جۋرناليست اردابەك سولداتباي قازاقستان رەسپۋبليكاسى مادەنيەت جانە سپورت مينيسترلىگىنىڭ قۇرامىنداعى ءدىن ىستەرى جونىندەگى كوميتەتتى تاراتۋ كەرەك دەگەن ۇسىنىس ايتتى. بۇل تۋرالى Qamshy.kz حابارلايدى.

ا. سولداتباي كوميتەتتىڭ جۇمىسىن ەل مۇسىلماندارىن «بىرىكتىرۋ ەمەس، بولۋمەن اينالىسۋ» دەپ باعالاپ وتىر. سونداي-اق، ول كوميتەتتەن بولەك قازاقستان مۇسىلماندارى ءدىني باسقارماسىنا قاراستى مەشىت يمامدارى دا جاۋاپقا تارتىلۋى كەرەك دەپ سانايدى.

«اقشا جەۋدىڭ امالىن عانا ويلايتىن ءدىن ىستەرى جونىندەگى كوميتەت تاراتىلسىن. اقتوبەدە مۇسىلمانداردى بىرىكتىرۋمەن ەمەس، بولۋمەن اينالىسىپ، جاستاردى جاماعاتتان شەتتەتىپ، اقىرىندا قوعامدى قاندى قىرعىنعا جەتكىزگەن قمدب قوعامدىق بىرلەستىگىنىڭ يمامدارى جاۋاپقا تارتىلسىن. قمدب-نىڭ اپپاراتىنا ەشبىر ءدىني ساۋاتى جوق، ءتىپتى قۇدايدان قورىقپايتىن ۇقك قىزمەتكەرى ەمەس، ءدىني ساۋاتتى ازامات باسشىلىق جاساسىن. مەشىتتەردەگى اۋليەگە قول بەرىپ حريستياندار سەكىلدى كۇناسىنەن ارىلىپ جۇرگەن نۇرشى، سۇلەيمەنشى، گۋلەنشى (مىسالى، شقو باس يمامى) يمامدار ورىندارىن بوساتسىن. ءدىن تۇزەلسە - ەل تۇزەلەدى» دەپ جازادى ا. سولداتباي.

بۇعان دەيىن ءدىن ىستەرى جونىندەگى كوميتەت باسشىسى عالىم شويكين اقتوبەدە ورىن العان قاندى وقيعاعا وراي كوميتەت ءدىني قاتىناستاردى رەتتەيتىن ءبىرقاتار زاڭنامالارعا جاڭا وزگەرىستەر ەنگىزۋ جونىندەگى ۇسىنىستاردى قاراي باستاعانىن ايتقان ول قاندى قىرعىنعا ەلىمىزدە كەڭىنەن تاراعان سالافيزم اعىمىن ۇستانۋشىلاردىڭ قاتىسى بولۋى مۇمكىن ەكەنىن جەتكىزگەن.

«سالافيزم باعىتىنا كەتكەن ادامداردىڭ ناقتى سانىن شىعارۋ مۇمكىن ەمەس. ءبىراق، شامامەن ولاردىڭ سانى 15 مىڭعا جەتەدى. قازاقستاندا قانشا ادام وسى سالافيزم باعىتىنا كەتكەنىن ەشكىم دە ءدوپ باسىپ ايتا المايدى. ءقازىر قوعامدا ساراپشىلار وسى اعىمعا تىيىم سالۋ تۋرالى پىكىر ايتىپ جاتىر. قۇزىرلى ورگاندار بۇل ماسەلەنى جان جاقتى زەرتتەۋدە. ءبىراق، وسى باعىتقا كادىمگىدەي تىيىم سالساق، ونىڭ سالدارى قانداي بولادى دەگەن ماسەلەنى قاراۋ كەرەك. ءقازىر بۇل ماسەلەنى جان-جاقتى قاراۋ كەرەك ەكەنىن، سەبەبى، ەگەر ءبىز راديكالدى شارالار قابىلداساق، وندا ادەبيەتتى، اۋديو-بەينەجازبالارعا قاتىستى شەشىم قابىلداۋىمىز كەرەك. ياعني، ءبىر تىيىم سالۋمەن شەشىلەتىن ماسەلە ەمەس. 2014 جىلدان بەرى «اقنيەت» وڭتايلاندىرۋ ورتالىعى ءداستۇرلى ەمەس ءدىني اعىمعا كەتكەن 300 ادامدى دۇرىس جولعا سالعان. ءبىراق، ولاردىڭ قايتىپ سول اعىمعا بارمايتىنىنا ەشكىم كەپىل بەرە المايدى. ءقازىر تەرىس اعىمعا كەتكەن 500-دەن استام ادام جازاسىن وتەپ جاتىر»،-دەگەن ەدى عالىم شويكين.