قازاقستان تاۋەلسىزدىگىن العان ۋاقىتتان بەرى بيلىك تىزگىنىن ۇستاعان قانشاما شەنەۋنىك جەمقورلىعى ءۇشىن سوتتالدى. ءتىپتى، كوبىسىنىڭ اتى-جوندەرى دە ءقازىر ەشكىمنىڭ ەسىندە ەمەس. ءبىراق، جۇرت ەكس-پرەمەر سەرىك احمەتوۆكە "وبال بولدى" دەگەندى ءجيى ايتادى. وعان تاعىلعان ايىپتار سوتتا دالەلدەنسە دە، حالىقتىڭ كوبى سەنگىسى كەلمەيتىنى جاسىرىن ەمەس، - دەپ جازادى SN.kz. بۇل تۋرالى Qamshy.kz حابارلايدى.

بيلىك ماڭايىندا جۇرگەن ۇزىنقۇلاقتارعا سەنسەك، 8 جىلعا سوتتالعان سەرىك احمەتوۆ بيىل كۇزدەن قالماي اقتالىپ، بوستاندىققا شىعادى-مىس. بۇعان ق ر پرەزيدەنتى اكىمشىلىگىن باسقارعان نۇرلان ءنىعماتۋليننىڭ قىزمەتتەن كەتۋى سەبەپ بولعان كورىنەدى. راس-وتىرىگى بەلگىسىز، احمەتوۆتىڭ سوتتالۋىنا بۇگىنگى ءماجىلىس سپيكەرىنىڭ قاتىسى بولعان دەيدى تاعى سول ۇزىنقۇلاق. مۇنداي اڭگىمەنى ءتىپتى، سوت بولىپ جاتقان كەزدە كەيبىر قوعام بەلسەندىلەرى دە ايتىپ جۇرەتىن. ەندى قىزمەتتەن كەتىپ، ىقپالى السىرەسە كەرەك، احمەتوۆكە تاعىلعان تەمىر قۇرساۋ بوساي باستاپتى. ەستۋىمىزشە، ەكس-پرەمەر جاقىن كۇندەرى "ۇلكەن كىسىنىڭ" وزىمەن كەزدەسىپ، كەشىرىمىن العان دا كورىنەدى.

وسى رەتتە ايتا كەتۋ كەرەك، سەرىك احمەتوۆتىڭ سوت پروسەسى ءجۇرىپ جاتقان تۇستا وتاندىق ب ا ق وكىلدەرىنىڭ كوبى اتالعان تاقىرىپتا ءمان-ماعىناسى مەن مازمۇنى بىردەي اقپاراتتىق ماتەريالدار جاريالاپ وتىردى. بۇل ماتەريالداردى ادەتتە ق ر پرەزيدەنتى جانىنداعى ورتالىق كومۋنيكاسيالار قىزمەتىنىڭ ماماندارى جىبەرىپ وتىراتىن دەيدى جۋرناليست ارىپتەستەر. ياعني، احمەتوۆكە قارسى اقپاراتتىق شابۋىل جوعارى جاقتان ۇيىمداستىرىلعان بولۋى مۇمكىن.

جالپى، ءنىعماتۋليننىڭ ەسىمىن تەك احمەتوۆتىڭ ىسىمەن عانا ەمەس، ەكسپو جانە كاسىپكەر قايرات جامالييەۆتىڭ ىستەرىمەن بايلانىستىراتىندار دا بار. بۇل دا ارينە، جاي الىپ-قاشپا ءسوز بولۋى مۇمكىن، كوزبەن كورىپ، قولمەن ۇستاپ العان ەشكىم جوق. ءبىراق، "استانا ەكسپو-2017" ۇلتتىق كومپانياسىنىڭ ەكس-توراعاسى ەرمەگيايەۆتىڭ سوتتالۋى الدىن الا جوسپارلانعان ءىس دەگەن بولجام ايتىلسا، جامالييەۆتى وتباسىلىق داۋدىڭ قۇربانى دەيتىندەر بار. ويتكەنى، ەرمەگيايەۆ ءىسى تۋرالى دا مازمۇنى بىردەي ماتەريالداردى وتاندىق ب ا ق بەتتەرىنەن ءجيى بايقادىق.

دەي تۇرا، نىعماتۋلين قىزمەتىن اۋىستىرسا دا ىقپالىنان ايرىلعان جوق دەيتىندەر دە از ەمەس. ال، بۇل بولجامداردىڭ قانشالىقتى راس-وتىرىك ەكەنىن الداعى كۇزدە بىلەتىن بولامىز.

اۋەس مارحابايەۆ