شيەتتەي 3 ۇلىمەن نەكەلى جارى تاستاپ كەتكەندىكتەن بۇگىنگە دەيىن انالار ءۇيىن پانالاپ كەلگەن. ەندى، مەكەمە ءتارتىبى بويىنشا 29 جاستاعى اينۇر يساينوۆا ەكى ايدان كەيىن ول جەردەن دە كەتۋى كەرەك. وعان قوسا ءبىر ۇلى سال اۋرۋلارىمەن تۋعان. سوندىقتان كەلىنشەك بالاسىنىڭ ەمى ءۇشىن قايىرىمدى جانداردان كومەك سۇراۋدا، - دەپ حابارلايدى Qamshy.kz كتك ارناسىنا سىلتەمە جاساپ.

وتاعاسى ءىلياس، دياس، ميراس ەسىمدى ءۇش ۇلىنىن ومىرگە كەلۋىن اسىعا كۇتىپتى. الايدا، بالالارى ەكى ايعا تولعاندا ول جۇمىس ىستەيمىن دەگەن استاناعا جەلەۋمەن كەتىپ، قايتىپ ورالماعان. ال، نارەستەلەرىمەن جالعىز قالعان اينۇر جولداسىنىن ءىز-تۇزسىز كەتۋىنە ميراستىڭ سىرقاتى سەبەپ دەيدى. ويتكەنى، تۋا ءبىتتى سال جانە تالما دەرتىنە دۋشار بولعان ۇلىنان بەزگەن كورىنەدى.

اينۇر يساينوۆا، ۇشەمدەردىڭ اناسى:

-ول، اليمەنت تولەمەيدى .شىندىعىنا كەلگەندە سوت ورىنداۋشىلار ونى ىزدەمەيدى دە. سونىڭ كەسەرىنەن ءار بالاعا 2 مىڭ تەڭگەدەن جاردەماقى عانا  الامىن. ال، تولىق راسىمدەۋ ءۇشىن اكەسىنىڭ قۇجاتى قاجەت. ءقازىر ىزدەۋدە ءجۇر.

وزدىگىنەن وتىرا الماي ءسىڭىرى تارتىلا بەرەتىن بالانىڭ سىرقاتىنا ەلىمىزدىڭ دارىگەرلەرى اراشا تۇسە الماعان. تەك ونىڭ اياقتان تۇرىپ كەتۋىنە قىتايلىق ماماندار كەپىلدىك بەرىپتى. ءبىراق، وعان جۇمسالاتىن قىرۋار قاراجات اينۇردىڭ قولىندا جوق.

بۇگىندە، ولاردىڭ انالار ءۇيىن پانالاعانىنا ءبىر جىلدان اسىپتى. مۇندا ودان ارتىق ۇزاق تۇراقتاۋعا بولمايدى. سوندىقتان بارار جەر باسار تاۋى جوق كەلىنشەك ءۇشىن باسپانا دا قايعىعا اينالىپ وتىر. ال، وزدەرى تىركەلگەن پاتەر كەزەگىنىڭ قاشان كەلەتىنى تاعى بەلگىسىز. ەندى، ۇشەممەن دالادا قالۋدان قورىققان انا قايىرىمدى جاندارعا الاقان جايۋعا ءماجبۇر.