ىشكى ىستەر ءمينيسترى قالمۇحانبەت قاسىموۆ استانادا ەسەپ بەرۋ كەزدەسۋىن وتكىزىپ، وندا اقتوبەدە ورىن العان قاندى وقيعاعا قاتىستى مالىمەتتەرمەن ءبولىستى، - دەپ حابارلايدى Qamshy.kz.

ءمينيستردىڭ ايتۋىنشا، لاڭكەستىك ارەكەت ۇيىمداستىرماق بولعانداردىڭ سانى ءاۋ باستا 45 ادام بولعان كورىنەدى.

«ولاردىڭ سانى ناقتىلاندى – 45 ادام. ءبىراق، ولار جيھاد جاريالاپ، پاتەردەن شىققان كەزدە ءبىرازى ول شەشىمنەن باس تارتقان. ولاردىڭ بارلىعى انىقتالدى، ءقازىر تەرگەلۋ ۇستىندە. قالعان 26 ادام ءارى قاراي كەتكەن. ءبىراق، جول بويىندا تاعى ۇشەۋى ول توپتان قالىپ قويعان. قارۋ-جاراق ساتاتىن دۇكەنگە كەلگەندە ءبىر سودىر تاعى كەتىپ قالعان. بەينەكامەرالاردان ءبىز دۇكەنگە 25 ادام كىرگەنىن كوردىك»، - دەيدى مينيستر.

سونىمەن، لاڭكەستىك ارەكەت جاساۋعا دايىندالعانداردىڭ جالپى سانى باسىندا 45 ادام بولعان، كەيىن 20-سى قىلمىسقا بارۋدان باس تارتقان.

مينيستر ولاردىڭ بۇل ارەكەتكە بارۋداعى دايىندىعىنا نازار اۋدارتىپ وتىر.

«ولار ءبىر پاتەردە جينالادى. ول پاتەردى انىقتاپ، تەكسەردىك. ولار ۇيدەن شىققاندا بارلىعى تەلەفوندارىن جاڭاعى پاتەردە تاستاپ كەتكەن، بۇل ەشكىم ءوز تۋىستارىنا حابارلاسىپ قويماۋ ءۇشىن قاجەت بولعان»، - دەيدى مينيستر.

العاشقى دۇكەندە ولار 9 مينۋت بولعان كورىنەدى. دۇكەنگە شاقىرۋ نۇكتەسى باسىلعاننان سوڭ كۇزەت جاساعى كەلگەن. كۇزەت قىزمەتكەرى دۇكەنگە كىرىپ كەلگەندە اتىلعان. ءۇش مينۋتتان كەيىن كەلگەن پوليسيا جاساعىن دا وق جاۋدىرىپ قارسى العان. سول كەزدە باق-تا جاريالانعانداي، كەلەسى دۇكەنگە بارعان التى ادامنىڭ ۇشەۋى سول جەردە پوليسيا قولىنان جان تاپسىرسا، بىرەۋى جارالانىپ قولعا تۇسكەن، ەكەۋى قاشىپ كەتىپ، كەيىن قالا سىرتىندا ولتىرىلگەن بولاتىن.

مينيستر ايتقان وقيعانىڭ قالعان بولىگى الدىندا جاريالانعان مالىمەتتەردەن الشاق ەمەس.

ق. قاسىموۆ كەزدەسۋدە وسى اقتوبە وقيعاسى بويىنشا پوليسيا قۇرىلىمدارىندا ءبىرقاتار انىقتاۋ جۇمىستارى جۇرەتىنىن ايتتى.

ويتكەنى، اقپارات تاراتۋ كەزىندە پوليسيا تاراپىنان ءبىرقاتار ولقىلىقتار بولماي قالمادى، «كۇدىكتىلەردىڭ ءتىزىمى» دەلىنگەن قۇجاتتار الەۋمەتتىك جەلى ارقىلى تارادى. ول تىزىمنەن وزدەرىنىڭ ءاتى-جونىن كورگەن بىرنەشە ادام الەۋمەتتىك جەلى ارقىلى شۋ شىعاردى.

مينيستر جۋرناليستەردىڭ وسى ولقىلىقتارعا قاتىستى دا سۇراقتارىنا جاۋاپ بەرىپتى.

ماسەلەن، دانيار ۋايسوۆ ەسىمدى ستۋدەنت ءوزىنىڭ وسى تىزىمدە «ولتىرىلگەندەر» قاتارىندا جۇرگەنىن ايتىپ، ۆيدەوۇندەۋ جاريالاعان ەدى.

«ءاتى-جونىن اۋىستىرىپ جىبەرگەن جاعدايلار بار، بۇل ماسەلەنى شەشىپ جاتىرمىز. ال قازا تاپقانعا كەلسەك، بۇل سول كۇنى تاڭدا بولدى، ساعات التىلار شاماسىندا. ول ونىڭ تۋعان اعاسى دەلىندى، سويتسەك، ءىنىسى بولىپ شىقتى. سوندىقتان وسىنداي باعىتتاما تارالىپ كەتكەن، ءبىراق كەيىن اكەسى تانىپ، ءبىز تۇزەپ قويدىق. ال، ونىڭ ۆيدەودا قايدان جۇرگەندىگىن انىقتاۋ ماقساتىندا قىزمەتتىك تەكسەرىس ءجۇرىپ جاتىر»، - دەگەن مينيستر لاڭكەستىككە قارسى وپەراسيا قورىتىندىسى بويىنشا ءبىراز پوليسەيدىڭ «شاڭىن قاعاتىنىن» ايتادى.

«ءبىز وتكىزگەن وپەراسيالار بويىنشا ءبىز ارينە، انىقتاۋ جۇرگىزەمىز. ءبىزدىڭ پاترۋلدىك پوليسياعا، باسشىلارعا جەكەلەگەن ءىس-قيمىلدار بويىنشا سۇراقتارىمىز بار. قانداي دا ءبىر شەشىم قابىلداساق سىزدەرگە حابارلايتىن بولامىز»، - دەيدى ق. قاسىموۆ.