استانا قالاسىندا 14 مامىر كۇنى كاسىپقوي بوكس كەشى وتكەنى بەلگىلى. Diamond Ring پروموۋتەرلىك كومپانياسى وتكىزگەن كەشتە گرۋزيا، وزبەكستان، ۋكراينا، بەلورۋسيا مەن قازاقستان سىندى بەس ەلدىڭ بوكسشىلارى جۇدىرىقتاستى. قازاقستان اتىنان ايدار شارىبايەۆ، بەكمان سويلىبايەۆ، بەرىكباي نۇرىمبەتوۆ، ەلدوس سارقۇلوۆ سىندى كاسىپقوي بوكسشىلار شارشى الاڭعا شىققان ەدى. سول كەشتە ءوزىنىڭ كاسىپقوي بوكستاعى ەكىنشى كەزدەسۋىن وتكىزىپ، گرۋزيا بوكسشىسى رۋبەن موۆسەسياندى جەڭگەن ايدار شارىبايەۆ «قامشى» پورتالىنا قىسقاشا سۇحبات بەرگەن بولاتىن.

-جەڭىسىڭ قۇتتى بولسىن، ايدار! كوڭىل-كۇي قالاي؟

-كوڭىل-كۇي جاقسى. استانادان الماتىعا ەندى جەتىپ جاتىرمىن. قۇتتىقتاۋىڭىزعا راقمەت.

-كەشەگى جەكپە-جەك تۋرالى ايتا وتىرساڭ.

-ول جەكپە-جەك جالعىز مەن قاتىسقان شارا ەمەس، ۇوكەن بوكس كەشى بولدى. ءوزىم جاتتىعاتىن Diamond Ring پروموۋتەرلىك كومپانياسى ۇيىمداستىرعان كاسىپقوي بوكس كەشىنە بەس ەلدەن بوكسشىلار كەلدى. كەش بارىسىندا بارلىعى 8 كەزدەسۋ ءوتتى. وندا WBC Eurasia Pacific نۇسقاسى بويىنشا چەمپيوندىق تيتۋلى ساراپقا سالىندى.

- بۇل كەزدەسۋگە قالاي شىقتىڭ؟ كىم ۇسىنىس تاستادى؟

- بۇل مەنىڭ كاسىبي الاڭداعى ەكىنشى كەزدەسۋىم بولسا، Diamond Ring اتىنان شىققان العاشقى جەكپە-جەگىم ەكەنىن، وسى رەتتە پروموۋتەرلىك كومپانيا جەتەكشىلەرىنە، ارىپتەس اعالارىما العىسىمدى بىلدىرەمىن.

«Diamond ring» پروموۋتەرلىك كومپانياسىن بۇرىن سىرتتاي ەستىپ، ءبىلىپ جۇرەتىنمىن. اتقارىپ جاتقان جۇمىستارى ۇنايتىن. ءوزىم الماتىدا جاتتىعىپ جۇرگەنمىن. ءبىر كۇنى وسى كومپانيانىڭ جاتتىقتىرۋشىسى داۋرەن جولداسوۆ اعامىز حابارلاسىپ، ءوزىمدى 14 مامىر كۇنى وتەتىن جەكپە-جەك كەشىندە تەكسەرىپ كورۋىمدى ۇسىندى. ەكەۋمىز بۇرىننان تانىس بولاتىنبىز. ءبىراز بوكسشىلاردى باپتاعان، ءوز ءىسىنىڭ قاس مامانى. قۋانا كەلىسىپ، بىردەن استاناعا قۇستاي ۇشتىم. شىنىن ايتسام، بۇل – ماعان بەرىلىپ وتىرعان ۇلكەن مۇمكىندىك.

-كەشە سەنەن جەڭىلىس تاپقان بوكسشى تۋرالى دا ايتا وتىرساڭ...

- قارسىلاسىم – رۋبەن موۆسيسيان. گرۋزيادان بولعانىمەن، ۇلتى ارميان ەكەن. وتە تاجىريبەلى بوكسشى كورىنەدى. كاسىپقوي بوكستا 36 جەكپە-جەك وتكىزگەنىنەن حاباردارمىن. ونىڭ 21-ىندە جەڭىسكە جەتىپ، 16-سىن نوكاۋتپەن اياقتاعانىن بىلەمىن. ال، ءبىز كاسىپقوي بوكس الەمىنە ەندى عانا قادام باسىپ كەلە جاتىرمىز دەگەندەي. سوندىقتان، بۇيىرتسا تالاي جەڭىس ءالى الدا دەپ ويلايمىن.

-كەشەگى كەزدەسۋدە شارشى الاڭعا «ءدۇر قامشى» ءانىنىڭ سۇيەمەلدەۋىمەن شىققان ەكەنسىڭ. بۇل ءاندى تاڭداۋىڭا نە سەبەپ بولدى؟

-«ءدۇر قامشىنى» الەۋمەتتىك جەلىلەردىڭ بىرىنەن قۇلاعىم شالىپ قالدى. رۋحتى ءان ەكەنىن، قازاقتىڭ تەرەڭ تاريحىن، بۇگىنگى بولمىسىن اشاتىن شىعارما ەكەنىن بىردەن اڭعاردىم. سودان ارنايى ىزدەپ ءجۇرىپ، ءان اۆتورلارىنا شىقتىم. بوكس كەشىندە ءسويتىپ، «ءدۇر قامشىنى» ءوزىم قويعىزدىم.

- ءوزىڭ ايتقانداي، بۇل كاسىپقوي بوكستاعى ەكىنشى جەكپە-جەگىڭ بولدى. العاشقى ايقاس قالاي وتكەنى ەسىڭدە مە؟

- ارينە، ەسىمدە. مەنىڭ كاسىپقوي بوكسقا ويىسۋىما بىردەن-بىر سەبەپكەر بولعان ادام – بار قازاقتىڭ ماقتانىشى قانات يسلام اعام. ەكەۋمىز جاقسى ارالاسامىز. ءبىر كۇنى حابارلاسىپ، الداعى ايقاسىنا دايىندالىپ جاتقانىن، سوعان سپاررينگ-سەرىكتەس ىزدەپ جۇرگەنىن ايتتى دا، مەنى دە وزىمەن بىرگە ماياميگە شاقىردى. ول جاقتا ءبىراز جاتتىققان سوڭ دومينيكان ەلىندە وتكەن جەكپە-جەك كەشىنە قاتىسىپ، جەرگىلىكتى بوكسشىنى ءۇشىنشى راۋندتا نوكاۋتپەن جەڭگەنمىن.

-بوكستان ءبىراز قول ءۇزىپ قالعان دا كەزدەر بولىپتى. ول مىنا كەزدەسۋدە كەسىرىن تيگىزبەدى مە؟

- وتباسىلىق جاعدايلار اسەر ەتىپ، بوكستان از-كەم قول ءۇزىپ قالعان كەزدەر دە بولدى. ونىڭ ۇستىنە، قازاقستاننان جاقسى، سەنىمدى پروموۋتەرلىك كومپانيا تابىلماي، ءبىراز ءجۇرىپ قالدىم. ال شەتەلدىك پروموۋتەرلەرمەن جۇمىس جاساعىم كەلگەن جوق. بالكىم، تاعدىر مەنىڭ «Diamond ring كە» قوسىلعانىمدى قالاعان شىعار. ەندى ماعان سەنىم ارتىپ، مۇمكىندىك بەرىپ وتىرعان ازاماتتاردىڭ ۇمىتتەرىن اقتاۋعا تىرىسامىن.

- سۇحباتتساقانىڭا راقمەت. وقىرماندار اتىنان ءبىز دە زور جەڭىستەر تىلەيمىز!

-راقمەت.

ەسكەرتۋ: استانادا وتكەن بوكس كەشىندەگى جەكپە-جەكتەردىڭ ۆيدەوسىن مىنا سىلتەمە بويىنشا كورە الاسىزدار.

سۇحباتتاسقان: ەرلان تولەۋباي