تالعار اۋرۋحاناسىندا اۋىر دەنە جاراقاتىمەن جاتقان پروديۋسەر بايان ەسەنتايەۆانىڭ دەنساۋلىق جاعدايى جاقساردى، - دەپ حابارلايدى Qamshy.kz.

ول تۋرالى الماتى وبلىسى تالعار اۋداندىق اۋرۋحاناسى ديرەكتورىنىڭ ەمدەۋ ءىسى جونىندەگى ورىنباسارى ەربول سارسەنبايەۆ اقپارات تاراتتى.

«ءقازىر ناۋقاستىڭ جاعدايى ورتاشا دەڭگەيدە. ازىرشە جانساقتاۋ بولىمىندە جاتىر، گەوديناميكاسى تۇراقتى، ەسىن بىلەدى، سويلەيدى، باسقالاي اۋىتقۋلار جوق. بۇگىننەن باستاپ ءوزىنىڭ تاماق ىشۋىنە رۇقسات بەردىك. تۋىستارى دا كەلىپ، ولارمەن سويلەسە الادى. ءقازىر ول باسىن كوتەردى، وتىرا الادى»، - دەيدى ە. سارسەنبايەۆ.

ەستەرىڭىزگە سالساق، پروديۋسەر بايان ەسەنتايەۆا وتكەن جۇما كۇنى الماتى وبلىسى تالعار اۋدانى اۋماعىندا سوققىعا جىعىلىپ، ءقازىر اۋرۋحانادا جاتىر. ال، ونىڭ كۇيەۋى باقىتبەك ەسەنتايەۆتى پوليسيا كۇدىكتى رەتىندە قاماۋعا العان. تالعار اۋداندىق ءىىب حابارلاۋىنشا، كيكىلجىڭ كەزىندە پروديۋسەردىڭ كۇيەۋى ىشىمدىككە ماس بولعان كورىنەدى.  

كۇدىكتى رەتىندە ەكى اي مەرزىمگە قاماۋعا الىنعان باقىتبەك ەسەنتايەۆقا ق ر قك 99-بابى بويىنشا، كىسى ولتىرۋگە ارەكەتتەندى دەگەن ايىپ تاعىلۋدا.