شەتتەن كەلگەن قانداستارىمىزدىڭ دا جەر ساتىپ الۋ قۇقىعىن شەكتەمەۋىمىز كەرەك دەدى «مانات» شارۋا قوجالىعىنىڭ باسشىسى ساحا ماناتوۆ جەر رەفورماسى بويىنشا كوميسسيانىڭ بۇگىنگى وتىرىسىندا، - دەپ حابارلايدى Qamshy.kz.

«جەردىڭ ءقادىرىن تەك قانا جەرمەن اينالىساتىن ازامات بىلەدى. مەنى اگروسالاسىندا جۇرگەنىمە ءبىراز جىل بولدى. سول سەبەپتى جالعا بەرىلگەن جەرلەردى قازاقستان ازاماتتارىنىڭ ساتىپ الۋىنا مۇمكىندىك بەرۋ دۇرىس دەپ ەسەپتەيمىن. بىزگە ءقازىر جەردىڭ رەفورماسى قاجەت. جەكە مەنشىك بولسا، جەردىڭ سۇرانىسى ارتادى. قاجەتتىلىگى پايدا بولادى»، - دەدى ماناتوۆ.

سونداي-اق، قازاقستاندا تۋماعان ازاماتتارعا جەر ساتىلماسىن دەگەنگە قوسىلمايتىندىعىن جەتكىزدى. 

"مەن ءوزىم جامبىل وبلىسىنىڭ تۇرعىنىمىن، جامبىل وبلىسىندا 270 مىڭ قانداسىمىز تۇرادى. ياعني، قازاقستاندا دۇنيەگە كەلمەگەن قازاقتار. سوندا ءبىز، 270 مىڭ قانداسىمىزدىڭ قۇقىعىن شەكتەيمىز بە؟ وسى ماسەلەنى جاقسىلاپ قاراپ، دۇرىس شەشىم قابىلداۋىمىز كەرەك»، - دەدى ساحا ماناتوۆ.