كەشە الەۋمەتتىك جەلىلەردە اقمولا وبلىسىنداعى بەستوبە كەنتىندە «قازاقالتىن» اق-عا قاراستى كەنىشتەردىڭ بىرىندە بولعان اتىس ۆيدەوسى تارادى، - دەپ حابارلايدى Qamshy.kz.
اتقان كىم، اتقىزعان كىم؟ ول جاعى ازىرگە بەلگىسىز. جازبادا وق ءتيىپ جارالانعاندار كورىنبەگەنىمەن، بىرنەشە رەت اتىلعان مىلتىق داۋسى انىق ەستىلەدى. ءىىم باسپا ءسوز قىزمەتى باسقارماسىنىڭ باستىعى ولەگ يۆاششەنكو كيكىلجىڭنىڭ كومپانيا جۇمىسشىلارى مەن كاسىپورىندى كۇزەتەتىن «مىس وردا» كۇزەت اگەنتتىگى قىزمەتكەرلەرى اراسىندا بولعانىن، ءقازىر وقيعانىڭ ءمان-جايى انىقتالىپ جاتقانىن ايتىپتى.
«جۇمىسشىلارعا اتىپ جاتىر (ۆيدەودا – رەد.)، اسپانعا اتىپ جاتىر ما، جەرگە اتىپ جاتىر ما، بەلگىسىز. مىلتىق تراۆماتيكالىق قارۋ بولۋى دا مۇمكىن. بارلىعى انىقتالۋدا. جۇمىسشىلار مەن كۇزەتشىلەر اراسىندا قاقتىعىس بولدى. ءقازىر انىقتاۋ ۇستىندەمىز. مۇمكىن، كۇزەتشىلەر اسپانعا اتقان بولار. مۇمكىن جۇمىسشىلاردى، مۇمكىن تورعايلاردى اتقان شىعار. مۇنىڭ بارلىعى تەرگەۋ بارىسىندا انىقتالادى»،- دەپتى ول.
و. يۆاششەنكو سونداي-اق، جەلىدە تاراعان ۆيدەونىڭ دا تەكسەرىلەتىنىن، قاقتىعىستىڭ تۇپكى سەبەپتەرى دە انىقتالاتىنىن ايتىپ وتىر.
وبلىستىق ءىىد بۇعان دەيىن اتىسستىڭ 16 ماۋسىم كۇنى بولعانىن، جۇمىسشىلار كۇزەتشىلەردىڭ جەكە زاتتارىن تەكسەرۋ تۋرالى تالاپتارىنا قارسىلىق تانىتىپ، ارتى قاقتىعىسقا ۇلاسقانىن حابارلاعان ەدى. وقيعا ورنىنا ستەپنوگورسك قالاسىنىڭ پروكۋرورى، ءىىب باستىعى مەن جەدەل-تەرگەۋ توبى جەتىپ، انىقتاۋ جۇمىستارىن جۇرگىزۋدە. ازىرشە «بۇزاقىلىق» بابى بويىنشا ءىس قوزعالعان. ەكى تاراپتان دا جاراقات العاندار بار.
«قازاقالتىن» كەن-مەتاللۋرگيالىق كومبيناتى» اق-ى ەلىمىزدەگى كونە كاسىپورىنداردىڭ ءبىرى بولىپ سانالادى. تاريحى 1932 جىلدان باستالاتىن التىن ءوندىرۋ كاسىپورىنى 1999 جىلى «قازاقالتىن» ج ش س بولىپ قۇرىلعان. سودان بەرى كومپانيا ۇيىمدىق-قۇقىقتىق فورماسىن بىرنەشە رەت وزگەرتكەن. «بەستوبە»، «اقسۋ»، «جولىمبەت» كەنىشتەرى مەن ەكى فابريكاعا يەلىك ەتەدى.
قاقتىعىستا اتى اتالاتىن ەكىنشى كومپانيا «مىس وردا» ج ش س تۋرالى اشىق كوزدەردە مالىمەت از. تەك كۇزەت اگەنتتىگىنىڭ ەلىمىزدىڭ ءبىرقاتار وبلىستارىنداعى ءوندىرىس نىساندارىن كۇزەتەتىنى بەلگىلى بولىپ وتىر.
ال، كۇزەتشىلەردىڭ قارۋسىز جۇمىسشىلارعا وق اتۋعا قۇقىعى بار ما، جۇمىسشىلاردىڭ جەكە زاتتارىن تەكسەرۋ، ولارعا كۇش قولدانۋ ءتارتىبى قانداي قۇجاتتارمەن بەلگىلەنگەن، التىن ءوندىرۋشى كومپانيا باسشىلىعى بۇل وقيعاعا قانداي باعا بەرەدى دەگەن سۇراقتار جاقىن كۇندەرى جاۋابىن تابادى دەگەن سەنىمدەمىز. ءبىر انىعى جەكە مەنشىك كۇزەت قۇرىلىمى جۇمىسشىلارعا قاراتا وق اتقانى. سوندىقتان دا مۇنى ىشكى، قىزمەتتىك سيپاتتاعى كيكىلجىڭ دەپ جىلى جاۋىپ قويۋعا بولمايدى. ەڭبەك ينسپەكسياسى، پروكۋراتۋرا ماماندارى دا الەۋمەتتىك شيەلەنىسكە لايىقتى باعاسىن بەرۋى ءتيىس.
