ءال-فارابي اتىنداعى قازاق ۇلتتىق ۋنيۆەرسيتەتىنىڭ حالىقارالىق قاتىناستار فاكۋلتەتىندە جاقىندا «تۋرا بي» كلۋبىنىڭ ۇيىمداستىرۋىمەن ءداستۇرلى «ءتىلىم مەنىڭ - تىرەگىم» اتتى جاس اقىندار مەن كوركەمسوز وقۋ شەبەرلەرىنىڭ تارتىستى دوداسى ءوتتى، - دەپ حابارلايدى Qamshy.kz.
سايىسقا 1- جانە 2-كۋرستىڭ تالانتتى دا تالاپتى ستۋدەنتتەرى قاتىسىپ، فاكۋلتەتتىڭ پوەزيا پارقىن پايىمداي الار جوعارعى كۋرس ستۋدەنتتەرى - نۇرسۇلتان بەكقايىروۆ، ايمەرەك بەكمىرزا، نازەركە بۇرحان جانە اعا كۋراتور-ۇيىمداستىرۋشىسى، «تۋرا بي» كلۋبىنىڭ جەتەكشىسى گۇلشات احمەتالييەۆا ءادىل تورەلىك ەتتى. ال جۇرگىزۋشىلىكتىڭ تىزگىنىن ءسوزى سالماقتى، ءوزى جان-جاقتى، جاس تا بولسا، باس بولىپ، فاكۋلتەت يگىلىگىنە قىزمەت ەتىپ جۇرگەن بەلسەندى ازامات، 3-كۋرس ستۋدەنتى ءادىل تۇمەنوۆ ۇستادى.
كەش شىمىلدىعى فاكۋلتەت بەلسەندىسى گۇلىستان قايرات قىزىنىڭ مانەرلى ورىنداۋىنداعى «عاشىقتىق عالاماتى» اتتى م.شاحانوۆتىڭ پوەماسىمەن اشىلدى. ابايدىڭ، سۇلتانماحمۇتتىڭ پاتريوتتىق تاقىرىپتاعى جالىندى جىرلارىمەن قوسا، جاس اقىنداردىڭ جۇدىرىقتاي جۇرەكتەرىن جارىپ شىعىپ، سياسى كەۋىپ ۇلگەرمەگەن تىرناقالدى تۋىندىلارى وقىلعان بۇل كەشتە قاتىسۋشىلاردى ءبولىپ-جارىپ تورەلىك ەتۋ وڭايعا سوقپاسا دا، «قازاقشا سويلە!» اتتى ومىرشەڭ ولەڭىن ورنەكتەي وقىعان مۇراتجان قوسجان قازىلار القاسىنىڭ ەڭ جوعارعى باعاسىنا يە بولدى. سول سەكىلدى ابايدىڭ «ون سەگىزىنشى قارا ءسوزىن» جان ءبىتىرىپ وقىعان دانا ۇيسىنبەك تە، م.شاحانوۆتىڭ «وتىرار داستانىن» ناقىشىنا كەلتىرە وقىپ، تىڭداۋشىنى تىڭعا جەتەلەگەن جۇلدىز قايىپجان دا كوركەمسوز وقۋشىلاردىڭ اراسىنان العاشقى ورىنعا لايىق دەپ تانىلدى. سونىمەن قاتار، جىر سۇيەر قاۋىمنىڭ ريزاشىلىعىنا 1-كۋرس ستۋدەنتتەرى نۇراينا ءسادۋاقاسوۆا، اسقار امانگەلدييەۆ، ءلاززات جۇمانبايەۆا، جاسمين جاقسىگەلدينوۆا بولەنە ءبىلدى.
جەڭىمپازداردى جانە وزگە دە جۇلدەگەرلەردى فاكۋلتەتتىڭ اعا كۋراتور-ۇيىمداستىرۋشىسى، «تۋرا بي» كلۋبىنىڭ جەتەكشىسى احمەتالييەۆا گۇلشات ۋابيدەن قىزى ارنايى ديپلومدارمەن ماراپاتتادى.
تامىرى تەرەڭ، تاريحى كەنەن تۋعان ءتىلىمىزدىڭ تۇعىرىن بيىگىرەك قويعان، جىرعا قوسىپ، مەرەيىن ۇستەم ەتكەن ولەڭ سۇيەر ورەندەرىمىزدىڭ شابىتتارىنىڭ شىڭدالىپ، ونەرلەرىنىڭ ورىستەي بەرۋىنە شىن جۇرەكتەن تىلەكتەسپىز! نازارلارىڭىزعا 1-كۋرس ستۋدەنتى نۇراينا ءسادۋاقاسوۆانىڭ «قۇدىرەتتىڭ قۇدىرەتى» اتتى تاڭداۋلى تۋىندىسىن ۇسىنامىز:
قارسى العاندا ەلۋگە ەنگەن الپاۋىتتار الەمى،
كوز تىككەندە ەلىمىزگە دۇنيەنىڭ بار ەلى.
سەنسىڭ، ءتىلىم، - قازاق قىلىپ تانىتقان بار الەمگە،
سەنسىڭ، ءتىلىم، - قازاقتىعىمنىڭ وشپەيتۇعىن دالەلى.
سەنسىڭ، ءتىلىم، - ەڭ قىمباتتى «ءۇش باقىتتىڭ» بىرەۋى،
سەنسىڭ، ءتىلىم، - قازاعىمنىڭ ماڭگى سوعار جۇرەگى.
حالقىمىزدىڭ باعا جەتپەس قازىناسى، بايلىعى،
ونى ۇلىقتاۋ – پارىزىمىز ءبىز بەن ءسىزدىڭ كيەلى.
ءتىلسىز جۇرگەن، ءۇنسىز جۇرگەن قايسى ۇلتتى كورىپ ەڭ؟
ءتىلسىز، ءدىنسىز، مادەنيەتسىز تەڭ ەمەس پە ولىمەن؟!
ءتىلىڭ وشسە، سەن دە وشەسىڭ، ۇلتىڭ بىرگە وشەدى،
ءاربىر ۇلتتىڭ بولاشاعى قالىپتاسار تىلىمەن.
«قازاق ءتىلى – ەڭ باي ءتىل» دەپ بابام بەرگەن باعاسىن،
بۇدان ارتىق قىمبات تەڭەۋ، ايتشى، قايدان تاباسىڭ؟
ءتىلدىڭ ۇلى قۇدىرەتىنىڭ، ۇلكەندىگىنىڭ قاسىندا
بار بولعانى توپىراقتىڭ تۇيىرىندەي عاناسىڭ.
قانشا دانا، قانشا اقىننىڭ شىعارماسىن شارلاسام،
قانشاما ءسوز سويلەسەم دە، قانشا شۋماق ارناسام،
وسى ايتقان سوزدەرىمنىڭ قورىتىندىسى بىرەۋ-اق:
مەن ءۇشىن ءتىل – قۇدىرەتتىڭ قۇدىرەتى ءارقاشان!
گۇلشات احمەتالييەۆا
حالىقارالىق قاتىناستار فاكۋلتەتىنىڭ اعا كۋراتور-ۇيىمداستىرۋشىسى، «تۋرا بي» كلۋبىنىڭ جەتەكشىسى
نازەركە بۇرحان
3-كۋرس ستۋدەنتى، حقف ستۋدەنتتەر عىلىمي قوعامىنىڭ ءتورايىمى.
