استانادا باستالعان بالامالى ەنەرگەتيكا بويىنشا I سامميتتە  ەنەرگەتيكا ءمينيسترى قانات بوزىمبايەۆ سۇحباتتى ورىس تىلىندە بەرۋدى ءوتىندى، - دەپ حابارلايدى Qamshy.kz Baq.kz-كە سىلتەمە جاساپ.

«بۇل سالادا تەرمينولوگيا كوپ. سوندىقتان مەن ورىسشا سويلەيىنشى؟»، – دەپتى  مينيستر جيىن ۇستىندە. قازاق ءتىلدى جۋرناليستەر ونىڭ بۇل ءوتىنىشىن قۇپتاعاننان كەيىن مينيستر بالامالى ەنەرگەتيكا تاقارىبىنا ارنالعان سۇحباتىن ورىس تىلىندە بەردى.

ايتا كەتەيىك، جاقىندا اتالعان ماسەلەنى مادەنيەت جانە سپورت ءمينيسترى ارىستانبەك مۇحامەدي ۇلى دا كوتەرگەن.

«شىنى كەرەك، «مينيستەرستۆو ينۆەستيسيي» (ينۆەستيسيالار جانە دامۋ مينيسترلىگى – اۆت.) دەيمىز عوي، ولار حاتتارىنان شاتاسىپ جاتادى، قازاقشا اۋدارعاندا. ەندى، اناۋ جاڭادان كەلگەن سوزدەر نە وزدەرى تۇسىنبەيدى. سونى ءبارىمىز…ينۆەستيسيانىڭ ءوزىن وزگەرتىپ جاتامىز بىرنەشە…»، – دەدى ول قوعامدىق كەڭەس الدىنداعى ەسەپ بەرۋ كەزدەسۋى كەزىندە.

سول كەزدەسۋدە ا. مۇحامەدي ۇلى ءتىل ماسەلەسىنىڭ ءبىر بولىگى مادەنيەت جانە سپورت مينيسترلىگىندە، ءبىر بولىگى ءبىلىم جانە عىلىم مينيسترلىگىندە ەكەنىن جەتكىزگەن.

«ءتىل ماسەلەسى بويىنشا مادەنيەت جانە سپورت مينيسترلىگىن سىناعاندا ءبىز ءبىلىم جانە عىلىم مينيسترلىگىنە سىلتەيمىز. ال، ونى سىنعا العاندا بىزگە سىلتەپ جاتادى. بىزگە جاقسى بولدى، بىر-بىرىمىزگە سىلتەيمىز دە، ناقتى جاۋاپ بەرەتىن ەشكىم جوق»، – دەدى ارىستانبەك مۇحامەدي ۇلى.

ونىڭ ايتۋىنشا، قازىرگى كەزدە مينيسترلىك ءتىل ماسەلەسىن ناقتى ءبىر مەكەمەگە بەرۋ قاجەتتىگىن العا تارتىپ وتىر.

«ايتپەسە، قازتەست ءبىلىم مينيسترلىگىندە، ادىستەمەسى بىزدە. شىنى ايتۋ كەرەك، ەكى جاقتاعى جۇمىستى ۇيلەستىرە الماي جاتقان جاعدايىمىز بار»، – دەدى ول. وسى ورايدا ول ءتىل ماسەلەسىن جەر داۋىمەن سالىستىردى.