«جەر كودەكسىنە» قاتىستى ماسەلە ءالى دە ءوز شەشىمىن تاپپاي كەلەدى. جەر رەفورماسى جونىندەگى ارنايى كوميسسيا قۇرىلىپ، العاشقى تالقىلاۋ وتىرىسىن وتكىزدى. دەگەنمەن بۇل كومييسيا مۇشەلەرىنىڭ ءوز ارالارىندا تۇسىنىسپەستىك بولىپ، كەيبىرى مۇشەلىكتەن كەتىپ جاتقاندا، حالىق سەنىمىنە تاعى دا كۇدىك ۇيالادى.

ەل اراسىندا «21 مامىر ميتينگكە شىعامىز» دەگەن اڭگىمە تاراپ، ىشكى ىستەر مينيسترلىگى ينتەرنەت-كەڭىستىكتى باقىلاۋعا الىپ، قاۋىپسىزدىك شارالارىن كۇشەيتى.

بۇل ۋاقىتتا قوعام پىكىرى ەكىگە جارىلىپ، «جەر كودەكسىنە» قارسى شىققاندار مەن ۇكىمەتتى قولداۋشىلار توبى قىزۋ ءوزارا پىكىرتالاستا قالدى.

بۇگىن Qamshy.kz بىرنەشە ونەر ادامىنا حابارلاسىپ، ەندىگى كوزقاراستارىن سۇراپ ءبىلدى. ال ونەر يەلەرى ەندىگى ءۇمىت قۇرىلعان جەر كوميسسياسىندا ەكەنىن العا تارتتى.

«ەلمەن، حالىقپەن بىرگەمىز. جەر ساتىلماۋ دا، جالعا بەرىلمەۋ دە كەرەك. وعان ازاماتتىق كوزقاراسىم قارسى. ءبىزدىڭ جاسىمىز 40-قا كەلدى، ەندى 60-قا كەلگەندە بالا-شاعامىزدىڭ كۇنى قالاي بولادى دەپ ۋايىمدايمىز. جالپى، ادامداردىڭ الاڭعا شىعىپ، كوتەرىلىس بولعانىن قولدامايمىن. دەگەنمەن دە، مەن ءوز جەرىمدى قورشاپ، ءتىپتى كورشىلەرىمنىڭ رۇقساتسىز كىرۋىنە جول بەرمەيمىن عوي. ول زاڭدى. سول سياقتى جەرگە شەتەلدىكتەردى كىربىزبەيمىز. قولدان كەلگەنشە جالعا بەرمەۋگە تىرىسۋىمىز كەرەك»، - دەدى ءانشى ءومىرقۇل اينيازوۆ.

ال بەلگىلى اكتەر بەكجان تۇرىس ايتقان پىكىرلەرىنىڭ بۇرمالانىپ تاراپ جاتقانىنا بايلانىستى ەش جەردە ەشقانداي پىكىر بىلدىرگىسى كەلمەيتىنىن ايتتى.

«ءبىز ايتقان پىكىرلەر دۇرىس جەتپەي قالىپ جاتىر. سوندىقتان مەن ءقازىر ەش پىكىر ايتپاۋعا شەشتىم. 21-ىنە ميتينگكە شىعامىن با، شىقپايمىن با، ول مەنىڭ جەكە ازاماتتىق ەركىم. باسقا ەشتەڭە ايتقىم كەلمەيدى»، - دەدى بەكجان تۇرىس.

دەگەنمەن ونەر ادامدارىنىڭ اراسىندا قۇرىلعان كوميسسيادان ءۇمىت كۇتىپ، سەنىم ارتاتىندار دا تابىلدى. اكتەر باقىت تۋشايەۆ حالىقتى ميتينگە شىقپاۋعا شاقىردى. 

«ءقازىر كوميسسيا قۇرىلىپ، ءبارى جۇمىس ىستەپ جاتىر عوي. 21 مامىردا ميتينگكە شىعۋدىڭ قاجەتى جوق دەپ ويلايمىن. ءالىپتىڭ ارتىن باعۋ كەرەك، كۇتۋ كەرەك دەپ ويلايمىن. قۇرىلعان كوميسسيا ۇكىمەتتىڭ حالىقپەن ساناسىپ جاتقاندىعىنىڭ كورىنىسى عوي.  ەندىگى ءۇمىتتىڭ ءبارى كوميسسيا مۇشەلەرىندە.  سوندىقتان جۇرتتى الاڭعا شىقپاۋعا شاقىرامىن، ءوزىم دە شىقپايمىن»، - دەدى باقىت تۋشايەۆ.

ايتا كەتەيىك، بۇعان دەيىن ءبىر توپ ونەردەگى ازاماتتار وتاندىق تەلەارنالاردىڭ ءبىرى ارقىلى اتالمىش ماسەلەگە قاتىستى ءوز پىكىرلەرىن بىلدىرگەن بولاتىن. ساكەن مايعازييەۆ ءوز سوزىندە «كەرەك بولسا، حالىقپەن بىرگە 21 مامىردا الاڭعا ءبىز دە شىعامىز» دەگەن ەدى.