بۇگىن جول قوزعالىسىنىڭ قاۋىپسىزدىگى جايىندا شۇعىل جيىن وتكىزگەن شىمكەنت قالاسىنىڭ اكىمى عابيدوللا ءابدىراحىموۆ «جۇگەنسىز» جاس جۇرگىزۋشىلەردى مالعا تەڭەدى، - دەپ حابارلايدى Qamshy.kz Otyrar.kz-كە سىلتەمە جاساپ.
«ەگەر بالالارىمىز جولدا ءولىپ جاتسا، ءبىز مۇندا نە ىستەپ وتىرمىز؟!» دەدى قالا اكىمى جيىنعا قاتىسقان ىشكى ىستەر ورگاندارى وكىلدەرى مەن پەداگوگتارعا. ول شىمكەنتتە جول قوزعالىسىنىڭ قاۋىپسىزدىگى ءۇشىن ەشقانداي جاعدايلاردىڭ جاسالماعانىن اشىنا ايتتى.
«نەگە ءبىز قوعامدىق كولىكتىڭ جۇمىسىن وڭ جولعا قويا الماي كەلەمىز، نەگە مەكتەپتى وقۋشىلاردى تاسىمالدايتىن اۆتوبۋستارمەن قامتاماسىز ەتپەيمىز، نەگە ءبىزدىڭ باعدارشامدار جۇمىس ىستەمەيدى، نەگە ءبىزدىڭ جولداردا كورۋ مۇمكىندىگىنە كەدەرگى كەلتىرەتىن دۇڭگىرشەكتەر تۇرادى؟» دەگەن اكىمنىڭ سۇراقتارىنا قۇزىرلى ورگان قىزمەتكەرلەرى تەك ۇنسىزدىكپەن جاۋاپ بەردى.
«2015 جىلدىڭ 4 ايىندا ءبىزدىڭ جولداردا 440 جول كولىك وقيعاسى ورىن الىپ، سالدارىنان 16 ادام قازا تاپقان، ولاردىڭ 10-ى بالالار. ءتۇرلى دەنە جاراقاتتارىن 556 ادام العان. 2016 جىلدىڭ 4 ايىندا 321 اپات ورىن الىپ، 386 ادام جاراقات الدى. قايتىس بولعاندار سانى - 22، ولاردىڭ 12ء-سى بالالار»، - دەيدى ءابدىراحىموۆ.
«جول كولىك وقيعاسىنىڭ ەكى سەبەبى بار دەپ ويلايمىن. ءبىرىنشىسى - كولىكتى ايداۋ مادەنيەتى. ءبىزدىڭ كەيبىر جۇرگىزۋشىلەر جولدا وزدەرىنەن باسقا ەشكىم جوقتاي كولىك ايدايدى. بۇگىن مەن اۋرۋحانادان كەلە جاتقاندا الدىمىزدان جوعارى جىلدامدىقپەن تويوتا كامري كولىگى ءوتتى. ونى پوليسەي توقتاتا العان جوق. ارتىنان قۋامىن دەپ جۇرگەنىندە شاڭ قاپتىرىپ كەتتى. مەن جۇرگىزۋشىمە الگى كولىكتىڭ سوڭىنا تۇسۋگە تاپسىردىم. ۇيىنە دەيىن قۋىپ باردىق، ءوزى ءتۇسىپ تىعىلىپ قالدى. ءبىراق، ول مىندەتتى تۇردە جازاسىن الاتىن بولادى. وسىلايشا جول ەرەجەسىن بۇزىپ ايدايتىندار وزدەرىن مال سەكىلدى ۇستايدى، بۇلاردىڭ كوبى جاستار» دەپ اتاپ ءوتتى شىمكەنت اكىمى اتالعان جيىن بارىسىندا.
ونىڭ ايتۋىنشا، جول اپاتىن تۋدىراتىن ەكىنشى سەبەپ - جولداردىڭ تىم ساپاسىزدىعى. ول سونداي-اق، كەشە توعىز ادامدى كولىگىمەن قاعىپ كەتكەن 19 جاستاعى بوزبالانىڭ قاتاڭ جازالانۋىن پوليسەيلەرگە تاپسىردى.
«كۇدىكتى - باقتىبەك ايدوس ەڭ قاتاڭ جازانى الۋى ءتيىس» دەپ ءسوزىن ءتۇيدى عابيدوللا ءابدىراحىموۆ.
ايتا كەتەيىك، وسى جيىن بارىسىندا وقۋشىلارعا جول قاۋىپسىزدىگى جۇمىستارىن ءتيىستى دارەجەدە جۇرگىزبەگەنى ءۇشىن شىمكەنت قالالىق ءبىلىم ءبولىمىنىڭ باسشىسى قىزمەتىنەن بوساتىلدى.
