جاقسىلىققا جانى قۇمار ءانشى زاتتىبەك كوپبوسىن ۇلى ءزاۋلىم ءۇيىنىڭ قاسىنداعى دۇكەنىن اۋىلداستارىنا نامازحانا رەتىندە سىيعا بەردى. ەندى اۋىلداستارى بۇل دۇكەنگە تاۋار الۋ ءۇشىن ەمەس، ناماز وقۋ ءۇشىن كەلەتىن بولادى، - دەپ حابارلايدى Qamshy.kz ويشوعىرعا سىلتەمە جاساپ.

قمدب وقو وكىل يمامى احمەتجان كەرىمبەك العاشقىلاردىڭ ءبىرى بولىپ نامازحانادا ناماز وقىپ، يگى ىسكە رازىلىعىن ءبىلدىرىپ العىسىن ايتتى. يمام نامازحاناعا ارنايى ۇستاز بەكىتىپ بەردى. ەندى بۇل نامازحانادا اۋىل بالالارى قۇران وقىپ، يماندىلىقپەن سۋسىندايتىن بولادى. اتا-انانى سىيلاۋ، وتاندى ءسۇيۋ، كوركەم مىنەز تاقىرىبىندا تۇراقتى تۇردە ساباقتار ءوتىپ تۇرادى.

جۇمىس ىستەپ، ساۋداسى قىزىپ تۇرعان دۇكەندى نامازحاناعا اينالدىرعانىن زاتتىبەك كوپبوسىن ۇلى: « اللا ماعان ونەر بەردى، سول ونەر ارقىلى ريزىعىمدى مولايتتى. ەكى قاباتتى ءزاۋلىم ءۇي سالدىم. بۇل نامازحانا مەنىڭ اللاعا دەگەن شۇكىرلىگىم. ءبىزدىڭ مولتەك اۋدانعا مەشىت ءسال الىستاۋ. جاياۋ ءجۇرىپ ءبىر ساعاتتا باراسىڭ. وسىنداعى اقساقالدار، بالالار قينالىپ قالماسىنشى، جينالىپ ناماز وقيتىن، رۋحاني اڭگىمە ايتاتىن جەرى بولسىنشى دەگەن نيەت ەدى. ارنايى ۇستاز بەكىتىلدى. ەندى بالالار وسى نامازحانادان بابالار ۇستانعان اسىل ءدىننىڭ نەگىزدەرىن ۇيرەنىپ، يماندى بولىپ وسسە مەن ءۇشىن سول ۇلكەن باقىت. وسى ۋاقىتقا دەيىن دە دۇكەنسىز ءومىر ءسۇردىم عوي، بۇدان كەيىن دە اللا ءوزى جەتكىزەدى» — دەيدى.

اقساقالدار اق باتاسىن بەرىپ، كورشىلەر: «جانى جايساڭ، قولى اشىق زاتتىبەك كوپبوسىن ۇلىنىڭ بۇل ءىسى ناعىز ازاماتتىق، تۇلعالىق. امان ءجۇرسىن، ءومىرىلى بەرەكەلى بولسىن» — دەپ اق تىلەگىن ايتىپ، ريزاشىلىقتارىن ءبىلدىردى.

ەل بولاشاعىنىڭ باياندىلىعىنا سوزبەن ەمەس ىسپەن اتسالىسىپ جۇرگەن زاتتىبەك كوپبوسىنۇلىداي ازاماتتار كوپ بولسىن!