5 مامىر كۇنى اقتوبە قالاسىنداعى لاڭكەستىكتى ۇيىمداستىرۋعا قاتىسىپ، ورتا جولدا رايىنان قايتقان كۇدىكتىنىڭ ءبىرى  ازامات ابدراحمانوۆتى پوليسيا 7 مامىر كۇنى اقتوبە وبلىسى شۇبارشى اۋىلىنان ۇستاعان، - دەپ حابارلايدى Qamshy.kz ازاتتىققا سىلتەمە جاساپ.

بەس جىل بۇرىن وسى اۋىلدا پوليسيا مەن تەرىس اعىمداعىلار اراسىندا قاقتىعىس بولعانى بەلگىلى.

قازاقستان ىشكى ىستەر ءمينيسترى قالمۇحانبەت قاسىموۆ بۇعان دەيىن اقتوبەدە 2016 جىلى ماۋسىمنىڭ 5ء-ى كۇنى جاسالعان قارۋلى شابۋىل جوسپارى جايلى «الدىن الا بىلگەن، ءبىراق سوڭعى ساتتە اينىپ قالعان» جيىرمادان استام ادام انىقتالعانىن مالىمدەگەن. ءبىراق ولار جايلى تولىق رەسمي اقپارات جوق. اقتوبەدەگى شابۋىلداردان كەيىن ۇستالىپ، ءقازىر تەرگەۋ اباقتىسىندا وتىرعانداردىڭ ءبىرى – شۇبارشي اۋىلىنىڭ تۋماسى ازامات ابدراحمانوۆ.

اقتوبە وبلىسى تەمىر اۋدانى شۇبارشي اۋىلىنداعى 57 جاستاعى الپامىس ابدراحمانوۆ اكەسىن ىزدەپ جىلاعان ءۇش جاسار نەمەرەسى ءابدۋلازيزدى «پاپاڭ جۇمىسقا كەتتى» دەپ الداۋسىراتىپ، جۇباتىپ ءجۇر. ءابدۋلازيز بەن ءالى جاسقا تولماعان ءازيزانىڭ اكەسى - الپامىس ابدراحمانوۆتىڭ ۇلكەن ۇلى ازامات ابدراحمانوۆتى قۇقىق قىزمەتكەرلەرى ماۋسىمنىڭ 7ء-سى كەشكىسىن وسى ۇيدەن ۇستاپ، وبلىس ورتالىعىنا الىپ كەتكەن. ءۇي-ىشىنىڭ ايتۋىنشا، ءقازىر ول اقتوبەدەگى تەرگەۋ يزولياتورىندا قاماۋدا وتىر.

قاماۋدا وتىرعان ازامات ابدراحمانوۆتىڭ ءۇش جاسار ۇلى ءابدۋلازىز بەن اكەسى الپامىس ابدراحمانوۆ.

ازامات ابدراحمانوۆتىڭ كەلىنشەگى 22 جاستاعى باقىتگۇل نۇرقاسىموۆا كۇيەۋىنىڭ اقتوبەدەگى پاتەردەن ماۋسىمنىڭ 5ء-ى كۇنى كۇندىزگى ساعات ون ءبىردىڭ شاماسىندا «قوناققا بارامىن» دەپ شىعىپ كەتكەنىن ايتىپ بەردى. ءتۇس الەتىندە ۇيگە ورالعان كۇيەۋى كەلىنشەگىنە «ءقازىر اۋىلعا كەتەمىز» دەگەن سوڭ، وتباسى شۇعىل جولعا شىعىپ، ءتۇس اۋا شۇبارشيگە جەتكەن.

- ەكەۋمىز وعان دەيىن اۋىلعا ورازا كەزىندە بارامىز دەپ جوسپارلاعانبىز. ويتكەنى، جالداپ وتىرعان پاتەردىڭ اي سايىنعى 50 مىڭ تەڭگە تولەماقىسىنا اقشا جەتپەي قينالىپ جۇرگەنبىز. ازاماتتىڭ تۇراقتى تابىسى دا بولمادى، - دەيدى باقىتگۇل نۇرقاسىموۆا.

كەلىنشەكتىڭ ايتۋىنشا، ماۋسىمنىڭ 5ء-ى كۇنى اقتوبەدە جاسالعان قارۋلى شابۋىلعا قاتىسقاندارمەن كۇيەۋىنىڭ بايلانىسى بولعانىن بىلمەگەن.

- جول-جونەكەي ماعان سىر بىلدىرگەن جوق. ازاماتتىڭ الگى ادامدارمەن بىرگە بولىپ، اقىرعى ساتتە ويىنان اينىپ قالعانىن تەك ماۋسىمنىڭ 7ء-سى كۇنى كەشكى ساعات توعىز جارىمداردا ونى ۇيدەن پوليسيا ۇستاپ اكەتكەننەن كەيىن عانا بىلدىك، - دەيدى باقىتگۇل.

الپامىس ابدراحمانوۆتىڭ ايتۋىنشا، 1988 جىلى قىركۇيەكتىڭ 8ء-ى دۇنيەگە كەلگەن ازامات پەن امانات ەسىمدى ەگىز ۇل – وسى شاڭىراقتاعى ءۇش بالانىڭ ۇلكەنى. امانات ءقازىر وتباسىمەن بىرگە اقمولا وبلىسىندا، ال ءۇيدىڭ كەنجەسى سالامات شۇبارشيدە، اكەسىنىڭ قولىندا تۇرىپ جاتىر. ازاماتتىڭ اناسى ءنازيپا وسىدان 10 جىل بۇرىن دۇنيە سالعان. شۇبارشيدەگى كورشىلەرى ابدراحمانوۆتار وتباسىنىڭ ءۇش ۇلىن تەمەكى مەن ىشىمدىكتەن اۋلاق، مىنەزدەرى ءبىرتوعا جىگىتتەر بولاتىن دەپ سيپاتتايدى.

«ۇلى قابىرعا» قىتاي-قازاق بىرلەسكەن كومپانياسىندا جۇمىسشى بولىپ ىستەگەن الپامىس ابدراحمانوۆ بيىلعى جىلدىڭ باسىندا جۇمىستان قىسقارىپ قالعان سوڭ، ءبىر ءۇيلى جان كىشى ۇلى سالاماتتىڭ 60 مىڭ تەڭگە جالاقىسىنا قاراپ قالعان. جاڭاجولداعى مۇناي كومپانيالارىنىڭ بىرىندە ەلەكتريك بولىپ ىستەگەن، كەيىن قىسقارتۋعا تۇسكەن ازامات تا بۇل كەزدە ۇيدە جۇمىسسىز وتىرعان. وسىدان ءتورت اي بۇرىن ازامات ايەلى جانە ەكى بالاسىن الىپ اقتوبەگە كوشكەن.

- اۋىلدان وعان جۇمىس تابىلمادى جانە اكەسى دە جۇمىسسىز قالعان سوڭ، ۇيدەگىلەرگە ماسىل بولعىسى كەلمەدى. ونىڭ ۇستىنە مەنىڭ دەنساۋلىعىمدى ويلادى. بىلتىر جۇرەگىمە كۇردەلى وپەراسيا جاسالعان. ءقازىر جۇرەگىم تىم باياۋ، مينۋتىنا ءارى كەتسە 30 رەت قانا سوعادى. ۇنەمى دارىگەردىڭ باقىلاۋىندا بولۋىم كەرەك. ال شۇبارشيدە كارديولوگ مامان جوق، تەك قالادا بار، - دەيدى ازاماتتىڭ ايەلى باقىتگۇل.

ءبىراق اقتوبەگە كوشىپ بارعان جىگىتكە ول قالادان دا تۇراقتى جۇمىس تابىلماعان.

- بازاردا ءوزى سياقتى ءدىندار جىگىتتەرمەن بىرگە قول تەلەفونىن ساتىپ جۇرگەن. تاپقان-تايانعانى اي سايىن پاتەراقىعا تولەيتىن 50 مىڭ تەڭگە مەن اس-سۋىنان اسپايتىن. بالاما ادۆوكات جالدايتىنداي دا شامامىز جوق، - دەيدى اكەسى الپامىس ابدراحمانوۆ.

ۇي-ىشىندەگىلەر ازامات ابدراحمانوۆتىڭ وسىدان بەس جىلداي بۇرىن نامازعا جىعىلعانىن ايتادى.

شۇبارشي اۋىلدىق وكرۋگىنىڭ اكىمى ازامات وسەربايەۆ 2011 جىلى شىلدە ايىندا وسى اۋىلدا ءدىندار توپ پەن پوليسيا اراسىندا 17 ادامنىڭ (بەسەۋى – پوليسيا وكىلدەرى) قازاسىنا سەبەپ بولعان اتىس وقيعاسىنان كەيىن ەلدى مەكەندەگى «وزگە ءدىني اعىمداعى» ازاماتتار ەرەكشە نازاردا ەكەنىن ايتىپ بەردى. اكىم «ولاردىڭ بەتىن وزگە اعىمنان ءابۋ حانيفا ءمازحابىنا بۇرۋىمىز كەرەك» دەپ سانايتىن الگى ادامداردىڭ اراسىندا ازامات ابدراحمانوۆ تا بولعان.

وسەربايەۆتىڭ سوزىنشە، بيىل ماۋسىمنىڭ 5ء-ى كۇنى «اقتوبەدە اتىس بولىپتى» دەگەن سۋىت حاباردى ەستىگەن بويدا ول اۋىلداعى ءدىن جولىنا تۇسكەن جىگىتتەردى تۇگەندەپ شىققان. «الپامىس اعايدىڭ بالاسى سول كۇنى شۇبارشيگە وتباسىمەن بىرگە ورالعانىن ەستىپ، الاڭسىز وتىرعام» دەيدى اۋىل اكىمى.

- 2011 جىلعى وقيعادان سوڭ ءدىندار تۇرعىنداردىڭ ءبارىن ەسەپكە الىپ، ۇنەمى باقىلاپ وتىرامىز. بۇل توپتا ەڭبەككە قابىلەتتى، ءبىراق جۇمىسسىز جۇرگەن 28 ادام بار. جوعارعى جاقتان ەڭ ءبىرىنشى كەزەكتە سولاردى جۇمىسقا ورنالاستىرۋ تۋرالى تاپسىرما الدىم. جەرگىلىكتى مۇناي كومپانيالارىمەن بايلانىسىپ وتىرمىن. ورىن بوساعان جاعدايدا ەڭ الدىمەن وسىلارعا باسىمدىق بەرىلەدى، - دەيدى شۇبارشي اۋىلدىق وكرۋگىنىڭ اكىمى.

اقتوبەدە ماۋسىمنىڭ 5ء-ى ەكى قارۋ دۇكەنى مەن ۇلتتىق گۆارديانىڭ اسكەري بولىمىنە قارۋلى توپ شابۋىل جاسادى. شابۋىلدار سالدارىنان جەتى ادام: ءۇش اسكەري جانە ءتورت بەيبىت تۇرعىن قازا تاپقانى حابارلاندى. شابۋىلعا كۇدىكتىلەرگە قارسى ارنايى وپەراسيا بىرنەشە كۇنگە جالعاستى. رەسمي مالىمەت بويىنشا، 18 كۇدىكتىنىڭ كوزى جويىلىپ، 9-ى قولعا تۇسكەن.

قازاقستاندا سوڭعى ۋاقىتتاعى ەڭ ۇلكەن قانتوگىسكە اينالعان وقيعالاردىڭ ءبىرى – اقتوبەدە ماۋسىمنىڭ 5ء-ى كۇنى بولعان قارۋلى شابۋىلدا ەل پرەزيدەنتى نۇرسۇلتان نازاربايەۆ «شەتەلدەن نۇسقاۋ العان جالعان ءدىني اعىم وكىلدەرىنىڭ تەررورلىق شابۋىلى» دەپ اتاعان بولاتىن. اقتوبەدەگى وقيعالارعا بايلانىستى ماۋسىمنىڭ 5-ىنەن باستاپ قازاقستان بويىنشا 40 كۇن مەرزىمگە تەررورلىق قاۋىپ-قاتەردىڭ سارى دەڭگەيى جاريالانعان.