ەكى دۇركىن وليمپيادا، ءتورت دۇركىن الەم چەمپيونى، اۋىراتلەت يليا يلين دوپنگ داۋىنا قاراماستان ريو-دە-جانەيرودا وتەتىن وليمپياداعا دايىندىعىن جالعاستىرا بەرمەك، - دەپ حابارلايدى Qamshy.kz.

ول بۇل تۋرالى ءوزىنىڭ ينستاگرامداعى پاراقشاسىندا جازدى.

«بۇگىنگى اقپارات مەن ءۇشىن توبەمنەن جاي تۇسكەندەي بولدى. اۋىراتلەتيكا حالىقارالىق فەدەراسياسىنىڭ ەرەجەسىنە ساي، مەن تۋرالى بارلىق اقپارات ADAMS جۇيەسىندە، ياعني، مەنىڭ ءار كۇنىم ساعات بويىنشا، قايدا جۇرەتىنىم بارلىعى كورسەتىلگەن. بۇل جاتتىعۋ ۋاقىتىنا دا، جەكە دەمالىسىما دا قاتىستى. مەنى انتيدوپينگتىك اگەنتتىك باقىلاۋشىلارى كەز-كەلگەن ۋاقىتتا كەلىپ تەكسەرە الادى، مەن ولار ءۇشىن اشىقپىن. بيىلدىڭ وزىندە ەكى رەت، پولشادا جانە الماتىداعى جيىندا دوپينگ باقىلاۋدان ءوتتىم»، - دەگەن ول ءوزىنىڭ 2004 جىلدان بەرى دوپينگ-سىنامالار تاپسىرعانىن، ەشبىرىنىڭ دوپينگ قابىلداعانىن دالەلدەيتىن ناتيجە كورسەتپەگەنىن ايتقان.

«مەن ريو وليمپياداسىنا دايىندىقتى جالعاستىرا بەرەمىن، اياعىنا دەيىن بارۋعا بەكىندىم. سپورت باسشىلىعى پروسەسكە بارىنشا قوسىلىپ جاتىر، ماۋسىمنىڭ سوڭىنا دەيىن ناتيجە بولادى دەپ ويلايمىن. مەنىڭ وليمپياداعا قاتىسۋعا ءوتىنىش بەرۋ ءۇشىن شىلدەنىڭ ورتاسىنا دەيىن ۋاقىتىم بار»، - دەيدى ي. يلين.

سپورتشى جازباسىن «قانداي شەشىم قابىلدانسا دا مەن ءوزىمنىڭ از عانا ءومىرىمنىڭ 20 جىلعا جۋىعىن سپورت زالدا جاتتىعۋمەن وتكىزگەنىمدى بىلگەندەرىڭىزدى قالايمىن. مەن كۇنىنە ءۇش رەتتەن اۋىر جاتتىعۋلار جاسادىم. ءوز ەلىم، حالقىم الدىنداعى موينىما ارتىلعان جاۋاپكەرشىلىكتى سەزىندىم، ءارقاشان تەك جەڭىس ءۇشىن كۇرەستىم. وسى جىلدار ىشىندە، قيىندىقتا دا، قۋانىشتا دا سىزدەر مەنى قولدادىڭىزدار. ءقازىر دە سىزدەردىڭ قولداۋلارىڭىزعا ۇمىتتەنەمىن. وزدەرىڭىزدىڭ يليالارىڭىز» دەپ اياقتاعان.

بۇعان دەيىن قازاقستاندىق ءتورت بىردەي اۋىراتلەتتىڭ سپورتپەن شۇعىلدانۋىنا شەكتەۋ قويىلعانى تۋرالى حابارلاعان بولاتىنبىز.