«ەكسپو» قالاشىعىنىڭ 36 نىسانىنىڭ بارلىعى «تەرروريزم ءقاۋپى جوعارى» نىساندار قاتارىنا ەنىپ وتىر، - دەپ حابارلايدى Qamshy.kz استانا ارناسىنا سىلتەمە جاساپ.

بۇل تۋرالى بۇگىن باس پروكۋراتۋرا عيماراتىندا وتكەن كورمەنىڭ ۇيلەستىرۋ كەڭەسىنىڭ وتىرىسىندا ايتىلدى. كورمە قۇرىلىسىندا جۇمىس ىستەپ جاتقان 32 مىڭنان استام ادام ارنايى تەكسەرىستەن ءوتىپ، قالاشىققا جارىلعىش زاتتار مەن ۋلى زاتتاردىڭ كىرگىزىلمەۋى قاتاڭ قاداعالانىپ وتىر.

-بۇگىنگە دەيىن قالاشىقتا 170-تەن استام تەكسەرىس جۇرگىزىلدى. ەكسپونىڭ بارلىق 36 نىسانى تەررورلىق شابۋىل ءقاۋپى جوعارى دەپ تانىلىپ وتىر. مەملەكەت باسشىسى سپورتتىق جاپپاي ءىس-شارالار وتكىزۋ تۋرالى زاڭنىڭ قاۋىپسىزدىك شارالارىنا قاتىستى وزگەرىستەرىن بەكىتتى. قالاشىقتىڭ قاراۋىلى، ءتىپتى قۇرىلىسشىلار دا ارنايى قىزمەتتىڭ تەكسەرىسىنەن ءوتتى. ونىڭ ىشىندە ولاردىڭ ءتۇرلى ءدىني ۇيىمدارعا قاتىسى دا قاتاڭ تەكسەرىلدى، - دەيدى ق ر پرەمەر-مينيسترىنىڭ ءبىرىنشى ورىنباسارى باقىتجان ساعىنتايەۆ.

قۇزىرلى ۆەدومستۆولار حالىقارالىق كورمە كەزىندە قالادا ءبىرقاتار شەكتەۋلەردىڭ بولاتىنىن الدىن-الا ەسكەرتەدى. ماسەلەن، قارۋ-جاراق ساۋداسى مەن بەيبىت شەرۋ وتكىزۋ ءتارتىبى قاتاڭداتىلادى. ماماندار قاۋىپسىزدىك شارالارىنا تۇسىنىستىكپەن قاراۋعا شاقىرادى. كورمەنىڭ وتىز كۇنىندە قوعامدىق قاۋىپسىزدىكتى قامتاماسىز ەتۋگە سىرتتان دا كۇش تارتىلادى. ەلىمىزدىڭ باس پروكۋرورى ول ءۇشىن بۇۇ-نىڭ ارنايى ماماندارىنىڭ تاجىريبەسىمەن بولىسپەك. سونىڭ ارقاسىندا ەلدە ادامنىڭ ءىس-قيمىلى مەن سويلەۋ مانەرىنەن كۇدىكتىنى سىرتتاي تانيتىن «پروفايلەر» ماماندار دايىندالادى. ەلوردانىڭ قاۋىپسىزدىك دەڭگەيى ارنايى كارتاعا سىزىلماق. سمارتفونعا ورناتىلعان باعدارلاما ارقىلى قالانىڭ قاي بولىگىندە ەڭ كوپ قىلمىس جاسالاتىنى، قاي اۋدان ەڭ ءقاۋىپسىز ەكەنى بەلگىلەنەدى.