بۇگىن ەسەپتى كەزدەسۋ وتكىزگەن ەلىمىزدىڭ سىرتقى ىستەر ءمينيسترى ەرلان ىدىرىسوۆ وسىلاي دەپ مالىمدەدى، - دەپ حابارلايدى Qamshy.kz.

ءمينيستردىڭ ايتۋىنشا، دايش كوسەمدەرىنىڭ ءبىرى ءابۋ مۇحاممەد ءال-ادناني ينتەرنەت ارقىلى جاپپاي نۇسقاۋلىقتار تاراتقان. اقتوبەلىك لاڭكەستەر سول نۇسقاۋ بويىنشا تەراكت جاساعان.

«ءابۋ مۇحاممەد ءال-ادناني ينتەرنەت ارقىلى بۇكىل الەمدى قاسيەتتى رامازان ايىنىڭ قارساڭىندا جانە رامازان ايىندا قارۋلى ارەكەتتەر جاساۋعا شاقىرعان. ارينە، مۇنداي شاقىرۋ، مۇنداي ۋاقىتتا ول ۇيىمنىڭ قانداي ەكەنىن ءوزى-اق كورسەتىپ تۇر. ءبىز وسىنداي ۇراندار ارقىلى پسيحيكاسى قالىپتى ەمەس ادامداردى تاۋىپ الۋعا بولاتىنىن، ولاردىڭ وسىنداي ۇندەۋلەرگە ەرەتىنىن بىلەمىز»، - دەيدى ە. ىدىرىسوۆ.

«مۇنداي جاعداي ەندى قايتالانبايدى دەپ ۇمىتتەنەمىز. قالاي بولعاندا دا، قاۋىپسىزدىك كەڭەسى وتىرىسىنىڭ قورىتىندىسى بويىنشا مۇنداي ارەكەتتەردىڭ قايتالانۋىنا جول بەرمەۋ شارالارى قابىلدانۋدا»، - دەگەندى دە قوسا ايتتى مينيستر.