتورلار باستىعى نۇرجان كۇنتۋنوۆ راستادى. «اكىمشىلىك كودەكستىڭ 488-بابى بويىنشا (رۇقسات ەتىلمەگەن ميتينگ ۇيىمداستىرۋ) ولار 15 تاۋلىككە قامالدى»، - دەيدى كۇنتۋنوۆ.

جەزقازعانداعى ازاماتتىق بەلسەندى بەرىك جاعىپاروۆ تا Facebook پاراقشاسى ارقىلى ءوزىنىڭ قالا پروكۋراتۋراسىنا شاقىرىلعانىن حابارلادى. جاعىپاروۆ پروكۋراتۋراعا ءوزىنىڭ جەر ماسەلەسى بويىنشا شاقىرىلۋى مۇمكىن ەكەنىن جازدى.

ال، باتىس قازاقستان وبلىسى ورال قالاسىنداعى ازاماتتىق بەلسەندى جانات ەسەنتايەۆتىڭ ۇستىنەن قىلمىستىق كودەكستىڭ 174-بابى (ارازدىق قوزدىرۋ) بويىنشا ايىپتالىپ، سوتقا دەيىنگى تەرگەۋ شاراسى اياسىندا ءۇش كۇنگە تۇتقىندالعان.

سونداي-اق، اقپارات قۇرالدارى ازاتتىق سايتىنىڭ وقو-داعى ءتىلشىسى ديلارا يسا مەن شىمكەنتتەگى «تەمىرقازىق-وي» گازەتىنىڭ باس رەداكتورى انار سۇلەيەۆا دا ازاتتىققا پروكۋراتۋراعا شاقىرتىلعانىن حابارلادى.