ەلباسى نۇرسۇلتان نازاربايەۆ «روسسيا 24» تەلەارناسىنا سۇحبات بەرىپ، قازاقستان مەن رەسەي ارىپتەستىگى، تاۋەلسىز مەملەكەتتەر دوستاستىعىنىڭ ءرولى جايلى ويلارىمەن ءبولىستى، - دەپ حابارلايدى Qamshy.kz.
پرەزيدەنت سۇحبات بارىسىندا تمد-نىڭ قۇرىلۋ تاريحىنا توقتالدى.
«تاريحتى، الماتىدا تمد قۇرىلعان 21 جەلتوقساندى ەسكە ءتۇسىرۋ كەرەك. بەلوۆەج جيىنى بولعاندا سلاۆيان ەلدەرى بىرىگە باستادى، قازاقستانمەن، ورتا ازيامەن، كاۆكاز ەلدەرىمەن بىرلەسۋ ماسەلەسى تۋدى. بەلوۆەج كەلىسىمىنىڭ مۇشەلەرى نە بولادى، قالاي بولادى دەپ ۋايىمعا سالىندى. وسى جەردە تۇركىستان وداعىن قۇرۋ تۋرالى دا ءسوز شىقتى. كاۆكاز ەلدەرىنىڭ ءوز ويلارى بولدى. وسىنداي جاعدايدا مەن بارلىعىمىز ارىپتەستىك قۇرايىق دەگەن ۇسىنىس تاستادىم. ويتكەنى، ول كەزدە «وداق» دەگەن سوزگە جۇرت قىزىل كورگەن بۇقاداي قارايتىن. الماتىدا سول دوستاستىقتى قۇردىق»، - دەپ ەسكە الدى سول كۇندەردى ن. نازاربايەۆ.
الايدا، ن. نازاربايەۆتىڭ ايتۋىنشا، بارلىعى جوسپارلانعانداي بولماي شىققان.
«ءبىزدىڭ ورتاق قورعانىس كەڭىستىگىمىز، ەركىن ساۋدا-ساتتىق، ادامداردىڭ ەمىن-ەركىن ءجۇرىپ-تۇرۋى بولادى جانە ءبىز ورتاق قۇندىلىقتاردى قورعايمىز دەگەن ءۇمىت بولعان. ءبىراق، بارلىعى باسقاشا بولدى. ءبىز قالاعانداي بولمادى. بارلىق ەلدەر ەگەمەندىگىن العان سوڭ ونى نىعايتۋعا تىرىستى. اركىمنىڭ ءوز يدەياسى بولدى، اركىم ءوز جولىمەن كەتتى. ءسويتىپ، بۇل ۇيىمنىڭ دا تىگىسى سوگىلە باستادى. بىرلەسكەن جۇمىستار كۇن وتكەن سايىن باسەڭدەي بەردى. ءتىپتى، ءوزىمىز قابىلداعان كوپتەگەن قۇجاتتاردى ەشقايسىمىز ورىندامايتىن جاعدايعا كەلدىك. بىرەۋلەر قول قويدى، بىرەۋلەر قول قويماي وتىردى، ءسويتىپ جاۋاپكەرشىلىك الۋدان باس تارتتى. مۇنداي جاعدايدا قانداي ۇيىم بولادى؟ ول قالاي جۇمىس ىستەيدى؟ وسىنى مەن ۇنەمى ۋايىمداپ جۇرەتىنمىن. ءبىراق، تمد-نىڭ قۇرىلعانى جاقسى بولدى دەپ سانايمىن. بىرىنشىدەن، ءبىزدىڭ بەيبىت تاراۋىمىز ءۇشىن. ەكىنشىدەن، بۇل پرەزيدەنتتەر كەزدەسەتىن الاڭ بولدى. ويتكەنى، ءبولىنۋ ءجۇرىپ جاتقاندا شەكارادا ادامدار اراسىندا ءتۇرلى جاعدايلار ورىن الىپ جاتتى. ءبىر وتباسىنىڭ مۇشەلەرى شەكارانىڭ ارعى بەتىندە، ءبىرى بەرگى بەتىندە قالىپ جاتتى. بىرەۋلەر ماسكەۋدە وقىپ جاتسا، بالالارى وسىندا تۇرىپ جاتتى. وسىنداي ادامي ماسەلەلەردى شەشۋدە كوپتەگەن سۇراقتار تۋدى. تمد مەملەكەت باسشىلارى باس قوسىپ، پىكىر الماساتىن الاڭ بولدى، بىر-بىرىمىزگە قاراۋىمىزدىڭ ءوزى ماڭىزدى بولاتىن»، - دەيدى ەلباسى.
پرەزيدەنت سۇحبات بارىسىندا تمد-دان بولەك، ەۋرازيالىق ەكونوميكالىق وداق، پوستكەڭەستىك كەڭىستىكتەگى ساياسي-ەكونوميكالىق احۋالعا بايلانىستى دا ويلارىمەن بولىسكەن.
