ۇكىمەت باسشىسى كارىم ءماسىموۆ اقتوبە وبلىسىنا جۇمىس ساپارمەن باردى، - دەپ حابارلايدى Qamshy.kz پرەمەر-مينيستردىڭ باسپا ءسوز قىزمەتىنە سىلتەمە جاساپ.

پرەمەر-مينيستر وبلىس ورتالىعىنا ساپارى بارىسىندا 5 ماۋسىم كۇنى بولعان لاڭكەستىك وقيعا كەزىندە قازا تاپقان مەرحان تاجىبايەۆتىڭ، ميحايل ماتروسوۆتىڭ، نيكولاي ونيششەنكونىڭ جانە اندرەي ماكسيمەنكونىڭ وتباسىندا بولىپ، تۋىستارىنا كوڭىل ايتتى.

سونداي-اق، كارىم ءماسىموۆ جەدەل مەديسينالىق جاردەم اۋرۋحاناسىنا بارىپ، ناۋقاستاردىڭ احۋالىمەن تانىستى. پرەمەر-مينيستر لاڭكەستەر شابۋىلداعان 6655 اسكەري بولىمىنە دە باس سۇعادى دەپ كۇتىلۋدە.

جۇمىس ساپارى بارىسىندا ۇكىمەت باسشىسى تۇرعىن ءۇي كەشەنى مەن بالاباقشا قۇرىلىسىنىڭ بارىسىمەن، «حالىققا ارنالعان ۇكىمەت» مك جۇمىسىمەن تانىسادى، ءبىرقاتار ونەركاسىپ نىساندارىن ارالاپ، حالىقپەن كەزدەسەتىنى ايتىلۋدا.