«جەر كودەكسىنە» بىلتىر ەنگەن وزگەرىستەردىڭ كەي نورمالارىن جۇزەگە اسىرۋدى توقتاتا تۇرۋ تۋرالى پرەزيدەنت جارلىعى زاڭ كۇشىنە ەنەتىن 1 شىلدەگە دەيىن زاڭمەن بەكىتىلۋى ءتيىس ەكەن، - دەپ حابارلايدى Qamshy.kz 31-ارناعا سىلتەمە جاساپ.

قوعامدا قىزۋ تالقىعا تۇسكەن جەردى ساتۋ جانە جالعا بەرۋ تۋرالى كودەكستىڭ كۇشىنە ەنەتىن مەرزىمى تاياعان سايىن پارلامەنت جانتالاسا باستادى. بۇگىن ءماجىلىس دەپۋتاتتارى زاڭدى توقتاتا تۇرۋ تۋرالى قۇجاتتى ماقۇلدادى. ءتىپتى، جۋىردا عانا اۋىل شارۋاشىلىق ءمينيسترى بولىپ، كەشە ۆيسە-پرەمەر اتانعان اسقار مىرزاحمەتوۆكە كوپ سالماق تۇسىرمەي، ءوزارا كەلىسىپ قابىلداپ جىبەردى.

جەر كودەكسىن حالىققا تۇسىندىرە الماعانى ءۇشىن ايىپتى بولىپ، جۇمىسىنان ايرىلعان اسىلجان مامىتبەكوۆتىڭ ورنىن باسقان اسقار مىرزاحمەتوۆتىڭ جاڭا لاۋازىمدا ماجىلىسكە ءبىرىنشى كەلۋى ەدى. كەشە عانا پرەمەر-مينيستردىڭ ورىنباسارى بولىپ تاعايىندالعان باسشى، جەر كودەكسى جونىندەگى كوميسسيانىڭ ءتوراعاسى دا اتانعان بولاتىن. وتكەن اپتادا اقمولا وبلىسىندا باس قوسقان كوميسسيا مۇشەلەرى، وسى سەنبىدە الماتى وبلىسىندا جينالماق.

اسقار مىرزاحمەتوۆ، ق ر اۋىل شارۋاشىلىق ءمينيسترى، ۆيسە-پرەمەر:

- كوميسسيا بارلىق ەلدى-مەكەندى تولىق ارالاۋ شارت ەمەس شىعار. ويتكەنى كوميسسيانىڭ العاشقى وتىرىستارىندا قابىلدانعان شەشىمگە سايكەس قازىرگى وبلىستاردا قۇرىلعان قوعامدىق كەڭەستەرگە وسى جۇمىستى وڭىردە بارلىق ەلدى مەكەندەردى قامتي وتىرىپ اتقارۋ تاپسىرىلعان.

الداعى جيىندا كوميسسيا وتىرىسىن باقىتجان ساعىنتايەۆپەن بىرلەسىپ باسقارامىن، ارى قاراي ءوزىم جەكە قولعا الامىن دەگەن اسقار مىرزاحمەتوۆ داۋ تۋدىرعان زاڭدى توقتاتا تۇرۋ جونىندەگى بايانداماسىمەن ماجىلىسمەندەردىڭ الدىنا باردى. دەپۋتاتتار مينيسترگە سۇراق قويماق تۇگىل "ۋاقىت تىعىز" دەپ وز-وزدەرىن اسىقتىردى.

ساپارحان وماروۆ، ق ر پارلامەنتى ءماجىلىسىنىڭ دەپۋتاتى:

- 2016 جىلعى 1 شىلدەگە دەيىن قابىلداۋ قاجەتتىگىن ەسكەرە وتىرىپ جانە وسى زاڭ جوباسى باس كوميتەتتىڭ جانە جۇمىس توبىنىڭ وتىرىسىندا جان-جاقتى تالقىلانعاندىعىن ەسكەرىپ سىزدەردەن ونى 2ء-شى وقىلىمدا قاراۋ ماسەلەسىن بۇگىنگى وتىرىستىڭ كۇن تارتىبىنە ەنگىزۋدى سۇرايمىن.

وسىلايشا ەكىنشى وقىلىمدا دا تالقىلاۋسىز ماقۇلدانعان زاڭ جوباسى سەناتقا جولداندى. بىلتىر قابىلداپ جىبەرىپ، كودەكستەگى 4 باپتى قايتا قاراۋ كەرەك دەپ پرەزيدەنت توقتاتقاننان كەيىن ءوز قاتەلىكتەرىن تۇسىنسە كەرەك. كەلگەن جۇمىسىن ويداعىداي ءبىتىرىپ شىققان مينيسترگە جۋرناليستەردىڭ تاعى سۇراعى بولدى.

اسقار مىرزاحمەتوۆ، ق ر اۋىل شارۋاشىلىق ءمينيسترى، ۆيسە-پرەمەر:

- ول قاپتاعاندىقتان ەمەس. ول جوسپارلى تۇردە وڭدەلەتىن القاپتاردا جۇمىستىڭ دەر كەزىندە اتقارىلماعانىنان عانا ورىن الىپ وتىرعان ماسەلە. مۇنى 2000 جىلداعى شەگىرتكەنىڭ قاپتاعانىمەن سالىستىرۋعا بولمايدى.

2000 جىلى شەگىرتكە قاپتاعاندا اۋىل شارۋاشىلىعى ءمينيسترىنىڭ ورىنباسارى بولعان مىرزاحمەتوۆ مىرزا بيىلعى جاعدايدى بەلگىلى ءبىر جاۋاپتى تۇلعالاردىڭ سالعىرتتىعى دەپ پايىمدايدى. ارنايى قۇرىلعان كوميسسيا بۇل بولجامدى راستاسا، ولقىلىققا جول بەرگەندەر جازالانباق. ال ديحانداردىڭ شىعىنىن كىم وتەيتىنى تۋرالى ەشكىم ءتىس جارمادى.