الماتى اكىمدىگىنىڭ باستاماسىمەن قالادا اقىلى اۆتوتۇراقتار قايتا جاساقتالۋدا. ەلەكتروندى اقى تولەۋ قۇرىلعىلارى ورناتىلدى. ءسويتىپ، جول جيەگىنە كولىك قويۋ ءۇشىن الىناتىن تولەمدەر بۇرىنعى «قارا نارىقتان جارىققا شىعارىلماق». بۇگىن اقىلى پاركومات جۇيەسى تولىق كۇشىنە ەندى. وعان اقى تولەمەگەندەرگە 3 ايلىق-ەسەپتىك كورسەتكىش كولەمىندە ايىپپۇل سالىنىپ، ءتىپتى، كولىكتەرى دە ەۆاكۋاتورعا "جۇك" بولۋى مۇمكىن.
قالا اكىمى جانىنداعى قوعامدىق كەڭەس ماقۇلداعان پاركومات جۇيەسى شەنەۋنىكتەرگە جاققانىمەن قاراپايىم تۇرعىندارعا قولايلى ما دەگەن سۇراق تۋادى. ازىرگە بەلگىلەنگەن تۇراقتارعا كولىك قويعاندار ءار ساعات ءۇشىن 100 تەڭگە تولەۋى كەرەك. الدا، كولىك كەپتەلىسى ءجيى بولاتىن ورىنداردا بۇل باعام 300 تەڭگەگە كوتەرىلەدى دەگەن دە اڭگىمە بار. ەندى وسى جەردە بۇرىن جول جيەگىنە كولىك قويعانداردان اقشا جينايتىن بۇرىنعى «جاسىل جەلەتتىلەر» مەن بۇگىنگى پاركوماتتاردىڭ پارقىنا ۇڭىلسەك.
بۇرىن كولىك تۇراقتارىنا جۇرگىزۋشىلەر ۋاقىت ۇزاقتىعىنا قاراماي 50-100 تەڭگە كولەمىندە اقى تولەيتىن. ەندى ءار ساعات ءۇشىن 100 تەڭگە تولەنەدى. بۇرىنعى 100 تەڭگەنى كوپ كورىپ، «جاسىل جەلەتتىلەرمەن» جاعالاسىپ جۇرگەن الماتىلىقتاردى بۇل وزگەرىس قۋانتا قويمايدى. نەگە؟ ويتكەنى، كولىكتەرىن جول بويىنا قالدىراتىنداردىڭ بارلىعىنىڭ جۇمىسى ءبىر ساعات ىشىندە بىتەدى دەي المايسىز. بىرەۋ، بازار ارالاۋعا
كەلەدى، بىرەۋ شاشتارازعا بارادى. بازار ارالاۋعا كەمى ەكى ساعات ۋاقىت قاجەت بولسا، شاشتارازدا دا سونشا ۋاقىت وتىرىپ قالۋىڭىز مۇمكىن. سوندا بۇرىن 50-100 تەڭگە عانا تولەنەتىن تۇراققا ەندى 400-500 تەڭگە اقشاڭىزدى قيۋعا تۋرا كەلەدى. كولىگىن جۇمىس ورنىنىڭ اينالاسىنداعى تۇراقتارعا جارتى كۇنگە قالدىراتىندار قايتەدى؟ ادىلدىك قايدا؟ بۇرىنعى «جاسىل جەلەتتىلەر» زاڭسىز اقشا جيناپ كەلگەن دەدىك. ال، مىنا «زاڭدى» اقشا جيناۋشىلاردىڭ ءىسىن نە دەۋگە بولادى؟ «زاڭدىنىڭ» ءبارى «قىمبات» بولۋى كەرەك پە؟ اقىلى اۆتوتۇراقتاردىڭ اۆتوماتتى جۇيەسىن ەنگىزگەندە وسى جايتتەر نەگە ەسكەرىلمەگەن؟
قالا ومىرىنە ەنەتىن جاڭالىقتىڭ بارلىعىن قالا تۇرعىندارىنىڭ قالتاسىنان قارجىلاندىرۋعا اكىمدىك پەن ونىڭ اينالاسىنداعى كاسىپورىندار داندەپ العانداي. جىل باسىندا قولدانىسقا ەنگەن «وڭاي» ەلەكتروندى بيلەتتەندىرۋ جۇيەسى دە كوپتىڭ نارازىلىعىنا ۇشىرادى. تيىمسىزدىگى ءۇشىن ەمەس، تاعى دا ۇيىمداستىرۋشىلاردىڭ شالاعايلىعى ءۇشىن. اكىمدىك ناسيحاتتاعان جۇيەنى قولدانىسقا ەنگىزۋ ءۇشىن جولاۋشىلار ءوز قالتاسىنان 320 تەڭگە بەرۋ كەرەك بولدى. جۇيە قولدانىسقا ەنگەن العاشقى ايلاردا-اق «وڭاي» كارتالارىنىڭ ميلليونعا جۋىق داناسى ساتىلعانىن ەسكەرسەك، حالىقتىڭ قالتاسىنان قانشا قاراجات جينالعانىن ەسەپتەپ شىعۋ قيىن ەمەس...
ماۋسىم ايىنىڭ سوڭىن الا ورناتىلىپ، ىسكە قوسىلىپ جاتقان مىنا پاركوماتتار دا اكىمدىكتىڭ «وڭاي» ولجاعا، بيۋدجەتتى تولىقتىرۋدىڭ بۇقارا حالىقتان باسقانىڭ قالتاسىنا سالماق سالمايتىن وسىنداي «قاراپايىم» ادىستەرىنەن باسقانى بايقامايتىنىنىڭ ءبىر بەلگىسى. تەك، قالا بيلىگىنىڭ بۇل باستامالارىنا قۇقىقتىق، زاڭدىق نەگىزدە نارازىلىق ءبىلدىرىپ، ەلدىڭ مۇددەسىن قورعاعان اۆتوكولىك جۇرگىزۋشىلەرىنىڭ وداعى، تۇتىنۋشىلار قۇقىعىن قورعاۋ ۇيىمدارىنىڭ بولماعانى قىنجىلتادى. ال، ول «جاڭالىقتاردى» ەنگىزۋدەن تۇسەتىن قىرۋار قارجىعا كىمدەر كەنەلىپ جاتىر دەگەن سۇراق ءوز الدىنا بولەك ماسەلە.
جومارت ابدوللا ۇلى
